Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  Zanvye 2018

Akoz nou devret donn avek sa Enn ki annan tou keksoz?

Akoz nou devret donn avek sa Enn ki annan tou keksoz?

“Nou Bondye, nou remersye ou e nou rann glwar ou gran non.”​—1 KRONIK 29:13.

KANTIK: 80, 50

1, 2. Ki mannyer Zeova i zenere anver nou?

ZEOVA i en Bondye zenere. Tou sa ki nou annan i sorti kot li. Tou keksoz presye ki lo later i pour li e i servi sa bann keksoz pour donn nou sa ki nou bezwen pour viv. (Psonm 104:13-15; Agai 2:8) Dan Labib, nou aprann ki par ler Zeova ti servi sa bann keksoz presye dan en fason mirakile pour donn son pep sa ki zot bezwen.

2 Par egzanp, ler nasyon Izrael ti dan dezer pour 40 an, Zeova ti donn zot lamann ek delo. (Egzod 16:35) Alor, zot ti annan tou sa ki zot ti bezwen. (Neemya 9:20, 21) Plizyer lannen pli tar, Zeova ti donn Elisa pouvwar pour ogmant en ptigin delwil ki en vev fidel ti annan. Sa kado sorti kot Bondye ti ed sa vev pour pey son bann det e sa larzan ki ti reste ti ase pour li ek son garson viv lo la. (2 Lerwa 4:1-7) Avek sipor Zeova, Zezi ti kapab fer mirak pour donn manze ek larzan kan i ti neseser.​—Matye 15:35-38; 17:27.

3. Ki nou pou diskite dan sa lartik?

 3 Zeova i kapab servi nenport keksoz ki i swazir pour siport son kreasyon. Toudmenm, i envit son bann serviter pour donn sa ki zot zot kapab pour siport travay son lorganizasyon. (Egzod 36:3-7; lir Proverb 3:9, NWT.) * (Vwar not.) Akoz Zeova i ekspekte ki nou servi nou bann keksoz valer pour donn li an retour? Ki mannyer bann serviter Zeova dan letan Labib ti siport son travay? Ki mannyer lorganizasyon i servi bann kontribisyon ozordi? Sa lartik pou reponn sa bann kestyon.

AKOZ NOU DONN AVEK ZEOVA?

4. Ki nou pe montre Zeova ler nou siport son travay?

Nou donn avek Zeova akoz nou kontan li

4 Nou donn avek Zeova akoz nou apresye e kontan li. Ler nou mazin lo tou sa ki Zeova in fer pour nou, sa i tous nou en kantite. Lerwa David ti santi koumsa ler i ti eksplike kwa ki ti neseser pour konstri tanp. David ti dir ki tou keksoz ki nou gannyen i sorti kot Zeova e tou sa ki nou donn Zeova i sorti dan sa ki i’n deza donn nou.​—Lir 1 Kronik 29:11-14.

5. Ki mannyer Labib i ansenny nou ki ler nou donn avek Zeova volonterman, sa i en parti enportan dan vre ladorasyon?

5 Nou osi donn avek Zeova parski sa i en fason ki nou ador li. Dan en vizyon ki zapot Zan ti gannyen, i ti tann bann serviter Zeova dan lesyel dir: “Zeova nou Bondye, ou merit laglwar, loner ek pwisans, parski ou’n kree tou keksoz e akoz ou lavolonte, zot in vin an egzistans e zot in ganny kree.” (Revelasyon 4:11) Sirman, vi ki Zeova i merit tou laglwar ek loner, nou anvi donn li nou meyer. Atraver Moiz, Zeova ti donn nasyon Izrael lord pour selebre trwa lafet par an. Pandan sa bann lafet zot ti bezwen donn avek Zeova e sa ti form par zot ladorasyon. Zot ti ganny dir, “zot pa pou vin devan [Zeova] lanmen vid.” (Deterononm 16:16) Ozordi osi, en parti enportan dan nou ladorasyon i ler nou donn avek Zeova volonterman. Dan sa fason, nou montre ki nou apresye e siport sa travay ki lorganizasyon Zeova pe fer.

