Skip to content

Al lo konteni

 LO KOUVERTIR | KI SA PLI BON KADO?

“I ti sa pli bon kado ki mon’n deza gannyen”

“I ti sa pli bon kado ki mon’n deza gannyen”

En zenn fiy 13 an ti santi koumsa ler i ti ganny en pti lisyen konman en kado. En madanm ki annan son prop lakonpannyen i dir ki son lavi ti sanze ler son papa ti fer li kado en konpiter ler i ti ankor dan lekol segonder. En msye ki’n fek marye i dir ki sa kart ki son madanm ti’n fer pour li pour son premye lanniverser maryaz ti sa pli bon kado ki in deza gannyen.

Tou le-z-an, dimoun i pran letan e fer bokou zefor pour rod sa “pli bon” kado pour en zanmi oubyen en manm fanmir pour en lokazyon spesyal. Laplipar zot pou kontan konnen ki zot kado i sa enn pli bon. Me ou? Eski ou ti a kontan donn oubyen ganny en kado ki vreman ganny apresye?

Sa i kapab en keksoz ki bokou nou ti a kontan, pa zis akoz sa kado i kapab annan en lefe lo sa enn ki ganny sa kado me osi akoz i annan en lefe lo santiman sa enn ki’n donn sa kado. Apre tou, Labib i dir: “I annan plis lazwa pour donnen ki pour resevwar.” (Akt 20:35) Byensir, lazwa ki en dimoun i gannyen ler i donnen i kapab ogmante si sa kado i ganny byen apresye par sa dimoun ki’n ganny sa kado.

Alor, ki mannyer ou kapab fer ki sa kado ki ou donnen i vin en sours vre lazwa pour ou e pour sa enn ki ou donn sa kado? Me si i pa posib pour donn sa “pli bon” kado, ki ou kapab fer pour ki ou kado i ganny byen apresye?