Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  June 2016

Sa zonm avek sa po lank ki en sekreter i servi, i reprezant Zezi Kri. I sa enn ki mark bann ki pou sirviv

Kestyon lekter

Kestyon lekter

Dan sa vizyon ki Ezekyel ti gannyen, ki sa zonm ki ti annan en po lank ki en sekreter i servi ek sa sis zonm ki ti annan zarm pour masakre i reprezante?

Zot reprezant bann larme dan lesyel ki ti responsab pour detri Zerizalenm e ki pou osi detri sa move lemonn Satan dan lager Armagedon. Sa i en nouvo leksplikasyon. Akoz sa ti neseser?

Avan 607 A.N.L., Zeova ti fer Ezekyel ganny en vizyon lo sa ki ti pou arive Zerizalenm avan i ti ganny detrir. Dan sa vizyon, Ezekyel ti vwar en kantite move keksoz ki ti pe arive Zerizalenm. Apre i ti vwar sis zonm e sakenn ti annan en “zarm pour masakre dan son lanmen.” I ti osi annan en zonm ki ti “dan lenz linenn” e ki ti annan en “po lank ki sekreter ti servi, NW.” (Ezekyel 8:6-12; 9:2, 3) Sa zonm ti ganny dir pour al partou dan lavil “e met en mark lo fron bann ki pe plennyen e plere akoz bann aksyon degoutan ki ganny komet dan sa lavil.” Apre, sa sis zonm ti ganny dir pour touy tou bann ki ti napa sa mark. (Ezekyel 9:4-7) Ki nou kapab aprann avek sa vizyon e lekel sa zonm ki ti annan en po lank ki sekreter ti servi?

Ezekyel ti ganny sa vizyon 612 A.N.L. I ti en profesi ki ti annan en premye lakonplisman senk an pli tar ler Zeova ti permet larme Babilonnyen detri Zerizalenm. Dan sa fason, Zeova ti servi bann Babilonnyen pour pini son pep  dezobeisan. (Zeremi 25:9, 15-18) Me ki ti arive avek sa bann Zwif ki pa ti dakor avek tou sa move keksoz ki ti pe arive dan sa lavil? Zeova ti fer sir ki zot ti ganny sove.

Dan sa vizyon, Ezekyel pa ti literalman met okenn mark lo personn oubyen donn lanmen detri sa lavil. O kontrer, bann lanz ki ti annan kontrol lo destriksyon Zerizalenm. Alor, sa profesi i donn nou sa loportinite pour vwar ki ti pe arive dan lesyel. Zeova ti dir son bann lanz pour organiz destriksyon bann move dimoun e pour fer sir ki bann dimoun drwat i ganny sove. *

Sa profesi pou osi ganny akonplir dan lavenir. Dan le pase, nou ti dir ki sa zonm ki ti annan en po lank ti reprezant bann Kretyen swazir ki ankor lo later. Nou ti osi dir ki sa bann dimoun ki ti pe ganny marke pour sirviv ti bann dimoun ki ti ekout e aksepte sa mesaz ki nou pe anonse. Me tou resaman, i ti kler ki nou ti bezwen sanz lafason ki nou eksplik sa profesi. Dan Matye 25:31-33, nou’n aprann ki Zezi ti sa enn ki ziz bann dimoun. I pou fer sa dan lavenir pandan gran ladetres. Sa letan, bann ki ganny zize konman mouton pou sirviv e bann konman kabri pou ganny detrir.

Alor, ki nou aprann avek vizyon Ezekyel? I annan senk leson:

  1.  Avan ki Zerizalenm ti ganny detrir, Ezekyel, Zeremi ek Izai ti averti bann dimoun ki ti pou arive avek sa lavil. Zot ti parey bann veyer. Ozordi, Zeova i servi en pti group Kretyen Swazir pour ansenny son pep e averti lezot avan gran ladetres i konmanse. Anfet, tou pep Bondye, setadir, bann domestik Kris, zot osi zot averti lezot.Matye 24:45-47NW.

  2.  Ezekyel, pa ti mark bann ki ti pou sirviv. Ozordi, pep Bondye osi pa fer sa. Zot zis pres avek lezot e averti zot lo sa ki pou arive dan lavenir. Zot fer sa avek led bann lanz.Revelasyon 14:6.

  3.  Bann ki ti ganny sove dan letan Ezekyel, ti napa en mark lo zot fron. Ozordi, bann ki pou ganny sove, zot osi zot pou napa en mark lo zot fron. Ki dimoun i devret fer pour sirviv gran ladetres? Ler zot ganny averti, zot bezwen aprann imit Kris, dedye zot lavi avek Bondye e siport bann frer Kris par anons sa bon nouvel. (Matye 25:35-40) Pandan gran ladetres, zot pou ganny sa mark, savedir, zot pou ganny swazir pour sirviv.

  4.  Sa zonm avek sa po lank i reprezant Zezi. Pandan gran ladetres, Zezi pou mark sa gran lafoul ler i ziz zot konman mouton. Apre, zot pou annan sa loportinite pour viv pour touzour lo later.Matye 25:34, 46. *

  5.  Ozordi sa sis zonm avek zarm pour masakre, i reprezant sa larme lesyel, dirize par Zezi. Byento zot pou detri bann nasyon e met en lafen avek tou bann move keksoz.Ezekyel 10:2, 6, 7; Revelasyon 19:11-21.

Sa bann leson ki nou aprann avek sa vizyon i ed nou pour annan konfyans ki Zeova pa pou detri bann ki drwat ansanm avek bann ki move. (2 Pyer 2:9; 3:9) Sa bann leson i osi rapel nou ki predikasyon i enportan dan nou letan. Tou dimoun i bezwen ganny averti avan lafen i arive!Matye 24:14.

^ par. 6 Bann ki ti ganny sove, parey Barouk (sekreter Zeremi), Ebed-melek sa Etyopyen ek bann Rekabit ti napa en mark aktyel lo zot fron. (Zeremi 35:1-19; 39:15-18; 45:1-5) Sa mark senbolik i zis vedir ki sa bann dimoun ti pou sirviv.

^ par. 12 Bann Kretyen swazir fidel pa pou bezwen ganny sa mark pour sirviv. Me, zot pou ganny zot sele final swa avan zot mor ouswa avan gran ladetres i konmanse.Revelasyon 7:1, 3.