Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  June 2016

En kalite ki Bondye i annan ki pli presye ki dyanman

En kalite ki Bondye i annan ki pli presye ki dyanman

Dimoun i vwar bann dyanman konman bann pyer vreman presye. Serten i vo plizyer milyon dolar. Me eski i annan en keksoz ki Bondye i vwar konman pli presye ki dyanman oubyen lezot pyer presye?

 Haykanush, en proklanmater non batize Larmeni, ti anmas en paspor pa tro lwen kot i ti pe reste. Dan sa paspor ti annan detrwa kart labank ek en kantite larzan. I ti dir son msye, ki ti osi en proklanmater non batize ki i ti’n anmas sa paspor.

Sa koup ti annan bann gro problenm finansyel e zot ti annan det. Me zot ti deside anmenn sa larzan kot sa ladres ki ti lo sa paspor. Sa msye ek son fanmir ti sirprann ler sa koup ti retourn avek sa paspor. Haykanush ek son msye ti eksplike ki zot ti onnet akoz sa ki zot ti pe aprann dan Labib. Apre zot ti servi sa loportinite pour koz lo Temwen Zeova e donn detrwa piblikasyon sa fanmir.

Sa fanmir ti anvi donn Haykanush en pe larzan konman en rekonpans, me zot ti refize pran. Son landmen, madanm sa msye ti vin vizit Haykanush ek son msye kot zot lakour pour remersye zot pour sa ki zot ti’n fer. I ti ensiste ki Haykanush i aksepte en bag ki annan dyanman lo la.

Parey sa fanmir, bokou dimoun pou sirprann avek lonnekte Haykanush ek son msye. Me eski Zeova ti sirprann? Ki mannyer i ti vwar zot lonnekte? Eski ti vo lapenn zot lonnekte?

BANN KALITE KI PLI PRESYE KI BANN KEKSOZ MATERYEL

Larepons sa bann kestyon pa difisil pour konnen. Akoz? Parski bann serviter Bondye i konnen ki imit bann kalite Zeova i pli presye pour li ki dyanman, lor oubyen lezot keksoz materyel. Wi, sa ki Zeova i vwar i annan valer i diferan avek sa ki annan valer pour laplipar dimoun. (Izai 55:8, 9) Son bann serviter i santi ki zot zefor pour imit bann kalite Zeova i vreman presye.

Nou kapab konpran sa par sa ki Labib i dir lo disernman ek lasazes. Proverb 3:13-15 i dir: “I byennere sa enn ki’n trouv lasazes, sa enn ki’n ganny disernman, akoz lasazes i raport plis ki larzan e i donn plis ki lor. I pli presye ki okenn perl; napa nanryen pli dezirab ki li.” I kler, ki sa bann kalite i annan en pli gran valer pour Zeova ki okenn trezor materyel.

Ki nou pou dir lo lonnekte?

Zeova li menm i onnet. I “pa zanmen manti.” (Tit 1:2) I ti enspir zapot Pol pour ekri bann Kretyen Ebre dan premye syek: “Kontinyen priy pour nou, parski nou annan konfyans ki nou annan en bon konsyans e nou anvi konport nou onnetman dan tou keksoz.”Ebre 13:18NW.

Zezi in kit en bon legzanp lo lonnekte. Par egzanp, ler Granpret Kaif ti dir, “Lo non Bondye vivan, mon demann ou, dir nou si ou menm Mesi, Garson Bondye” Zezi ti onnet e i ti idantifye son lekor konman Mesi. I ti dir laverite menm si i ti konnen ki Sannedren ti kapab akiz li pour blasfenm e ki sa ti pou kapab fer li ganny egzekite.Matye 26:63-67.

Me nou? Si nou pa dir laverite oubyen sanz serten lenformasyon pour nou ganny bann keksoz materyel, eski nou pe montre ki nou onnet?

I PA FASIL POUR ONNET

I kapab difisil pour onnet dan sa bann dernyen zour kot bokou dimoun i ‘egois  e kontan larzan.’ (2 Timote 3:2) Ler i annan en kriz ekonomik oubyen ler i difisil pour ganny en louvraz, bokou dimoun i vwar li normal pour vole, fer frod oubyen fer lezot keksoz dezonnet. Sa kalite rezonnman i sitan popiler ki serten i mazinen ki sel fason ki zot kapab benefisye i par fer bann keksoz dezonnet. Pour ganny bann “gen malonnet” serten Kretyen in fer bann move desizyon e zot in perdi zot bon repitasyon dan kongregasyon.1 Timote 3:8; Tit 1:7.

