Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  July 2016

Akoz nou devret “kontinyen veye”?

Akoz nou devret “kontinyen veye”?

“Zot pa konnen ki zour zot Senyer pou vini.”MATYE 24:42.

KANTIK: 136, 129

1. Donn en legzanp ki montre akoz i enportan pour konnen ki ler i ete e sa ki pe arive otour nou. (Vwar portre an ler.)

LASANBLE ti pe al konmanse. Tyermenn ti mont lo lestrad e akey tou dimoun. Lanmizik ti pe al konmanse. Lodyans ti konnen ki i ti’n ler pour pran zot plas. Zot ti anvi ekout sa zoli lanmizik ek sa bann diskour ki ti pou ganny fer apre. Me, petet i ti annan serten ki pa ti pe port latansyon lo sa tyermenn oubyen zot pa ti okouran ki lanmizik ti pe zwe. Alor zot pa ti realize ki lasanble ti pe al konmanse e zot ti pe mars marse oubyen zot ti pe koz koze avek zot zanmi. Sa sityasyon i montre nou kwa ki kapab arive si nou pa realize ki ler i ete oubyen sa ki pe arive otour nou. Sa i en leson enportan pour nou, parski tre byento en pli gran levennman pou konmanse e nou bezwen pare pour li. Ki levennman nou pe koz lo la?

2. Akoz Zezi ti dir son bann disip “kontinyen veye”?

2 Zezi ti averti son bann disip lo sa nesesite pour reste eveye e met zot pare pour ‘lafen sa lemonn.’ I ti dir zot:  “Kontinyen veye, reste eveye, parski zot pa konnen kan ki sa letan fikse pou arive.” Apre sa, i ti dir zot plizyer fwa: “Kontinyen veye.” (Matye 24:3; lir Mark 13:32-37, NW.) [1] (Vwar lezot not.) Liv Matye i osi fer resorti ki Zezi ti averti son bann disip lo sa size. I ti dir zot: “Kontinyen veye, akoz zot pa konnen ki zour zot Senyer pe vini.” I ti averti zot ankor enn fwa: “Zot osi fer sir zot in pare, parski Garson zonm pe vini en ler ki zot pa pe ekspekte.” Apre i ti repete: “Alor, kontinyen veye akoz zot pa konn ni zour ni ler.”Matye 24:42-44; 25:13NW.

3. Akoz nou ekout lavertisman Zezi?

3 Temwen Zeova i ekout sa lavertisman ki Zezi in donnen. Nou konnen ki nou pe viv dan “letan lafen” e ki “gran ladetres” pou konmanse byento! (Danyel 12:4; Matye 24:21, NW) Zis parey Zezi ti predir, pep Zeova pe anons sa bon nouvel Rwayonm partou lo later. An menm tan, nou pe vwar bann lager, maladi, tranblemandter ek lafamin dan plizyer landrwa. I annan bann konfizyon dan bann larelizyon e i annan plis krim ek vyolans ki oparavan. (Matye 24:7, 11, 12, 14; Lik 21:11) Nou pe esper avek enpasyans sa letan kot Zezi pou vin akonplir plan son Papa.Mark 13:26, 27.

SA ZOUR PE APROSE!

4. (a) Akoz nou kapab krwar ki Zezi i konnen kan Armagedon pou konmanse? (b) Kwa ki nou asire pou arive menm si nou pa konnen kan gran ladetres pou konmanse?

4 Ler nou al lasanble, nou konnen ki ler sak sesyon i konmanse. Par kont, i enposib pour konnen kan egzakteman gran ladetres pou konmanse. Ler Zezi ti lo later i ti dir: “Konsernan sa zour e sa ler, kan i pou arive, personn pa konnen, ni menm bann lanz, ni menm Garson Bondye. Zis Papa ki konnen.” (Matye 24:36) Byensir, vi ki Zezi ki pou komandan lager Armagedon, i tre probab ki aprezan i konnen kan sa lager pou konmanse. (Revelasyon 19:11-16) Me nou, nou pa konnen ki dat e ki ler lafen pou arive. I pour sa rezon ki i enportan pour nou kontinyen veye. Zeova in fini deside kan egzakteman gran ladetres pou konmanse e sak zour i pe vin pli pros. “I pa pou an retar!” (Lir Abakouk 2:1-3, NW) [2] (Vwar lezot not.) Akoz nou asire ki sa pou arive?

