Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer  |  No. 1 2018

Bann konsey Labib i toultan saz

Bann konsey Labib i toultan saz

IMAZIN SA: Ou pe vizit en mize ki ranpli avek bann vye moniman. Laplipar sa bann moniman i annan bann trou ladan, zot in sanz kouler ek laform e i annan ki’n fele. Serten i mank bann gro bout ladan. Me i annan enn ki ou vwar ki pa’n ganny andomaze e ou ankor kapab vwar tou son bann pti detay. Ou demann ou gid: “Eski sa enn i pli nouvo ki lezot?” I reponn: “Non, i sa enn ki pli vye e i pa’n zanmen ganny rekonstri.” Aprezan ou demann li: “Eski i ti dan en landrwa kot i’n ganny byen proteze?” I reponn: “Non, sa enn in pas dan pli gro tanpet divan ek lapli e bokou dimoun in esey andomaz li.” Petet ou ti pou sirprann e demande, ‘Avek ki sa enn in ganny fer?’

Dan en sans, Labib i parey sa moniman ki pa’n ganny andomaze. I en vye liv e i pli vye ki laplipar liv. I vre ki i annan bann lezot vye liv. Me parey bann vye moniman, laplipar sa bann vye liv in ganny andomaze avek letan. Par egzanp, sa ki sa bann vye liv in dir lo lasyans i kont bann dekouvert ki’n ganny fer ozordi. Zot bann konsey medikal olye ede i paret danzere. Bokou bann vye liv nepli kapab ganny lir akoz zot in ganny andomaze oubyen bann bout i manke.

Me Labib i diferan. I ti konmans ganny ekrir plis ki 35 syek dan lepase. Menm si i’n sibir en kantite latak tou dilon bann syek, ki swa i’n ganny brile, ganny enterdi e dimoun in mank respe pour li, Labib pa’n ganny andomaze e nou ankor kapab lir li ozordi. Malgre Labib i en vye liv, son bann konsey i azour e i’n menm eksplik serten lenformasyon ki zonm pa ti ankor dekouver.​—Vwar sa bwat “Labib in eksplik serten lenformasyon ki zonm pa ti ankor dekouver.”

 BANN PRENSIP KI NOU BEZWEN OZORDI

Petet ou kapab pe mazinen, ‘Eski bann lansennyman Labib i vreman kapab ed nou ozordi?’ Pour reponn sa kestyon, demann ou lekor: ‘Ki bann pli gro problenm imen i fer fas avek ozordi? Lekel sa enn ki pli terib?’ Petet ou pe mazin lager, polisyon, krim oubyen koripsyon. Annou vwar serten prensip ki Labib i koz lo la. Anmezir ou fer sa demann ou lekor, ‘Si dimoun ti viv dapre sa bann prensip, eski later ti pou en pli bon landrwa pour viv?’

KONTAN LAPE

“Ere bann ki fer lape, parski zot pou ganny apele zanfan Bondye.” (Matye 5:9) “Fer tou sa ki depan lo zot pour viv anpe avek tou dimoun si i posib.”​—Romen 12:18.

PITYE E PARDON

“Ere bann ki pran pitye pour lezot, parski lezot pou pran pitye pour zot.” (Matye 5:7) “Kontinyen siport kanmarad e pardonn kanmarad volonterman menm si en dimoun i annan rezon pour konplent akoz en lot. Parey Zeova * in volonterman pardonn zot, zot osi zot devret fer parey.”​—Kolosyen 3:13.

LINITE PARMI TOU NASYON

“Bondye in servi en sel zonm pour fer tou nasyon ki reste lo later antye vin an egzistans.” (Akt 17:26) “Bondye pa fer lapreferans, me dan tou nasyon, sa ki annan en gran respe pour li e ki fer sa ki drwat i ganny son laprouvasyon.”​—Akt 10:34, 35.

PRAN SWEN AVEK LATER

“[Zeova] Bondye ti pran sa zonm e met li dan Zarden Edenn pour kiltiv li e pran swen avek li.” (Zenez 2:15) Bondye pou “detri bann ki pe detri later.”​—Revelasyon 11:18.

