Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  July 2016

Rod Rwayonm e non pa bann keksoz

Rod Rwayonm e non pa bann keksoz

“Rod plito Rwayonm Bondye, e zot ava ganny tou sa bann keksoz osi.”LIK 12:31.

KANTIK: 40, 98

1. Ki diferans i annan ant sa ki nou bezwen ek sa ki nou anvi?

I ANNAN zis detrwa keksoz ki nou bezwen pour viv. Par egzanp, nou bezwen manze, lenz ek en landrwa reste. Me i pou toultan annan keksoz ki nou pou anvi. En kantite dimoun pa realize ki zot pa bezwen tou sa ki zot anvi.

2. Ki serten keksoz dimoun i anvi?

2 En dimoun ki viv dan en pei pov i kapab anvi en keksoz ki konpletman diferan avek en dimoun ki viv dan en pei ris. Dan serten parti lemonn, i kapab ki dimoun ti pou kontan annan en mobayl, en moter ouswa en bout later. Dan lezot landrwa, dimoun i kapab anvi en kantite lenz ser, en pli gran lakaz ouswa en transpor pli ser. Me, dan nenport ki landrwa nou reste oubyen nenport ki kantite larzan nou annan, nou kapab konmans anvi ankor plis keksoz ki nou pa bezwen oubyen ki nou napa ase larzan pour aste.

 MATERYALIZM I KAPAB AFEKTE NOU

3. Kisisa materyalizm?

3 Kisisa materyalizm? I en latitid ki en dimoun i annan, kot i konsantre plis lo bann keksoz ki lo son relasyon avek Bondye. I pa satisfe avek sa ki i bezwen, me o kontrer i oule touzour plis. Menm bann ki napa en kantite larzan oubyen ki pa aste bann keksoz ser, i kapab vin en dimoun materyalis. Sa bann dimoun koumsa i kapab aret met Rwayonm premye dan zot lavi.Ebre 13:5.

4. Ki mannyer Satan i servi sa ‘lanvi pour posed sa ki nou war’?

4 Satan i anvi fer nou krwar ki pour annan en lavi ere, nou bezwen annan en kantite keksoz. Alor, i servi son lemonn e ‘lanvi pour posed sa ki nou war’ pour esey fer nou anvi plis keksoz. (1 Zan 2:15-17; Zenez 3:6; Proverb 27:20) Nou pe toultan vwar e tann bann piblisite ki esey konvenk nou pour aste bann nouvo prodwi. Eski ou’n deza aste en keksoz akoz i ti paret atiran oubyen akoz ou ti vwar sa keksoz dan en piblisite? Si wi, petet pli tar ou ti realize ki ou pa ti bezwen sa keksoz. Ler nou kontinyen aste bann keksoz ki nou pa bezwen, nou konplik nou lavi. Sa bann keksoz i kapab anpes nou konsantre lo nou servis pour Zeova. Par egzanp, petet nou napa ase letan pour etidye Labib, partisip dan predikasyon, prepar e asiste renyon regilyerman. Alor, pa oubliy lavertisman ki zapot Zan ti donnen: “Lemonn ek tou son bann dezir pou disparet.”

5. Kwa ki kapab arive avek bann dimoun ki servi zot lenerzi pour ganny plis keksoz?

5 Satan i anvi ki nou servi nou lafors pour rod plis larzan ek keksoz dan plas servi Zeova. (Matye 6:24) Me si nou zis enterese pour ganny plis keksoz, nou lavi pa pou fer sans. Nou kapab fristre oubyen ganny bann problenm finansyel. Pli pir ankor, nou kapab perdi lafwa dan Zeova ek son Rwayonm. (1 Timote 6:9, 10; Revelasyon 3:17) Zezi ti dir ki “tou lezot dezir” i parey bann pikan ki anpes en lagrenn pouse e prodwir fri.Mark 4:14, 18, 19.

6. Ki leson nou aprann avek Barouk?

6 Mazin sa ki ti arive avek Barouk, sekreter profet Zeremi. Ler Barouk ti konmans “rod gran keksoz” pour li, Zeova ti rapel li ki byento Zerizalenm ti pou ganny detrir. Me i ti promet Barouk ki i ti pou sov son lavi. (Zeremi 45:1-5) Barouk pa ti devret ekspekte pour ganny plis ki sa. Zeova pa ti pou prezerv bann keksoz ki bann dimoun ti annan. (Zeremi 20:5) Ozordi, nou pros avek lafen sa lemonn Satan. Alor, la i pa letan pour rod bokou plis keksoz pour nou menm. Nou pa devret ekspekte ki apre gran ladetres, nou pou ankor annan nou  bann keksoz, menm si sa bann keksoz i annan gran valer pour nou.Proverb 11:4; Matye 24:21, 22; Lik 12:15.

