Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer  |  No. 6 2017

 KESTYON SORTI KOT NOU LEKTER . . .

Eski bann Kretyen i devret selebre Nwel?

Eski bann Kretyen i devret selebre Nwel?

Partou dan lemonn, plizyer dimoun i krwar ki lafet Nwel i selebrasyon lanniverser nesans Zezi Kri. Par kont, eski ou’n deza demann ou lekor si bann Kretyen ki ti pros avek Zezi dan premye syek ti selebre Nwel? Oubyen eski ou konnen ki Labib i dir konsernan lanniverser nesans? Larepons sa bann kestyon pou ed nou konnen si bann Kretyen i devret selebre Nwel.

Premyerman, Labib pa dir ki Zezi oubyen okenn serviter fidel Bondye ti selebre lanniverser nesans. Labib i koz lo zis de dimoun ki ti selebre zot lanniverser nesans. Tou le de pa ti bann adorater Zeova e ler zot ti pe selebre zot lanniverser nesans, bann move keksoz ti arive. (Zenez 40:20; Mark 6:21) Dapre Encyclopædia Britannica, bann premye Kretyen ti rezet “selebrasyon lanniverser nesans ki ti en koutim payen.”

Ki dat Zezi ti ne?

Labib pa dir egzakteman kan ki Zezi ti ne. McClintock and Strong’s Cyclopedia i dir ki “dat nesans Zezi pa ganny trouve dan Nouvo Testaman oubyen dan okenn lezot liv.” Si Zezi ti anvi son bann disip selebre son nesans, i ti pou rod en fason pour ki zot konn son dat nesans.

Dezyenmman, Labib pa dir ki Zezi oubyen okenn lezot son bann disip ti selebre Nwel. Dapre New Catholic Encyclopedia, selebrasyon Nwel ti ganny mansyonnen pour premye fwa “dan Chronograph Philocalus, en kalandriye Romen (almanac) ki son bann lenformasyon i date depi lannen 336.” I evidan ki sa ti apre ki Labib ti’n fini ganny ekrir e plizyer syek apre ki Zezi ti vin lo later. Alor, McClintock and Strong’s Cyclopedia i fer remarke ki “selebrasyon Nwel pa sorti dan Nouvo Testaman e Bondye pa’n demann bann Kretyen pour selebre sa lafet.” *

Ki levennman Zezi ti demann son bann disip pour selebre?

Konman sa Gran Ansenyan, Zezi ti donn son bann disip bann lenstriksyon kler lo sa ki i oule zot fer e sa i ganny trouve dan Labib. Par kont, i pa ti demann zot pour selebre Nwel. Zis parey en ansenyan pa anvi son bann zelev i fer sa ki i pa’n demann zot, Zezi osi pa anvi son bann disip i fer bann keksoz ki pa’n “ganny ekrir” dan Labib.​—1 Korentyen 4:6.

Par kont, i annan en levennman vreman enportan ki bann premye Kretyen ti abitye selebre. Sa i komemorasyon oubyen Memoryal lanmor Zezi. Zezi ti personnelman dir son bann disip kan pour komemor son lanmor e i ti montre zot ki mannyer pour fer li. Sa bann lenstriksyon spesifik e osi dat son lanmor i ganny trouve dan Labib.​—Lik 22:19; 1 Korentyen 11:25.

Parey nou’n vwar, Nwel i en selebrasyon lanniverser nesans e bann premye Kretyen pa ti swiv sa bann koutim payen. Deplis, Labib pa dir ki Zezi oubyen okenn lezot dimoun ti selebre Nwel. Sanmenm bokou Kretyen dan lemonn pa selebre Nwel ozordi.

^ par. 6 Pour plis lenformasyon lo lorizin laplipar tradisyon Nwel, vwar sa lartik “Our Readers Ask . . . What Are the Facts About Christmas?” dan Latour Veyer le 1 Desanm 2014 an Angle lo www.jw.org.