Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer  |  No. 3 2016

 LO KOUVERTIR | KAN EN DIMOUN KI NOU KONTAN I MOR

Eski i mal pour dan dey?

Eski i mal pour dan dey?

Eski ou’n deza malad? Petet ou’n refer sitan vit ki ou’n fini oubliy sa leksperyans. An tou leka, sagrinasyon i pa koumsa. Dokter Alan Wolfelt in ekri dan son liv Healing a Spouse’s Grieving Heart ki sagrinasyon pa en keksoz ki nou kapab ‘oubliye’. Par kont, i ti azoute: “Avek letan e avek sipor lezot, ou sagrinasyon pou diminyen.”

Konman legzanp, annou vwar ki mannyer Abraam ti reazir letan son madanm ti mor. Labib i dir ki “Abraam ti konmans plere parski i ti dan en gran sagrinasyon akoz Sara.” Sa lekspresyon “ti konmans” i montre ki i ti pran en pe letan pour li fer fas avek son sagrinasyon. * En lot legzanp i Zakob ki ti ganny anbete pour krwar ki son garson Zozef ti’n ganny touye par en zannimo sovaz. Pour “plizyer zour,” i ti dan sagrinasyon e bann manm son fanmir pa ti kapab konsol li. Bokou lannen pli tar, lanmor Zozef ti ankor dan son lespri.Zenez 23:2; 37:34, 35; 42:36; 45:28.

Abraam ti dan dey akoz lanmor Sara ki i ti kontan

Ozordi, i ankor parey pour bokou ki dan dey akoz lanmor en dimoun ki zot ti vreman kontan. Annou vwar sa de legzanp swivan.

  • “Mon msye Robert ti mor le 9 Zilyet 2008. Sa bomaten ler sa aksidan fatal ti arive, ti parey tou lezot zour. Parey toultan apre brekfas avan i al travay, nou ti anmaye, anbrase e dir kanmarad: ‘Mon kontan ou.’ Si-z-an pli tar, sa douler dan mon leker i ankor la. Mon pa krwar ki mon pou zanmen arive oubliy Rob.”—Gail, aze 60 an.

  • “Menm si mon’n viv san mon madanm pour plis ki 18 an, mon ankor sagren e mank li. Sak fwa ki mon vwar en keksoz dan lanatir ki atiran, mon mazinen ki li osi i ti pou’n kontan pour vwar sa bann keksoz.”—Etienne, aze 84 an.

I kler ki sa kalite soufrans ek santiman ki dire pour en kantite letan i normal. Sak dimoun i fer fas avek son sagrinasyon dan son prop fason e i pa ti pou saz pour ziz lafason ki en dimoun i azir anver en maler. An menm tan, nou bezwen veye ki nou pa santi nou koupab si nou reaksyon i tro emosyonnel. Ki mannyer nou kapab fer fas avek sagrinasyon?

^ par. 4 Izaak, garson Abraam ti eksperyans en gran sagrinasyon. Parey nou kapab vwar dan sa lartik “Imit zot lafwa” ki enkli dan sa magazin, Izaak ti ankor dan sagrinasyon trwa-z-an apre lanmor son manman Sara.Zenez 24:67.