La i pa letan pour kontinyen rod plis keksoz pour nou menm

7. Lo kwa nou pou diskite e akoz?

7 Alor, ki mannyer nou kapab pran swen avek nou menm, avek nou fanmir e an menm tan konsantre lo sa ki pli enportan dan lavi? Ki mannyer nou kapab evit materyalizm? Kwa ki kapab ed nou pour aret trakas tro bokou pour sa ki nou bezwen? Zezi in donn nou sa pli bon konsey dan son Sermon lo Montanny. (Matye 6:19-21) Annou lir e diskit Matye 6:25-34. Sa pou konvenk nou ki nou devret rod Rwayonm e non pa bann keksoz.Lik 12:31.

ZEOVA I DONN NOU SA KI NOU BEZWEN

8, 9. (a) Akoz nou pa devret trakas tro bokou pour bann keksoz ki nou bezwen? (b) Ki Zezi ti konnen konsernan bann imen e sa ki zot bezwen?

8 Lir Matye 6:25. Zezi ti konnen ki son bann disip ti trakas lo sa ki zot ti pou manze, bwar e lo sa ki zot ti pou mete, alor, i ti dir zot: “Pa trakase lo sa ki zot . . . bezwen pour viv.” Zezi ti anvi ed zot konpran akoz zot pa devret trakase pour sa bann keksoz. I ti konnen ki si zot trakas tro bokou, menm pour bann keksoz ki zot vreman bezwen, zot ti pou kapab oubliy sa ki pli enportan dan lavi. Zezi ti sitan kontan son bann disip ki i ti averti zot ankor kat fwa kont sa danze dan son sermon.Matye 6:27, 28, 31, 34.

Me, akoz Zezi ti dir nou ki nou pa devret trakase lo sa ki nou pou manze, bwar oubyen lo sa ki nou pou mete? Eski nou pa bezwen manze ek lenz? Byensir nou bezwen! Si nou napa ase larzan pour aste sa bann keksoz, i normal pour trakase. Zezi ti konn sa. I ti konnen ki dimoun i bezwen. I ti konnen ki dan “bann dernyen zour,” son bann disip ti pou viv dan bann letan vreman difisil. (2 Timote 3:1) Anfet, bokou dimoun ozordi pa kapab ganny en travay e bann keksoz i kontinyen vin pli ser. Dan plizyer landrwa, dimoun i vreman pov e zot napa preski nanryen ouswa napa ditou manze. Me Zezi ti osi konnen ki lavi en dimoun i pli enportan ki manze e lekor i pli enportan ki lenz.

Zezi ti dir ki lavi en dimoun i pli enportan ‘ki manze e lekor pli enportan ki lenz’

10. Ler Zezi ti ansenny son bann disip konman pour priye, kwa ki i ti dir i devret pli enportan dan zot lavi?

10 Pli boner, Zezi ti’n ansenny son bann disip ki ler zot priye, zot devret demann zot Papa ki dan lesyel pour donn zot sa ki zot bezwen. Zot ti kapab dir dan zot lapriyer: “Donn nou ozordi, nou dipen.” (Matye 6:11) En lot fwa, i ti dir zot pour priy koumsa: “Donn nou sak zour, dipen ki nou bezwen.” (Lik 11:3) Me sa i pa vedir ki nou devret toultan pe mazin lo bann  keksoz ki nou bezwen. Anfet, Zezi ti dir son bann disip ki priye pour ki Rwayonm Bondye i vini, i pli enportan ki priy pour zot bezwen. (Matye 6:10; Lik 11:2) Pour ed son bann disip aret trakase, Zezi ti rekonfort zot par rapel zot ki mannyer Zeova i pran swen avek tou son kreasyon.

11, 12. Ki nou aprann avek lafason ki Zeova i pran swen avek bann zwazo? (Vwar portre lo paz 3.)