Zeova in fini deside kan egzakteman gran ladetres pou konmanse

5. Donn en legzanp ki montre ki bann profesi Zeova i ganny akonplir zis a tan.

5 Bann profesi Zeova in toultan ganny akonplir zis a tan! Par egzanp, mazin sa zour ki i ti liber son pep Lezip. Sa ti le 14 Nizan lannen 1513 avan Kris. Pli tar, Moiz ti ekri konsernan sa zour: “Apre sa 430 an, zour pour zour, pep [Zeova] antye ti kit Lezip.” (Egzod 12:40-42) Le 14 Nizan 1943 avan Kris, egzakteman 430 an avan ki bann Izraelit ti ganny libere, promes ki Zeova ti fer pour beni desandans  Abraam ti pran lefe. (Galat 3:17, 18) En pe letan pli tar, Zeova ti dir Abraam: “Mon oule fer ou konnen ki ou bann desandan pou reste dan en pei etranze ki pa pour zot. Zot pou vin lesklav laba e ganny martirize pandan 400 an.” (Zenez 15:13; Akt 7:6) Sa 400 an ti konmans lannen 1913 avan Kris ler Yismael ti konmans mal azir avek Izaak e i ti terminen zour Zeova ti liber bann Izraelit Lezip. (Zenez 21:8-10; Galat 4:22-29) Wi, plizyer santenn lannen davans, Zeova ti’n fikse sa zour egzakt kan i ti pou liber son pep!

6. Akoz nou kapab asire ki Zeova pou delivre son pep?

6 Zozye ti enn parmi bann Izraelit ki ti ganny libere Lezip. Plizyer lannen pli tar, Zozye ti rapel pep Izrael: “Zot konnen avek tou zot leker, avek tou zot et antye, ki okenn sa bann parol ki [Zeova], zot Bondye ti prononse lo zot size pa’n reste san ganny akonpli; tou in realize lo zot; napa enn ki pa’n ganny akonpli.” (Zozye 23:2, 14) Zeova in promet pour delivre son pep pandan gran ladetres e i pou donn zot lavi eternel dan lemonn nouvo. Nou kapab asire ki son promes pou vin vre. Alor, si nou anvi antre dan sa nouvo lemonn, nou devret kontinyen veye.

KONTINYEN VEYE POUR KI OU KAPAB SIRVIV

7, 8. (a) Ki bann gardyen ti fer dan letan lontan e ki leson nou kapab aprann avek zot? (b) Donn en legzanp ki montre kwa ki kapab arive ler bann gardyen i tonm dormi.

7 Nou kapab aprann en leson avek bann gardyen ki ti vey bann lavil dan letan lontan. Plizyer sa bann lavil, enkli Zerizalenm, ti annan bann miray o tour pour ki bann lennmi pa kapab antre dan lavil. Ler bann gardyen ti debout lo sa bann miray zot ti kapab vwar partou an deor lavil. I ti osi annan bann gardyen ki debout kot bann baro lavil. Sa bann zonm ti bezwen kontinyen veye lizour konman aswar e si zot ti vwar bann lennmi pe vini, zot ti averti bann dimoun dan sa lavil. (Izai 62:6) Zot ti konnen ki i ti enportan reste eveye e vey byen tou sa ki ti pe pase. Si zot pa ti fer sa, en kantite dimoun ti kapab perdi zot lavi.Ezekyel 33:6.

8 Josephus ki ti ekri listwar bann Zwif, ti eksplike ki mannyer bann Romen ti kapab antre Zerizalenm lannen 70 apre Kris. Bann gardyen ki ti vey en parti sa lavil ti’n tonm dormi. Sa ti fer ki bann Romen ti kapab antre Zerizalenm. Zot ti bril tanp e detri leres sa lavil. Sa ti parti final sa pli gran ladetres ki nasyon Zwif ti sibir.

9. Kwa ki laplipar dimoun pa okouran?

9 Laplipar bann gouvernman i annan bann solda ki vey lafrontyer zot pei. Zot osi annan bann sistenm sekirite ki servi bann dernyen teknolozi. Sa bann gouvernman i veye si napa okenn dimoun oubyen okenn keksoz ki kapab menas sekirite zot pei. Me zot pa okouran ki i annan en gouvernman pli pwisan ki dan lesyel e ki pe ganny dirize par Zezi Kri. Sa gouvernman pou byento deklar lager avek tou sa gouvernman ki lo later. (Izai 9:6, 7, not dan NW; 56:10; Danyel 2:44) Nou pe  esper sa zour avek enpasyans e nou anvi ki nou pare pour li. Alor, annou port latansyon lo profesi ki dan Labib e kontinyen servi Zeova.Psonm 130:6.

