Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  November 2016

Eski ou vreman apresye liv Zeova?

Eski ou vreman apresye liv Zeova?

“Ler nou ti anons parol Bondye avek zot, zot ti aksepte li konman parol Bondye parey i vreman ete.”1 TESALONISYEN 2:13.

KANTIK: 114, 113

1-3. Kwa ki ti’n kapab arive ant Evodi ek Sentis? Ki mannyer sa bann problenm koumsa i kapab ganny rezourd? (Vwar portre anler.)

LABIB i annan en gran valer pour nou parski nou konnen ki i Liv Bondye. Dan Labib, i annan bann konsey ki kapab ed nou evit bann problenm e i kapab koriz nou ler nou pe fer bann fot. Alor, ki mannyer nou reazir anver konsey Labib? Mazin Evodi ek Sentis, de madanm ki ti bann Kretyen swazir dan premye syek. Labib i dir ki zot ti dispit avek kanmarad, me i pa dir nou akoz. Annou imazin sa ki ti’n kapab arive.

2 Petet Evodi ti’n envit serten frer ek ser kot li pour en repa, me i pa ti’n envit Sentis. Pli tar, ler Sentis ti tann lezot pe dir ki mannyer zot ti’n apresye sa repa, i ti ankoler. Petet i ti’n mazinen: ‘Mon pa oule krwar ki Evodi pa’n envit mwan! Mon ti krwar ki nou ti sa de pli bon zanmi.’ Sentis ti santi ki Evodi pa ti vreman son zanmi e ki i ti pe esey evit li. Alor, Sentis ti envit sa bann menm dimoun kot li pour en repa me i pa ti envit Evodi! Sa  sityasyon ti’n menm kapab ofans lezot dan kongregasyon. Labib i montre ki Pol ti konsey sa de ser e ankouraz zot pour fer lape. Petet zot ti ekout li e kontinyen servi Zeova dan lazwa.Filipyen 4:2, 3.

3 Dan nou kongregasyon ozordi, parfwa nou osi nou kapab annan en problenm avek en frer oubyen en ser. Me si nou swiv konsey Labib, nou kapab rezourd sa bann problenm. Anfet, nou menm kapab evit sa bann problenm. Alor, ler nou obei sa ki Labib i dir, nou montre ki Liv Zeova i vreman annan valer pour nou.Psonm 27:11.

LABIB I ANSENNY NOU POUR KONTROL NOU LEMOSYON

4, 5. Ki konsey ki Parol Bondye i donn nou konsernan annan kontrol lo nou bann lemosyon?

4 I pa touzour fasil pour kontrol nou bann lemosyon. Nou kapab santi nou vreman sagren oubyen ankoler si en dimoun i ensilte nou ouswa akoz lafason ki i’n tret nou i pa zis, petet akoz nou kiltir, nou kouler lapo ouswa nou laparans. Sa i kapab pli fermal si sa dimoun ki pe ensilte nou i nou frer ouswa nou ser. Ki konsey dan parol Bondye ki kapab ed nou?

5 Zeova i konnen kwa ki kapab arive ler bann imen pa kontrol zot lemosyon. Ler nou ofanse ouswa ankoler, nou kapab dir e fer en keksoz ki nou regrete pli tar. Dan Labib, Zeova i enstrir nou pour kontrol nou lakoler e i dir nou: “Pa pran lakoler tro vit.” Zis mazin lakantite problenm nou evite ler nou obei sa konsey e nou pa ankoler vitman! (Lir Eklezyast 7:9; Proverb 16:32.) Labib i osi dir nou pardonn lezot. Anfet, Zezi ti dir ki si nou pa pardonn lezot, Zeova pa pou pardonn nou. (Matye 6:14, 15) Eski ou bezwen annan plis pasyans e pli pare pour pardonn lezot?

6. Ki i kapab arive si nou pa kontrol nou bann lemosyon?

6 Si nou pa kontrol nou bann lemosyon, nou kapab kontinyen ankoler e menm kapab devlop laenn pour en dimoun. Nou osi kapab enfliyans serten dan kongregasyon pour fer parey nou. Menm si nou esey kasyet nou lakoler ek laenn, avek letan lezot pou realize ki mannyer nou santi. Alor, nou bann frer ek ser i kapab evit nou. (Proverb 26:24-26) Bann ansyen pou servi Labib pour esey ed nou pour rezet sa lakoler ek laenn e pardonn lezot. (Levitik 19:17, 18; Romen 3:11-18) Ler zot fer sa, eski nou pou swiv lenstriksyon sorti dan Liv Zeova?

ZEOVA PE DIRIZ NOU

7, 8. (a) Ki mannyer Zeova i diriz son pep? (b) Ki serten lenstriksyon nou trouve dan Labib e akoz nou devret obeir zot?

