Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  October 2016

Demontre ou lafwa dan bann promes Zeova

Demontre ou lafwa dan bann promes Zeova

“Lafwa i . . . levidans kler ki sa ki nou krwar i reel menm si nou pa vwar li.”EBRE 11:1NW.

KANTIK: 54, 125

1. Ki mannyer nou devret santi konsernan nou lafwa?

PA TOU dimoun ki annan lafwa. (2 Tesalonisyen 3:2) Me Zeova i donn lafwa tou bann ki ador li. (Romen 12:3; Galat 5:22) Pa nou rekonesan ki Zeova i donn nou lafwa!

2, 3. (a) Ki byenfe nou gannyen ler nou annan lafwa? (b) Ki bann kestyon ki pou ganny reponn?

2 Zeova in donn son Garson byenneme pour ki tou dimoun ki demontre lafwa dan Zezi i ganny son pese pardonnen. Sa i fer li posib pour bann dimoun vin zanmi Zeova e viv pour touzour. (Zan 6:44, 65; Romen 6:23) Pa Zeova i bon anver nou! Menm si nou bann dimoun ki fer pese e merit lanmor, Zeova ti vwar ki nou kapab fer bann bon keksoz. (Psonm 103:10) I ti ed nou konn sa bon nouvel konsernan Zezi ek son sakrifis. Ler nou konmans demontre lafwa dan Zezi e swiv li, nou enpasyan pour ganny lavi eternel!—Lir 1 Zan 4:9, 10.

3 Ki nou kapab aprann ankor konsernan lafwa? Si nou zis konn sa ki Bondye in fer e sa ki i pou fer dan lavenir,  eski sa i vedir ki nou annan lafwa? Annou vwar ki lezot keksoz ki nou devret fer.

DEMONTRE LAFWA DAN OU LEKER

4. Ki lefe lafwa i annan lo nou?

4 Ler nou annan lafwa dan Zeova ek Zezi, nou pa zis konn sa ki zot in fer e sa ki zot pou fer pour nou. Nou osi vreman oule viv dapre zot standar. Nou osi kontan pour ed lezot konn Zeova ek Zezi. Zapot Pol ti dir: “Parski si avek ou labous, ou anons an piblik ki Zezi i Senyer e dan ou leker ou demontre lafwa ki Bondye ti resisit li, ou pou ganny sove. Parski se avek son leker ki en dimoun i demontre lafwa pour li vin drwat me se avek son labous ki i anons sa parol an piblik pour li ganny sove.”Romen 10:9, 10, NW; 2 Korentyen 4:13.

5. Akoz i enportan pour annan lafwa e ki nou devret fer pour annan en lafwa for? Donn en legzanp.

5 I evidan ki pour ganny lavi eternel dan nouvo lemonn ki Bondye in promet, nou bezwen annan lafwa e nou bezwen kontinyen gard li for. Lafwa i parey en plant. Nou bezwen aroz en plant pour li reste an bonn sante e kontinyen vin pli for. Me si nou pa donn li ase delo, i pou sek e mor. Pareyman, nou bezwen fer sir ki nou lafwa i reste “solid” e i kontinyen vin pli “for.”Tit 2:2; 2 Tesalonisyen 1:3; Lik 22:32; Ebre 3:12.

LABIB I DEKRIR LAFWA

6. Ki sa de fason ki Ebre 11:1 i dekrir lafwa?

6 Ebre 11:1 i dekrir lafwa. (Lir.) [1] (Vwar lezot not.) (1) Lafwa i “ler nou asire ki sa ki nou pe espere” pou vin vre. Bann keksoz ki nou pe espere i enkli bann promes Bondye konsernan lavenir. Par egzanp, nou asire ki bann move keksoz pou disparet e i pou annan en nouvo lemonn. (2) Lafwa i “sertitid” oubyen levidans konkret “dan keksoz ki nou pa war.” Nou konnen ki Zeova, Zezi Kri, bann lanz e sa Rwayonm ki dan lesyel i egziste kantmenm nou pa vwar zot. (Ebre 11:3) Ki mannyer nou kapab demontre ki nou vreman annan lafwa dan bann promes Bondye e bann keksoz ki nou pa vwar? Nou fer sa par nou fason viv e par sa ki nou dir e sa ki nou fer.