RESTE EVEYE

10, 11. (a) Lo kwa nou devret fer atansyon e akoz? (b) Kwa ki konvenk ou ki Dyab in enfliyans bann dimoun pour zot pa krwar dan profesi Labib?

10 Imazin en gardyen ki pa’n dormi tou lannwit. Pandan sa detrwa dernyen erdtan son kar, i pli difisil pour li reste eveye parski i byen fatige. Pareyman, nou pe viv pandan sa bann dernyen zour sa lemonn. Pli nou vin pli pros avek lafen, pli i difisil pour reste eveye. Pa i ti pou domaz si nou pa kontinyen veye! Annou diskit lo trwa keksoz ki kapab anpes nou reste eveye.

11 Dyab i anbet dimoun. I “sef lemonn.” Pa bokou letan avan ki Zezi ti mor, trwa fwa i ti rapel son bann disip ki Dyab ki gouvern lemonn. (Zan 12:31; 14:30; 16:11) Dyab in servi fo larelizyon pour anbet dimoun. Pour sa rezon, ozordi bokou dimoun pa krwar dan bann profesi Labib ki montre klerman ki lafen sa lemonn i vreman pros. (Tsefanya 1:14) I kler ki Satan in “avegle lespri sa bann dimoun ki pa krwar dan Bondye.” (2 Korentyen 4:3-6, NW) Alor, ler nou esey dir bann dimoun ki lafen sa lemonn i pros e ki Kris i aprezan pe dirize, laplipar zot pa ekoute. Souvan zot dir: “Mon pa enterese.”

12. Akoz nou pa devret les Dyab anbet nou?

12 Menm si i annan bokou dimoun ki pa enterese avek bann profesi Labib, nou pa devret les zot latitid fer nou dekouraze. Nou konnen akoz i enportan pour kontinyen veye. Pol ti dir son bann frer: ‘Zot konnen zot menm ki zour [Zeova] pou arive.’ I ti osi dir: “Koman en voler dan lannwit.” (Lir 1 Tesalonisyen 5:1-6.) Zezi ti averti nou pour: “Touzour pare, akoz Fis-de-Lonm pou vin en ler ki zot pa pe mazinen.” (Lik 12:39, 40) Byento, Satan  pou fer dimoun krwar ki “tou i an-pe e an sekirite” dan lemonn. Zot pou soke ler en sel kou zour Zeova i arive. Me nou? Si nou anvi ki nou pare pour sa zour e ki nou pa ganny anbete parey lezot, nou bezwen “reste vizilan [oubyen “eveye,” NW] e avek en lespri kler.” I pour sa rezon ki nou devret lir Parol Bondye toulezour e medit lo sa ki Zeova i dir nou.

13. Ki mannyer lespri sa lemonn pe afekte limanite e ki mannyer nou kapab evit son lenfliyans danzere?

13 Lespri sa lemonn i enfliyans fason panse bann dimoun. Bokou dimoun ozordi i santi ki zot pa bezwen konn Bondye. (Matye 5:3, NW) Plito, zot servi laplipar zot letan ek lenerzi pour ganny en kantite keksoz ki sa lemonn pe ofer. (1 Zan 2:16) Ozordi, plis ki oparavan, i osi annan en kantite divertisman ki atir bann dimoun. Sa bann divertisman i osi ankouraz zot pour kontan plezir e pour satisfer nenport ki dezir ki zot annan. (2 Timote 3:4) Sa bann keksoz i anpes dimoun konsantre lo sa ki pli enportan e zot pa mazin lo zot relasyon avek Bondye. Pour sa rezon Pol ti rapel bann Kretyen pour “reveye dan zot sonmey” par aret konsantre lo zis satisfer zot bann dezir dan zot lavi.Romen 13:11-14.

Nou anvi ki lespri sen Bondye i enfliyans nou fason panse e non pa lespri sa lemonn

14. Ki lavertisman Lik 21:34, 35 i donnen?

14 Nou anvi ki lespri sen Bondye i enfliyans nou fason panse me non pa lespri sa lemonn. Par mwayen son lespri, Zeova in ed nou konpran klerman kwa ki pe al arive. (1 Korentyen 2:12) [3] (Vwar lezot not.) Me nou bezwen fer atansyon. Menm bann senp pti keksoz i kapab fer nou aret konsantre lo servi Zeova. (Lir Lik 21:34, 35.) Lezot i kapab dir nou ki nou bann enbesil pour krwar ki nou pe viv dan bann dernyen zour sa lemonn. (2 Pyer 3:3-7) Me nou pa devret les zot dekouraz nou. Nou annan laprev kler ki lafen pou arive byento. Si nou anvi ki lespri sen Bondye i enfliyans nou, nou devret regilyerman asiste bann renyon avek nou bann frer ek ser.