7 Zeova i diriz e ansenny sa bann ki form parti son lorganizasyon lo later ozordi. Ki mannyer i fer sa? I’n apwent Kris pour vin “sef kongregasyon” e Kris in apwent “sa lesklav fidel e pridan” pour ansenny e diriz pep Bondye. (Efezyen 5:23; Matye 24:45-47) Zis parey konsey direkter dan premye syek, sa lesklav i vreman apresye  Labib akoz i Parol Bondye. (Lir 1 Tesalonisyen 2:13.) Ki serten lenstriksyon ki nou trouve dan Labib?

8 Labib i dir nou asiste renyon regilyerman. (Ebre 10:24, 25) I ankouraz nou tou pour krwar dan menm lansennyman Labib. (1 Korentyen 1:10) I osi dir nou kontinyen “rod Rwayonm ek son ladrwatir premye.” (Matye 6:33) Labib i demann nou pour pres port an port, dan bann landrwa piblik e nenport landrwa kot i annan dimoun. (Matye 28:19, 20; Akt 5:42; 17:17; 20:20) I donn lenstriksyon bann ansyen pour gard bann kongregasyon pir. (1 Korentyen 5:1-5, 13; 1 Timote 5:19-21) I osi dir ki nou devret gard nou lekor pir e evit bann panse ek labitid ki Zeova i deteste.2 Korentyen 7:1.

‘Eski mon pou fidel avek Zezi e swiv gidans lesklav fidel?’

9. Lekel ki Zezi in apwente pour ed nou konpran Parol Bondye?

9 Serten i kapab panse ki zot pa bezwen personn pour eksplik zot sa ki Labib i dir. Me depi 1919, Zezi pe servi “sa lesklav fidel e pridan” pour ed pep Bondye konpran bann lansennyman Labib e swiv sa ki i dir. Par obei sa ki Labib dir, nou gard kongregasyon pir, anpe e dan linite. Demann ou lekor, ‘Eski mon pou fidel avek Zezi e swiv gidans lesklav fidel?’

SARET ZEOVA PE BOUZ VITMAN!

10. Ki mannyer liv Ezekyel i dekrir sa parti lorganizasyon Zeova ki dan lesyel?

10 Dan Labib, nou aprann ki bann serviter Zeova dan lesyel i organize zot osi. Par egzanp, Ezekyel ti vwar en vizyon kot Zeova ti kondwir en saret ki ti kapab bouz vit dan nenport direksyon ki Zeova ti anvi i ale. (Ezekyel 1:4-28) Sa saret i reprezant sa parti lorganizasyon Bondye ki dan lesyel, ki vitman swiv son direksyon. An retour, i enfliyans parti sa lorganizasyon ki lo later. Mazin lo sa kantite sanzman ki’n ganny fer dan lorganizasyon Bondye pandan sa dernyen di-z-an. Mazinen ki i Zeova ki fer sa bann tel sanzman. Byento Kris avek son bann lanz pou detri sa move lemonn. I pou napa personn ki pou dezonor Zeova ek son non ouswa kritik son fason dirize ankor!

Pa nou apresye tou sa bann volonter ki pe travay dir dan konstriksyon! (Vwar paragraf 11)

11, 12. Ki lorganizasyon Zeova in reisi fer dan sa bann dernyen zour?

11 Annou vwar ki lorganizasyon Zeova in akonpli dan sa bann dernyen zour. Konstriksyon. Plizyer santenn frer ek ser in travay dir pour konstri sa nouvo biro prensipal Temwen Zeova, Warwick, New York, Leta-z-ini. Plizyer milye lezot volonter dan lemonn pe konstrir bann Lasal Rwayonm ek biro brans. Sa bann volonter i ganny dirize par Worldwide Design/Construction Department. Pa nou apresye tou sa bann ki pe travay dir lo sa bann batiman! Alor, bann serviter Zeova partou i  donn sa ki zot kapab pou ede finans konstriksyon sa bann landrwa. Zeova i beni son pep akoz limilite ek fidelite ki zot demontre.Lik 21:1-4.

12 Ledikasyon. Zeova i kontan pour edik son pep. (Izai 2:2, 3) Mazin lo sa bann diferan lekol ki nou annan. I annan Lekol Pionye, Lekol pour bann predikater Rwayonm, Lekol Gilead, Lekol pour nouvo Betelit, Lekol pour bann sirveyan rezyonal ek zot madanm, Lekol Ansyen, Lekol Minister Rwayonm e Lekol pour manm Komite Biro Brans avek zot madanm. Lo nou sit Enternet, jw.org, nou kapab trouv Labib ek lezot piblikasyon dan plizyer santenn langaz. Lo sa sit, i osi annan bann seksyon spesyal pour zanfan ek fanmir e osi en seksyon nouvel. Eski ou’n servi jw.org dan predikasyon e dan ou ladorasyon fanmir?