11 Lir Matye 6:26. Nou devret “get byen bann zwazo.” Menm si zwazo i ptipti, zot manz en kantite. Anfet si en zwazo ti menm groser avek en zonm, i ti pou manz plis ki en zonm i manze. Bann zwazo i manz bann fri, legren, zensek ek lever. Me zot pa bezwen senm lagrenn e prodwir zot prop manze. Zeova i donn zot tou sa ki zot bezwen. (Psonm 147:9) Byensir, i pa met manze dan zot labek! Zot bezwen al rode zot menm, me zot toultan konnen kote sa manze i ete.

12 Zezi ti napa okenn dout ki si son Papa i pran swen avek bann zwazo, i pou osi pran swen avek bann imen. [1] (Vwar lezot not.) (1 Pyer 5:6, 7) Byensir, parey bann zwazo, nou pa devret pares. Pour nou ganny nou manze, nou bezwen swa kiltiv later ouswa rod en travay pour ganny ase larzan pour aste manze. Zeova i kapab beni nou zefor. Menm ler nou napa ase larzan oubyen manze, i ankor kapab donn nou sa ki nou bezwen. Par egzanp, lezot i kapab partaz sa ki zot annan avek nou. Zeova i osi donn bann zwazo en landrwa reste. I’n donn zot sa abilite pour fer nik e i’n fer bann keksoz ki zwazo i servi pour fer zot nik. Pareyman, Zeova i kapab ed nou ek nou fanmir ganny en landrwa reste.

13. Kwa ki montre nou vo plis ki bann zwazo?

13 Apre ki Zezi ti’n rapel son bann disip ki Zeova i donn manze bann zwazo, i ti demann zot: “Eski zot pa vo bokou plis ki bann zwazo?” (Konpar Lik 12:6, 7.) Ler i ti dir sa, i tre probab ki Zezi ti pe mazinen ki byento i ti pe al donn son lavi pour bann imen. Wi, Zezi pa ti mor pour bann zwazo ek lezot zannimo. I ti mor pour ki nou viv pour touzour.Matye 20:28.

14. Ki en dimoun ki trakase pa kapab fer?

14 Lir Matye 6:27. Ki Zezi ti oule dir ler i ti dir ki nou pa kapab viv pli lontan kan nou pran traka? I ti oule dir ki nou pa kapab viv pli lontan par trakas lo bann keksoz ki nou bezwen. Anfet, si nou tro strese, nou kapab tonm malad e menm mor.

15, 16. (a) Ki nou aprann avek lafason ki Zeova i pran swen avek bann lis dan laplenn? (Vwar portre lo paz 3.) (b) Ki bann kestyon nou kapab demann nou lekor e akoz?

15 Lir Matye 6:28-30. Nou kontan ler nou annan en zoli lenz pour mete, espesyalman ler nou pe al prese, asiste renyon ek bann lasanble. Me, eski nou bezwen “trakase lo size lenz”? Ankor enn fwa, Zezi ti rapel son bann disip lo ki mannyer Zeova i pran swen avek son bann kreasyon. I ti servi sa legzanp “bann lis dan laplenn.” Sa lekspresyon “bann lis” i kapab pe refer avek bann fler tel parey gladiolus, hyacinths, irises, ek tulips. Napa enn parmi sa bann fler  ki bezwen koud lenz pour zot menm. Me zot sitan zoli ki Zezi ti dir ki “ni menm Salomon dan tou son mazeste, pa ti osi byen abiye ki en sel sa bann lis”!

16 Mazin lo sa ki Zezi ti dir apre: “Bondye i abiy byen sa bann zerb dan laplenn . . . , Alor, a pli fort rezon, pa i ava abiy zot? Zot napa bokou lafwa.” Byensir i pou fer li! Me bann disip Zezi ti bezwen annan plis lafwa. (Matye 8:26; 14:31; 16:8; 17:20) Zot ti bezwen annan konfyans ki Zeova ti anvi pran swen avek zot e ki i ti pou definitivman fer li. Me nou? Eski nou krwar ki Zeova pou pran swen avek nou?

Eski nou krwar ki Zeova pou pran swen avek nou?