Eski ou pe fer tou sa ki ou kapab pour “kontinyen veye”? (Vwar paragraf 11-16)

15. Ki ti arive avek Pyer, Zak ek Zan e ki mannyer sa i kapab ariv avek nou osi?

15 Nou bann febles i fer li pli difisil pour reste eveye. Zezi ti konpran ki bann imen i enparfe e zot annan bann febles. Mazin sa zour swar avan i ti mor. Menm si Zezi ti parfe, i ti konnen ki pour reste fidel, i ti bezwen demann led avek son Papa dan lapriyer. Zezi ti demann zapot Pyer, Zak ek Zan pour reste eveye ler i ti pe priye. Me sa bann zapot pa ti realize ki i ti enportan pour zot reste eveye. Zot ti fatige e zot ti tonm dormi. Zezi osi ti fatige, me i ti reste eveye e i ti priy son Papa. A sa moman, bann zapot osi ti devret pe priye.Mark 14:32-41.

16. Dapre Lik 21:36, ki mannyer Zezi ti montre nou ki mannyer pour “reste eveye”?

 16 Kwa ki pou ed nou “reste eveye” e met pare pour zour Zeova? Nou devret determinen pour kontinyen fer sa ki byen. Me sa i pa ase. En pti pe letan avan Zezi ti mor, i ti dir son bann disip ki zot bezwen kontinyen demann Zeova led dan lapriyer. (Lir Lik 21:36.) Pour kapab reste eveye dan sa bann dernyen zour, nou osi nou devret toultan priy Zeova.1 Pyer 4:7.

KONTINYEN VEYE

17. Ki mannyer nou kapab fer sir ki nou pare pour sa ki pe vini tre byento?

17 Zezi ti dir ki lafen pou vini “ler ki zot pa pe mazinen.” (Matye 24:44) Alor nou devret pare toultan. La i pa letan pour esey annan en stil lavi ki sa lemonn Satan i dir pou fer nou ere. Sa i zis en rev. O kontrer, nou devret kontinyen veye parey Zeova ek Zezi in montre nou dan Labib. Alor, annou port latansyon lo ki mannyer bann profesi Labib pe ganny akonplir. Ki nou kontinyen vin pli pros avek Zeova e met son Rwayonm premye dan nou lavi. Alor, nou pou pare ler lafen i vini. (Revelasyon 22:20) Nou lavi i depan lo la!

^ [1] (paragraf 2) Mark 13:32-37 (NW): 32 Konsernan sa zour ouswa sa ler, personn pa konnen kan i pou arive, ni bann lanz dan lesyel, ni Garson, me zis Papa ki konnen. 33 Kontinyen veye, reste eveye, parski zot pa konnen kan ki sa letan fikse pou arive. 34 I parey en zonm ki pe al en vwayaz aletranze, ki kit son lakaz e donn lotorite son bann lesklav, sakenn son louvraz e donn lord gardyen pour kontinyen veye. 35 Alor, kontinyen veye, parski zot pa konnen kan ki met lakour pe vini, ki swa tar pandan lazournen, minwi, granmaten ouswa boner dan bomaten, 36 pour ki ler i vini en sel kou i pa zwenn zot pe dormi. 37 Me sa ki mon dir zot, mon dir tou dimoun: Kontinyen veye.”

^ [2] (paragraf 4) Abakouk 2:1-3 (NW): 1 Mon pou kontinyen reste lo mon stasyon e mon pou kontinyen debout lo miray. Mon pou kontinyen veye pour vwar ki i anvi mon dir. Ki mon pou reponn ler mon ganny reprimande. 2 Apre Zeova ti dir mwan: ‘Ekrir sa vizyon, ekrir li klerman lo bann plak, pour ki sa enn ki lir li for, i kapab fer li fasilman. 3 Parski sa vizyon i pour letan fikse e i kontinyen depese ziska lafen e i pa pou en mansonz. Menm si i devret tarde, kontinyen esper li, sirman i pou arive. I pa pou an retar.’”

^ [3] (paragraf 14) Vwar sapit 21 dan liv Rwayonm Bondye pe dirize!