Par kont, laplipar Kretyen i imit Zezi. Zot realize ki devlop bann kalite ki Bondye i annan, i pli enportan ki okenn larises oubyen benefis. Sanmenm bann zenn Kretyen pa fer trik pour ganny bann bon rezilta lekol. (Proverb 20:23) Pa toultan ki nou ganny en rekonpans ler nou onnet parey Haykanush. Kantmenm sa, Bondye i dir ki i byen si nou onnet parski sa i  permet nou pour annan en bon konsyans e sa i en keksoz ki annan en gran valer.

Legzanp Gagik i montre sa klerman. I dir: “Avan mon vin en Kretyen, mon ti pe travay pour en gran lakonpannyen, sef sa lakonpannyen pa ti deklar tou profi ki i ti pe fer pour li pa pey taks. Vi ki mon ti direkter, sef sa lakonpannyen ti ekspekte ki mon donn gous sa zofisye taks pour ki i dakor pour pa dir ki sa lakonpannyen pe fer frod. Sa ti fer ki mon ti ganny sa repitasyon konman en dimoun dezonnet. Ler mon ti konn laverite mon ti kit sa travay, menm si sa travay ti pey byen. Apre sa, mon ti ouver mon prop biznes. Depi premye zour, mon ti anrezistre mon lakonpannyen legalman e pey tou mon taks.”2 Korentyen 8:21.

Gagik i dir: “Mon ti ganny lanmwatye sa larzan ki mon ti pe gannyen avan, alor i ti difisil pour pran swen avek mon fanmir. Par kont, mon pli ere ozordi. Mon annan en bon konsyans devan Zeova. Mon en bon legzanp pour mon de garson e mon’n kalifye pour ganny serten privilez dan kongregasyon. Parmi bann oditer taks ek lezot ki mon fer biznes avek, aprezan mon annan repitasyon konman en dimoun onnet.”

ZEOVA I ED NOU

Zeova i kontan bann ki loue li par imit son bann zoli kalite enkli lonnekte. (Tit 2:10) Ler nou fer sa, i promet pour ed nou. I ti enspir Lerwa David pour dir: “Mon ti zenn, ozordi mon’n vye. Zanmen mon’n war en dimoun zis ganny abandonnen, ni son bann zanfan pe mandyan manze.”Psonm 37:25.

Leksperyans Rit en serviter fidel i montre sa. I ti fidelman reste avek son belmer, Naomi dan plas kit li akoz i ti vye. Rit ti al Izrael kot i ti pou kapab ador sa vre Bondye. (Rit 1:16, 17) I ti onnet e travay dir pour anmas sa ki reste apre rekolt, dapre Lalwa konsernan bann pov. Parey sa ki David ti eksperyanse, Zeova pa ti zanmen abandonn Rit ek Naomi. (Rit 2:2-18) I ti osi fer bokou plis ki zis donn Rit keksoz materyel. I ti swazir li pour form parti laliny desandans Lerwa David e menm sa Mesi promiz.Rit 4:13-17; Matye 1:5, 16.

I kapab difisil pour serten serviter Zeova ganny ase larzan pour zot bezwen de baz. Pourtan, dan plas esey rod en solisyon fasil e dezonnet, zot kontan travay dir e byen. Ler zot fer sa, zot montre ki bann zoli kalite Bondye, enkli lonnekte i annan plis valer pour zot ki okenn keksoz materyel.Proverb 12:24; Efezyen 4:28.

Parey Rit, bann Kretyen partou dan lemonn i annan konfyans ki Zeova i annan sa kapasite pour ed zot. Zot annan lafwa dan sa Enn ki ti promet: “Mon pa pou zanmen negliz ou, mon pa pou zanmen abandonn ou.” (Ebre 13:5) Plizyer fwa, Zeova in montre ki i kapab e i pou ed bann ki toultan onnet. I’n toultan gard son promes pour donn son bann serviter sa ki neseser.Matye 6:33.

I vre ki dyanman e lezot keksoz materyel i annan en gran valer pour bann imen. Me, nou kapab asire ki nou lonnekte ek lezot bon kalite i annan bokou plis valer pour nou Papa dan lesyel ki sa bann pyer presye.

Ler nou onnet e nou annan en konsyans kler, nou pli byen kapab koz avek bann dimoun ki nou zwenn dan predikasyon