17. Kwa ki kapab gat nou relasyon avek Zeova?

17 Lir Matye 6:31, 32. Bann dimoun ki pa konn Zeova, i konsantre lo annan plis larzan ek keksoz dan zot lavi. Me si nou fer parey zot, nou pou gat nou relasyon avek li. Nou konnen ki Zeova i nou Papa e i kontan nou. Nou asire ki si nou fer sa ki i demann nou fer e met son Rwayonm premye dan nou lavi, i pou donn nou tou sa ki nou bezwen e plis ankor. Nou osi realize ki annan en bon relasyon avek Zeova pou fer nou vreman ere e sa pou ed nou pour satisfe avek “manze ek lenz” ki nou bezwen.1 Timote 6:6-8.

ESKI RWAYONM BONDYE I PREMYE DAN OU LAVI?

18. Ki Zeova i konnen konsernan nou endividyelman e ki i pou fer pour nou?

18 Lir Matye 6:33. Si nou met Rwayonm premye dan nou lavi, Zeova pou donn nou tou sa ki nou bezwen. Zezi ti eksplike akoz nou kapab asire ki sa promes ti pou vin vre. I ti dir: “Zot Papa ki dan lesyel i konn tou sa ki zot bezwen.” Zeova i konn sa ki ou bezwen menm avan ou realize ki ou bezwen sa keksoz. (Filipyen 4:19) I konnen ki lenz nou pou bezwen pli tar. I osi konnen ki manze ou pou bezwen. I konnen ki ou ek ou fanmir i bezwen en landrwa reste. Zeova pou fer sir ki ou ganny sa ki ou vreman bezwen.

19. Akoz nou pa devret trakase pour sa ki kapab arive dan lavenir?

19 Lir Matye 6:34. Ankor enn fwa Zezi ti dir son bann disip: “Pa trakase.” Zeova pou donn nou sa ki nou bezwen sak zour. Alor nou pa devret trakas tro bokou lo kwa ki kapab arive dan lavenir. Si nou fer sa, nou kapab konmans depan lo nou menm e sa pou gat nou relasyon avek Zeova. Alor, nou devret annan konfyans total dan li.Proverb 3:5, 6; Filipyen 4:6, 7.

ROD RWAYONM PREMYE E ZEOVA POU PRAN SWEN AVEK OU

Eski ou kapab senplifye ou lavi pour konsantre plis lo Rwayonm? (Vwar paragraf 20)

20. (a) Ki lobzektif ou kapab annan dan servis Zeova? (b) Ki ou kapab fer pour senplifye ou lavi?

20 I ti pou tris si nou ti napa ase lafors pour servi Zeova plennman akoz nou ti pe esey ganny ankor  plis keksoz! Anfet, nou devret donn Zeova nou meyer. Par egzanp, eski ou kapab al dan en kongregasyon ki bezwen plis proklanmater? Eski ou kapab fer pionye? Oubyen, si ou pe fer pionye, eski ou’n mazin lo fer ou laplikasyon pour Lekol pour bann Predikater Rwayonm? Eski petet ou kapab al ede kot Betel oubyen dan biro tradiksyon pour enn de zour par semenn? Oubyen, petet ou kapab vin en volonter pour travay dan konstriksyon kot ou pou kapab ede pour konstrir bann lasal Rwayonm. Mazin lo konman ou kapab senplifye ou lavi pour ki ou kapab annan plis letan ek lenerzi pour fer bann aktivite Rwayonm. I annan bann sizesyon dan sa bwat “ Fason pour senplifye ou lavi.” Demann Zeova ki ou bezwen fer dan lapriyer. Apre, konmans fer bann sanzman neseser.

21. Kwa ki pou ed nou vin pli pros avek Zeova?

 21 Zezi ti ansenny nou pour rod Rwayonm premye. Ler nou fer sa, nou pa trakas tro bokou lo bann keksoz ki nou bezwen. Nou vin pli pros avek Zeova akoz nou annan konfyans ki i pou pran swen avek nou. Nou aprann pour kontrol nou lekor pour pa aste tou sa ki nou anvi oubyen tou sa ki sa lemonn i ofer menm si nou annan ase larzan pour aste sa bann keksoz. Si nou senplifye nou lavi la konmela menm, sa pou ed nou reste fidel avek Zeova e nou pou ‘ganny sa vre lavi’ ki in promet nou.1 Timote 6:19.

^ [1] (paragraf 12) Par ler, serten serviter Zeova pa ganny ase manze. Pour konpran akoz Zeova i kapab permet sa arive, vwar “Kestyon lekter” dan Latour Veyer le 15 Septanm 2014 lo paz 22.