7. Ki mannyer legzanp Noe i ed nou konpran ki i vedir pour annan lafwa? (Vwar portre lo paz 21.)

7 Ki nou aprann lo lafwa avek Noe? Zapot Pol ti dir ki Noe “ti ekout bann lavertisman ki Bondye ti donn li konsernan keksoz ki ziska prezan personn pa ti’n ankor war. Noe ti obei e konstri en [lars] pour sov son fanmir.” (Ebre 11:7) Vi ki Noe ti annan lafwa dan sa ki Zeova ti’n dir li, i ti konstri sa gran lars. Petet son bann vwazen ti demann li akoz i ti pe konstri sa lars! Nou kapab asire ki Noe pa ti reste trankil. Labib i dir ki Noe ti “proklanm lazistis.” (2 Pyer 2:5) I ti averti bann dimoun ki Bondye ti pe al anmenn en deliz pour detri bann move dimoun. I tre probab ki i ti dir zot egzakteman sa ki Zeova ti’n dir li: “Mon’n deside met lafen avek tou. Later i ranpli avek vyolans akoz zonm” e “mon pou anvoy en deliz lo later pour detri tou sa  ki annan souf lavi anba lesyel. Tou sa ki lo later pou mor.” Alor, Noe ti’n bezwen eksplik bann dimoun ki zot devret fer pour sirviv. Zeova ti dir Noe: “Ou ava antre dan lars.”Zenez 6:13, 17, 18.

8. Ki Zak ti dir konsernan lafwa?

8 Disip Zak osi ti ekri konsernan lafwa. I tre probab ki i ti fer sa zis apre ki Pol ti’n ekri bann Ebre. Zak ti ekri: “Montre mwan ou lafwa san aksyon, e mwan, mon ava montre ou mon lafwa par mon aksyon.” (Zak 2:18) Zak ti eksplike ki pour annan lafwa, nou bezwen fer plis ki zis krwar. Bann demon i krwar ki Bondye i egziste me zot napa lafwa dan Zeova. O kontrer zot vreman opoz li. (Zak 2:19, 20) De lot kote, ler en dimoun i annan lafwa, i pou fer plezir Bondye par fer bann bon aksyon. Sanmenm ki Abraam ti fer. Zak ti ekri: “Pa Abraam nou papa ti ganny aprouve konman drwat gras a son aksyon apre ki i ti ofer son garson, Izaak lo lotel? Alor, i ti demontre son lafwa par son aksyon e son lafwa ti vin parfe par son aksyon.” Apre, Zak ti montre ki lafwa san aksyon i initil par dir: “Anfet, zis parey lekor san lespri i mor, lafwa san aksyon osi i mor.”Zak 2:21-23, 26NW.

9, 10. Ki savedir demontre lafwa dan Garson?

9 Plis ki 30 an pli tar, Zan ti ekri son Levanzil ek trwa let. Parey lezot ekriven Labib, Zan ti konpran kisisa lafwa. Dan son Levanzil ek let, Zan ti servi en verb Grek plizyer fwa. Sa verb, ler i ganny tradwir an Kreol, i vedir “demontre lafwa.”

Nou demontre lafwa dan Garson, par obei Zezi

10 Par egzanp, Zan ti eksplike: “Sa enn ki demontre lafwa dan Garson i ganny lavi eternel, sa enn ki dezobei Garson pa pou ganny lavi, me i pou eksperyans lakoler Bondye.” (Zan 3:36, NW) Pour ki nou demontre lafwa dan Garson, nou devret obei Zezi. Anfet, par sa ki Zan ti ekri, nou kapab vwar ki Zezi ti souvandfwa dir ki pour ganny lavi eternel, nou bezwen demontre lafwa dan li ek son Papa.Zan 3:16; 6:29, 40; 11:25, 26; 14:1, 12, NW.

11. Ki mannyer nou kapab demontre lapresyasyon pour Zeova akoz in fer nou konn laverite?

11 Zeova ti servi son lespri sen pour ed nou konpran laverite lo li ek son Garson e pour demontre lafwa dan zot. (Lir Lik 10:21.) Ki mannyer nou kapab demontre lapresyasyon pour tou sa ki Zeova in fer? Nou pa devret zanmen aret remersye li pour permet nou annan en relasyon avek li gras a Zezi. Zezi i “sa Enn ki gid nou lafwa e ki fer nou lafwa vin parfe.” (Ebre 12:2, NW) Alor, annou kontinyen batir nou lafwa par toultan priy Zeova e kontinyen etidye son Parol.Efezyen 6:18; 1 Pyer 2:2.

Demontre ou lafwa par anons sa bon nouvel avek lezot dan tou lokazyon (Vwar paragraf 12)

12. Ki nou pou fer si nou annan lafwa?

12 Nou devret kontinyen demontre ki nou annan en lafwa for dan bann  promes Zeova par nou bann aksyon. Par egzanp, nou kontinyen anons Rwayonm Bondye avek bann dimoun e ed zot vin disip Zezi. Nou osi kontinyen fer “dibyen tou dimoun, sirtou nou bann frer ek ser dan lafwa.” (Galat 6:10) Nou osi travay dir pour “kontinyen devlop sa nouvo personnalite” parski nou pa oule gat nou lanmitye avek Zeova.Kolosyen 3:5, 8-10NW.

