Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer  |  No. 6 2016

Sigonny

Aprann avek bann zwazo dan lesyel

Aprann avek bann zwazo dan lesyel

“Demann zwazo dan lesyel e zot ava ansenny ou. Annefe, lekel parmi zot pa konnen ki lanmen [“Zeova,” NWT] ki’n fer tousala?”Zob 12:7, 9.

PLIS ki 3,000 an pase, Zob ti realize ki bann zwazo i annan bokou pour ansenny nou lo kreasyon Bondye. Me zot konportman i osi fer ki zot ganny servi konman bann legzanp oubyen konparezon pour eksplik en keksoz. Labib i refer bokou avek bann zwazo dan lesyel ki ansenny nou bann leson enportan konsernan lavi ek nou relasyon avek Bondye. Annou vwar detrwa legzanp.

KOT BANN ZIRONDEL I FER ZOT NIK

Zirondel

Bann zabitan Zerizalenm ti konn byen bann zirondel, en zwazo ki ti annan labitid fer son nik anba twa bann batiman. Serten ti fer zot nik dan tanp Salomon. I paret ki bann zirondel ki ti fer zot nik dan tanp Salomon ti santi zot an sekirite. Laba zot ti kapab trankilman pran swen avek zot piti.

Enn parmi garson Kora ki ti konpoz Psonm 84 e ki ti servi dan tanp pour en semenn tou le sis mwan, ti obzerv bann nik dan tanp. I ti anvi vin parey sa zirondel ki ti annan en landrwa permanan dan lakaz Zeova, alor i ti dir: “SENYER liniver! Ou tanp i donn mwan gran lazwa. Mon vreman anvi antre dan sanktyer SENYER. . . . SENYER liniver! Mon lerwa! Mon Bondye! Menm en sren i fer son nik e bann zirondel i ganny en landrwa pour reste pre kot ou lotel, kot zot kapab met zot bann piti.” (Psonm 84:1-3) Eski nou tou, menm bann zenn, nou montre sa menm lanvi ek lapresyasyon pour asosye regilyerman avek pep Bondye?Psonm 26:8, 12.

SIGONNY I KONN SON LETAN

Profet Zeremi ti ekri: “Sigonny i konnen kan pour li kit pei.” San dout, profet Zeremi ti konnen kan ki bann sigonny ti kit Later Promiz pour al dan en lot pei. Resers in montre ki pandan prentan, plis ki 300,000 sigonny blan i kit Lafrik pour al Nor Lerop an pasan par Vale Zourden. Dan zot menm, bann sigonny i konnen kan ki i’n ler pour retourn dan landrwa kot zot reprodwir. Parey lezot zwazo migrater, “zot konn sezon pour zot emigre.”Zeremi 8:7.

Collins Atlas of the Bird Migration i dir: “Sa ki vreman enkrwayab avek lafason ki bann zwazo i imigre se lefet ki i ariv otomatikman.” Zeova in donn bann zwazo migrater lensten pour konnen kan ki zot bezwen imigre me i’n donn imen sa abilite pour konpran bann letan ek sezon. (Lik 12:54-56) Kontrerman avek lensten ki Bondye in donn bann sigonny, bann imen i bezwen konnesans lo Bondye pour konpran bann levennman ki pe arive dan sa letan ki nou pe viv. Bann Izraelit dan letan Zeremi pa ti konpran bann siny. Bondye  ti eksplike akoz sa ti’n arive ler i ti dir: “Zot in rezet parol [“Zeova,” NWT]. Oli zot lasazes?”Zeremi 8:9.

Ozordi nou annan ase levidans ki nou pe viv dan sa letan ki Labib i apel “bann dernyen zour.” (2 Timote 3:1-5) Eski ou pou imit bann sigonny e pran an konsiderasyon sa letan?

LEG I VWAR LWEN

Leg

Leg i ganny mansyonnen plizyer fwa dan Labib e i ti souvan ganny vwar dan Later Promiz. Depi anler lo bout montanny, en leg i “espyonn son viktim; son lizye i war li depi tre lwen.” (Zob 39:27-29) I vwar telman lwen ki i kapab detekte en lapen en zistans en kilomet avek li.

Zis parey en leg i kapab “war . . . depi tre lwen,” Zeova i kapab vwar dan lavenir. Alor, Zeova ti dir: “Depi konmansman, mon’n anons lavenir e depi lontan davans, sa ki pa ankor arive.” (Izai 46:10) Ler nou swiv konsey Zeova, nou benefisye avek son gran lasazes ek son abilite pour vwar lavenir.Izai 48:17, 18.

Labib i osi konpar bann ki annan konfyans dan Zeova avek bann leg: “Sa bann ki met zot konfyans dan [“Zeova,” NWT] ava reganny zot lafors; zot ava anvole parey en leg.” (Izai 40:31) En leg i servi bann kouran ler ki form bann kolonn, pour li anvole. Enn fwa ki sa leg i trouv en kouran ler, i ouver son lezel e fer letour ladan e sa i fer li mont pli o. En leg pa depan lo li menm pour tenir dan lezer e anvol bann gran zistans. Pareyman, bann ki met zot konfyans dan Zeova i kapab vwar li konman sa enn ki promet zot sa ‘lafors ki pli pwisan ki zot prop lafors.’2 Korentyen 4:7, 8.

“PAREY EN MER POUL I RASANBLE SON BANN PITI”

En mer poul ek son bann piti

En pe letan avan son lanmor, Zezi ti pran en pe letan pour get lavil Zerizalenm ki ti kapital bann Zwif. I ti pran en gran lespirasyon e dir: “Zerizalenm, Zerizalenm, lavil ki’n touy bann profet e ki’n saboul avek ros bann ki’n ganny anvoye kot li, konbyen fwa mon ti anvi rasanble ou bann zanfan parey en mer poul i rasanble son bann piti anba son lezel! Me zot pa ti oule.”Matye 23:37.

Enn parmi bann pli gran lensten dan bann zwazo i zot dezir pour protez zot piti. Bann zwazo ki fer zot nik ater parey poul, i bezwen vey byen danze avek son bann piti. Si en poul i vwar en katiti, i pou fer en tapaz pour alert son bann piti e deswit zot tay anba son lezel pour proteksyon. Se la kot bann pti poul i kasyet soley ek gro lapli. Pareyman, Zezi ti anvi ofer bann zabitan Zerizalenm proteksyon spirityel. Ozordi, Zezi i envit nou pour vin kot li pour ganny lafors ek proteksyon avek nou bann problenm ek traka dan lavi toulezour.Matye 11:28, 29.

I vreman annan bokou keksoz pour aprann avek bann zwazo. Anmezir ou obzerv zot, esey rapel bann legzanp dan Labib ki koz lo zot. Legzanp bann zirondel i kapab ed ou apresye sa landrwa kot nou ador Zeova. Si ou tourn ver Bondye, i a donn ou lespwar ki kapab ed ou ganny lafors parey leg. Ou kapab vin kot Zezi pour laverite spirityel ki kapab protez ou parey en mer poul i protez son piti. Ou osi kapab les bann sigonny fer ou mazinen ki ou bezwen reste eveye pour konpran bann levennman ki pe arive dan nou letan.