6. Akoz i byen pour nou donnen? (Vwar portre o konmansman sa lartik.)

6 I byen pour nou donn zenerezman e pa zis resevwar. (Lir Proverb 29:21.) Imazin en manrmay ki anmas son pti larzan ki i gannyen avek son paran e apre servi en pe sa larzan pour aste en kado pour son paran. Ki mannyer sa kado i fer son paran santi? Oubyen imazin en zenn pionye ki viv avek son paran e ki kontribye pour pey bil oubyen pour aste manze pour lafanmir. I kapab ki son paran pa ekspekte ki i fer sa, me zot aksepte son kado. Akoz? Parski sa i en fason ki i montre lapresyasyon pour tou sa ki son paran i fer pour li. Pareyman, Zeova i konnen ki i byen pour nou servi nou bann keksoz valer pour donnen.

 KI MANNYER BANN SERVITER BONDYE TI DONNEN DAN LEPASE?

7, 8. Ki mannyer pep Zeova dan letan Labib, in kit en legzanp ler zot ti kontribye (a) pour bann proze spesifik? (b) pour siport son travay?

7 Dan Labib, nou aprann ki pep Zeova ti fer bann kontribisyon pour siport son travay. Par ler, zot ti kontribye pour bann proze spesifik. Par egzanp, Moiz ti ankouraz bann Izraelit pour kontribye pour konstriksyon tabernak. Pli tar, Lerwa David ti fer parey pour konstriksyon tanp. (Egzod 35:5; 1 Kronik 29:5-9) Pandan renny Lerwa Zeoas, bann pret ti repar tanp avek larzan ki bann dimoun ti’n donnen. (2 Lerwa 12:4, 5) Dan premye syek, bann Kretyen ti tande ki i ti annan en lafamin Zide e ki bann frer ek ser ti bezwen led. Alor, sak Kretyen ti deside kwa ki i ti kapab anvoye dapre son mwayen pour sa bann frer ek ser.​—Akt 11:27-30.

8 Pep Zeova ti osi donn led finansyel pour siport bann ki ti pe diriz travay Zeova. Par egzanp, dapre Lalwa Moiz, bann Levit ti napa en leritaz parey avek lezot tribi. Alor, lezot Izraelit ti donn en dizyenm sa ki zot ti annan avek bann Levit. Sa ti permet bann Levit pour konsantre lo zot travay kot tabernak. (Nonm 18:21) Dan en menm fason, bann madanm ki ti zenere ti servi sa ki zot ti annan pour siport Zezi ek son bann zapot.​—Lik 8:1-3.

Tou dimoun, ris konman pov ti kapab donn en keksoz

9. Ki diferan fason bann kontribisyon ti ganny fer dan lepase?

9 I ti annan diferan fason ki sa bann kontribisyon ti ganny fer. Bann Izraelit ki ti kontribye pour konstriksyon tabernak, ti’n kapab donn bann keksoz valer ki zot ti sorti avek Lezip. (Egzod 3:21, 22; 35:22-24) Dan premye syek, serten Kretyen ti vann bann keksoz ki zot ti annan, tel parey later ek lakaz e zot ti anmenn larzan kot bann zapot. Bann zapot ti servi sa larzan pour ed bann frer ek ser ki ti dan bezwen. (Akt 4:34, 35) Lezot Kretyen ti annan labitid met larzan dekote pour ki zot kapab siport travay Zeova. (1 Korentyen 16:2) Alor, tou dimoun, ris konman pov ti kapab donn en keksoz.​—Lik 21:1-4.

KI MANNYER NOU DONNEN OZORDI?

10, 11. (a) Ki mannyer nou kapab imit zenerozite bann serviter Zeova ki ti viv dan letan Labib? (b) Ki mannyer ou santi konsernan siport sa travay Rwayonm?

10 Ozordi, nou osi nou kapab ganny demande pour kontribye pour en proze spesifik. I kapab ki ou kongregasyon pe fer plan pour en renovasyon lo ou Lasal Rwayonm oubyen pour konstri enn nouvo. Petet ou biro brans i bezwen ganny renove. Nou osi kapab kontribye pour ede kouver bann depans lasanble. I kapab osi ki nou bann frer ek ser in pas atraver en dezas natirel e ki zot bezwen nou led. Nou bann kontribisyon i osi siport bann misyonner, pionye spesyal, sirveyan rezyonal, bann ki travay kot biro brans prensipal e kot bann  biro brans dan lemonn antye. I kapab osi ki ou kongregasyon pe regilyerman anvoy kontribisyon pour ede konstri bann Lasal Lasanble ek Lasal Rwayonm dan diferan parti lemonn.