LAFWA DAN BONDYE I FORM PARTI NOU FONDASYON

13. Ki degre “lafwa dan Bondye” i enportan? Ki mannyer Labib i dekrir “lafwa dan Bondye” e akoz?

13 Labib i dir: “San lafwa, personn pa kapab fer plezir Bondye. Annefe, sa enn ki apros kot Bondye i devre krwar ki Bondye i egziste e ki i rekonpans tou dimoun ki rod li.” (Ebre 11:6) Labib i osi montre ki “lafwa dan Bondye” i enn parmi sa bann premye keksoz ki en vre Kretyen i devret annan. I form parti nou “fondasyon.” (Ebre 6:1, NW) Me apard ki lafwa, nou bezwen en lot kalite enportan pour ki nou kapab annan e gard nou lanmitye avek Zeova.Lir 2 Pyer 1:5-7; Zid 20, 21.

14, 15. Ki degre lafwa i enportan konpare avek lanmour?

14 Bann ekriven Labib ti refer avek lafwa plis ki tou lezot kalite. Eski sa i vedir ki lafwa i sa kalite ki pli enportan pour annan?

15 Pol ti konpar lafwa avek lanmour. I ti ekri: “Si mon annan lafwa pour fer bann montanny deplase: si mon napa lanmour, mon en nanryen ditou.” (1 Korentyen 13:2) Zezi ti dir ki “sa pli gran konmannman dan Lalwa” i kontan Zeova ou Bondye. (Matye 22:35-40) Lanmour i ed nou pour annan plizyer lezot kalite ki fer plezir Bondye. Par egzanp, Labib i dir ki lanmour i “krwar tou.” Alor lanmour pou ed nou pour krwar, oubyen annan lafwa dan tou sa ki Bondye i dir nou dan Labib.1 Korentyen 13:4, 7.

16, 17. Ki Labib i dir lo lafwa ek lanmour? Lekel ki pli gran e akoz?

16 Lafwa ek lanmour i de kalite enportan  e bann ekriven Labib i souvandfwa servi zot ansanm. Pol ti ankouraz son bann frer pour ‘pran pour boukliye, lafwa ek lanmour.’ (1 Tesalonisyen 5:8) Pyer ti ekri konsernan Zezi: “Menm si zot pa’n zanmen vwar li, zot kontan li. Menm si zot pa vwar li la konmela, zot demontre lafwa dan li.” (1 Pyer 1:8, NW) Zak ti dir son bann frer swazir: ‘Mon bann frer byenneme! Ekoute: Bondye in swazir dimoun ki pov dan lemonn, pour fer zot ris dan lafwa, e vin bann zeritye Rwayonm ki in promet bann ki kontan li.’ (Zak 2:5) Zan ti ekri ki komannman Bondye i ki ‘nou devre krwar dan non son Garson Zezi Kri e nou devre kontan kanmarad.’1 Zan 3:23.

17 Me Pol ti osi ekri: “Aprezan, lafwa, lesperans ek lanmour i reste ansanm. Me lanmour i pli gran ki tou.” (1 Korentyen 13:13) Dan lavenir, nou pa pou bezwen annan lafwa dan bann promes Bondye konsernan son nouvo lemonn, parski zot pou’n vin vre. Nou pou viv sa lavi merveye ki Labib i koz lo la. Me selman, nou pou bezwen toultan annan lanmour pour Bondye ek bann dimoun. Anfet, nou lanmour pour zot pou kontinyen grandi pour touzour.

ZEOVA IN BENI NOU LAFWA

18, 19. Lefet ki pep Bondye i annan lafwa, ki rezilta sa i anmennen ozordi e lekel ki merit ganny loue pour sa?

18 Dan nou letan, pep Zeova i annan lafwa dan Rwayonm Bondye e zot siport li. Zot osi kontan kanmarad. Sa i vre, akoz zot les lespri Bondye gid zot fason viv. (Galat 5:22, 23) I annan lape ek linite parmi sa plis ki wit milyon frer ek ser dan lemonn antye dan zot bann kongregasyon. I evidan alor ki lafwa ek lanmour i de kalite ki pwisan.

19 Sa linite i posib gras a led nou Bondye. I merite ganny loue pour sa. (Izai 55:13) Nou vreman apresye ki i’n fer li posib pour nou ganny sove ‘akoz nou lafwa.’ (Efezyen 2:8) Zeova pou kontinyen ed ankor plis dimoun pour annan lafwa dan li. Finalman, later antye pou ranpli avek dimoun ki parfe, drwat e ere ki pou loue Zeova pour touzour!

^ [1] (paragraf 6) Ebre 11:1 (NW): “Lafwa i ler nou asire ki sa ki nou pe espere pou vin vre e i levidans kler ki sa ki nou krwar i reel menm si nou pa vwar li.”