AY VORASITE EK IMORALITE SEKSYEL

“Gard zot lizye ouver e evit tou sort vorasite, parski menm ler en dimoun i annan en kantite keksoz, pa sa bann keksoz ki donn li lavi.” (Lik 12:15) “Imoralite seksyel, tou sort kalite lenpirte ek vorasite pa devret ni menm ganny mansyonnen parmi zot, parski sa pa merit ganny fer par en pep sen.”​—Efezyen 5:3.

LONNEKTE E TRAVAY DIR

“Nou anvi konport nou onnetman dan tou keksoz.” (Ebre 13:18) “Sa enn ki vole, i devret aret vole, plito i devret travay dir.”​—Efezyen 4:28.

ED BANN KI DAN BEZWEN

“Koz dan en fason ki pou konsol bann ki dan depresyon, siport bann ki feb, annan pasyans anver tou dimoun.” (1 Tesalonisyen 5:14) “Pran swen avek bann orfelen ek bann vev dan zot leprev.”​—Zak 1:27.

Labib pa zis donn en lalis sa bann prensip me i osi dir nou ki mannyer pour aplik zot dan nou lavi. Si plis dimoun ti aplik sa bann prensip ki nou’n mansyonnen, pa i ti pou annan mwens problenm ozordi? Sa i montre ki bann prensip Labib i toultan kapab ed nou. Me ki lefe bann lansennyman Labib i kapab annan lo ou ozordi?

 KI MANNYER SA KI LABIB I DIR I KAPAB BENEFISYE OU OZORDI?

Sa zonm pli saz ti dir: “Lasazes en dimoun i ganny rekonnet par son aksyon.” (Matye 11:19) Pa ou pou dakor ek sa? Sa ki ou fer i demontre si ou en dimoun saz. Alor ou kapab demann ou lekor: ‘Si Labib i vreman kapab ed nou, pa i devret annan en lefe lo mon lavi? Ki mannyer i kapab ed mwan dan bann problenm ki mon pe fer fas avek ozordi?’ Annou vwar en legzanp.

Delphine * ti en dimoun ki ti byen okipe e i ti vreman satisfe avek lafason ki i ti pe viv son lavi. En sel kou, i ti ganny en kantite problenm. Son fiy adolesan ti mor, son maryaz ti kase e i ti konmans ganny bann problenm finansyel. I rapel: “Mon ti’n perdi mon zanfan, mon msye ek mon lakaz e la mon ti nepli konnen ki mon ete. Mon ti santi ki mon pa vo nanryen e ki mon ti nepli annan en bi dan lavi.”

Delphine ti vwar ki sa bann parol dan sa verse Labib i vre. Sa verse i dir: “Nou lavi i dir zis pour 70 an, parfwa 80 an pour bann ki pli for; me nou konn zis traka ek lapenn; zot pas vit e nou anvole.”​—Psonm 90:10.

 Pandan sa bann moman difisil Delphine ti rod led dan Labib. I enkrwayab lefe ki Labib in annan dan son lavi. Parey sa trwa lartik ki swiv pou montre, bokou dimoun in vwar ki mannyer Labib in ed zot pour rezourd zot bann problenm ler zot in aplik son bann konsey. Zot in osi vwar ki Labib i parey sa moniman ki’n ganny dekrir o konmansman. Labib pa parey lezot liv ki’n vin vye e nepli itil. Eski sa i akoz i annan en keksoz pli spesyal avek Labib? Eski i akoz i annan panse Bondye e non pa sa ki pour zonm?​—1 Tesalonisyen 2:13.

Petet ou osi ou’n vwar ki lavi i kourt e ranpli avek problenm. Ler ou fer fas avek problenm, kote ou ale pour ganny rekonfor, sipor ek bann bon konsey?

Annou vwar trwa fason ki Labib i kapab donn nou bann konsey pratik. I kapab ed nou pour

  1. evit problenm ler i posib.

  2. rezourd bann problenm.

  3. reisi fer fas avek bann sityasyon ki nou pa kapab sanze.

Sa bann lartik ki swiv pour koz lo sak sa bann topik.

^ par. 10 Dapre Labib, Zeova i non Bondye.​—Psonm 83:18, NWT.

^ par. 24 Dan sa lartik e sa trwa ki swiv serten non in ganny sanze.