11 Nou tou nou kapab donn en keksoz pour siport sa travay ki lorganizasyon Zeova pe fer dan sa bann dernyen zour. Nou pa konnen lekel ki’n fer laplipar bann donasyon. Ler nou met larzan dan bwat kontribisyon kot Lasal Rwayonm oubyen kontribye par servi jw.org, nou pa dir personn konbyen nou’n donnen. Me eski ou santi ki ou bann kontribisyon pa fer okenn diferans akoz ou kapab donn zis en ptigin? Laplipar bann donasyon ki lorganizasyon i resevwar i plizyer pti kado olye detrwa ki gran. Menm nou bann frer ek ser ki annan en ptigin larzan i imit bann Kretyen dan premye syek ki ti reste Masedwann. Zot ti “vreman pov” me zot ti sipliye pour annan sa privilez pour donnen e zot ti demontre zot zenerozite.​—2 Korentyen 8:1-4.

12. Ki mannyer lorganizasyon i esey servi bann donasyon dan sa pli bon fason?

12 Konsey Direkter i fidel e pridan dan lafason ki bann kontribisyon i ganny servi. (Matye 24:45) Son bann manm i priye pour ki zot kapab fer bann bon desizyon e zot fer en bon plan lo ki mannyer pour servi sa larzan. (Lik 14:28) Dan letan Labib, bann zonm fidel ki ti okip bann kontribisyon ti fer sir ki bann kontribisyon ti ganny servi zis pour ladorasyon Zeova. Par egzanp, Ezra ti retourn Zerizalenm avek bann donasyon ki lerwa Pers ti’n donnen. I ti annan lor, larzan ek lezot trezor ki ozordi ti pou vo plis ki 100 milyon dolar Ameriken. Ezra ti vwar sa bann kontribisyon konman en kado pour Zeova. Alor, i ti donn bann lenstriksyon spesifik lo konman pour protez sa kado ler zot ti pe vwayaz dan bann landrwa danzere. (Ezra 8:24-34) Bokou lannen pli tar, zapot Pol ti kolekte larzan pour bann frer ek ser ki ti dan bezwen Zide. I ti fer sir ki bann ki ti pe anmenn sa larzan ti fer “tou keksoz onnetman, pa zis devan Zeova, me osi devan dimoun.” (Lir 2 Korentyen 8:18-21.) Ozordi, nou lorganizasyon i imit Ezra ek Pol e servi bann kontribisyon byen.

13. Akoz tou resaman lorganizasyon in fer serten sanzman?

13 En fanmir i kapab fer bann sanzman dan lafason ki zot servi zot larzan pour ki zot pa depans plis ki zot reveni. Oubyen zot kapab rod bann fason pour senplifye zot lavi pour ki zot kapab fer plis pour Zeova. Lorganizasyon Zeova osi i fer parey. Resaman, i ti annan bann nouvo proze eksitan e par ler plis larzan ti ganny depanse ki sa ki ti ganny resevwar. Alor, parey en fanmir, lorganizasyon i rod bann fason pour koup depans e senplifye travay pour ki i kapab fer plis posib avek bann kontribisyon zenere.

KI MANNYER OU BANN KONTRIBISYON IN GANNY SERVI?

Ou bann donasyon i ed nou travay mondyal (Vwar paragraf 14-16)

14-16. (a) Ki mannyer ou bann kontribisyon i ganny servi? (b) Ki mannyer sa bann proze in benefisye ou personnelman?

14 Bokou frer ek ser ki’n dan laverite pour plizyer lannen i dir ki konmela  lorganizasyon i donn nou plis kado ki zanmen oparavan. Aprezan nou annan jw.org ek JW Broadcasting. Nou annan Labib Tradiksyon nouvo lemonn dan plis langaz ankor. An 2014/2015, sa Lasanble Enternasyonal trwa zour ki ti annan sa tenm “Kontinyen rod Rwayonm Bondye premye!” ti ganny fer dan bann pli gran stad dan 14 lavil dan lemonn antye. Tou dimoun ti byen kontan ki zot ti’n asiste sa lasanble!

15 Plizyer frer ek ser in eksprim zot lapresyasyon pour sa bann kado ki sorti kot lorganizasyon Zeova. Par egzanp, en koup ki pe servi Lazi ti ekri: “Nou pe servi dan en pti lavil e akoz sa, par ler nou santi nou izole e nou fasilman oubliye ki travay Zeova pe ganny fer partou. Me deswit apre ki nou’n get bann diferan progranm lo JW Broadcasting, nou rapel ki nou form parti en lasosyasyon bann frer enternasyonal. Bann frer ek ser dan nou kongregasyon i eksite pour get JW Broadcasting. Souvandfwa, nou tann zot dir ki apre ki zot in get bann progranm tou le mwan, zot santi zot pli pros avek Konsey Direkter. Aprezan, zot santi zot pli fyer pour form parti lorganizasyon Bondye.”

16 I annan preski 2,500 Lasal Rwayonm ki aktyelman pe ganny konstrir oubyen renove partou dan lemonn. Bann manm en kongregasyon Ondiras i dir ki zot ti abitye reve pour ganny zot prop Lasal Rwayonm, me la sa rev in vin en realite. Zot ti ekri: “Nou vreman ere pour form parti fanmir iniversel Zeova e pour annan nou lasosyasyon frer ek ser dan lemonn antye.” En kantite frer ek ser in eksprim menm santiman ler zot ganny Labib ek lezot piblikasyon dan zot prop langaz, ler bann frer ek ser i ed zot apre en dezas natirel ouswa ler zot vwar bann bon rezilta ki zot gannyen dan zot teritwar ler zot fer  temwannyaz dan gran lavil e temwannyaz an piblik.

17. Ki mannyer nou konnen ki Zeova pe siport son lorganizasyon ozordi?

17 Bokou dimoun ki pa Temwen Zeova pa kapab konpran ki mannyer nou kapab fer tou sa ki nou fer avek zis kontribisyon volonter. En direkter egzekitif sorti dan en gran lakonpannyen ti vizit enn nou lenprimri. I ti etonnen pour vwar ki tou travay ti pe ganny fer par bann volonter, avek bann donasyon volonter e san ki nou organiz bann levennman pour anmas larzan. I ti dir ki sa ki nou pe fer pa sipoze marse. Nou dakor avek li! Nou konnen ki sa i posib zis akoz Zeova pe siport sa travay.​—Zob 42:2.

BENEDIKSYON KI NOU GANNYEN LER NOU DONN ZEOVA AN RETOUR

18. (a) Ki benediksyon nou gannyen ler nou siport travay Rwayonm? (b) Ki mannyer nou kapab ansenny nou zanfan ek bann nouvo pour fer parey?

18 Zeova i donn nou sa privilez ek loportinite pour siport sa gran travay Rwayonm. I promet nou ki ler nou fer sa, i pou beni nou. (Malaki 3:10) I osi promet ki si nou donn zenerezman, keksoz pou al byen pour nou. (Lir Proverb 11:24, 25.) I osi dir ki nou pou ere ler nou donnen, parski “i annan plis lazwa pour donnen ki pour resevwar.” (Akt 20:35) Par sa ki nou dir e fer, nou kapab ansenny nou zanfan ek bann nouvo ki mannyer zot osi zot kapab kontribye pour sa travay e ganny bokou benediksyon.

19. Ki mannyer sa lartik in ankouraz ou?

19 Tou sa ki nou annan i sorti kot Zeova. Ler nou donn li an retour, nou montre ki nou kontan li e ki nou apresye tou sa ki i’n fer pour nou. (1 Kronik 29:17) Ler bann Izraelit ti kontribye pour konstriksyon tanp, zot ti “rezoui akoz sa bann lofrann ti’n ganny ofer volonterman; zot ti’n ganny ofer anver [Zeova] avek bon leker.” (1 Kronik 29:9) Nou osi annou kontinyen trouv lazwa ek satisfaksyon anmezir ki nou donn Zeova an retour dan sa ki i’n deza donn nou.

^ par. 3 Proverb 3:9 (NWT): “Onor Zeova avek ou bann keksoz valer e avek premye fri tou ou prodwi.”