RESTE FIDEL AVEK ZEOVA E SIPORT SON LORGANIZASYON

13. Ki responsabilite ki pep Zeova i annan?

13 Pa i en gran loner pour form parti  lorganizasyon Zeova e pour konn sa ki i ekspekte nou fer! Byensir, si nou konn sa ki fer plezir Bondye, nou annan sa responsabilite pour obei li e fer sa ki byen. Menm si bokou dimoun i kontan fer sa ki move, nou devret “deteste lemal,” parey Zeova i fer. (Psonm 97:10) Nou pa devret zanmen vin parey bann ki krwar sa ki “byen [i] mal e sa ki mal, byen.” (Izai 5:20) Nou anvi fer plezir Zeova, alor nou determinen pour reste pir dan tou fason. (1 Korentyen 6:9-11) Sa ki Zeova i dir nou dan Labib i pour nou prop dibyen. Nou kontan li e nou anvi reste fidel avek li. Sa i akoz nou swiv son gidans kot lakour, dan kongregasyon, kot travay, kot lekol ouswa nenport landrwa nou kapab ete. (Proverb 15:3) Reflesir lo serten domenn kot nou bezwen fidel avek Zeova.

Bann papa ek manman ki kontan Zeova i anvi ki zot zanfan i annan en bon lanmitye avek Zeova

14. Ki mannyer bann paran i kapab fidel avek Zeova?

14 Lafason nou elve nou zanfan. Dan Labib, Zeova in donn bann paran lenstriksyon lo ki mannyer pour elve zot zanfan. Bann Kretyen i bezwen fer atansyon pour zot pa ganny enfliyanse par fason panse ki popiler dan sa lemonn. (Efezyen 2:2) Par egzanp, dan serten pei en papa i kapab mazinen, ‘Isi, bann madanm ki ansenny bann zanfan.’ Me Labib i klerman donn lord bann papa pour ansenny zot zanfan lo Zeova. (Efezyen 6:4) Bann papa ek manman ki kontan Zeova i anvi ki zot zanfan i annan en bon lanmitye avek Zeova, zis parey Samyel ler i ti ankor en pti garson.1 Samyel 3:19.

15. Ki mannyer nou kapab fidel avek Zeova ler nou pe fer bann desizyon enportan?

15 Lafason ki nou fer desizyon. Avan ki nou fer okenn desizyon enportan dan lavi, nou anvi konnen ki Zeova i panse pour ki nou fidel avek li. Nou kapab ganny led dan Labib ek avek son lorganizasyon. Par egzanp, serten paran ozordi ki’n al reste dan en lot pei, in deside anvoy zot pti baba ki’n fek ne dan sa pei kot zot sorti, pour viv avek zot fanmir. Koumsa, papa ek manman i kapab kontinyen travay e anmas larzan. I vre ki sa i en desizyon personnel, me en koup i devret demann zot lekor, ‘Ki Zeova i panse lo nou desizyon?’ (Lir Romen 14:12.) I pou saz premyerman pour reflesir lo sa ki Labib i dir avan nou fer bann desizyon enportan konsernan nou fanmir ek nou travay. Nou bezwen led avek nou papa akoz nou pa kapab diriz nou prop lepa.Zeremi 10:23, NWT.

16. Ki swa ki en manman ti bezwen fer ler son garson ti ne? Kwa ki ti ed li pour fer en bon desizyon?

 16 Apre ki en koup ti al dan en lot pei, zot ti donn nesans en pti garson e zot ti plàn pour anvoy li reste avek son granparan. Me dan sa menm letan, sa madanm ti konmans etidye Labib avek en Temwen Zeova. I ti aprann ki i ti son devwar pour ansenny son garson konsernan Zeova. (Psonm 127:3; Proverb 22:6) Sa zenn madanm ti priy Zeova, zis parey Labib i dir nou fer e sipliy li pour ed li fer sa ki byen. (Psonm 62:7, 8) I ti osi koz lo son problenm avek sa ser ki ti etidye Labib avek li e avek lezot dan kongregasyon. Menm si son fanmir ek zanmi ti kontinyen dir li ki i devret anvoy son piti kot son granparan, i ti deside ki i pa ti byen pour li fer sa. Son msye ti remarke ki kantite bann frer ek ser ti ed son madanm ek zot pti baba. Sa ti telman enpresyonn li ki i ti konmans etidye Labib e asiste bann renyon avek son fanmir. Zis mazin ki mannyer sa manman ti kontan ler i ti realize ki Zeova in reponn son lapriyer!

17. Ki lenstriksyon ki nou devret swiv ler nou pe etidye Labib avek en dimoun?

17 Lafason ki nou swiv gidans. Si nou fidel avek Bondye, nou pou swiv lenstriksyon sorti kot son lorganizasyon. Par egzanp, annou vwar sa ki nou bezwen fer, deswit apre ki nou’n konmans etidye sa liv Ki Labib i dir? avek en dimoun. Nou’n ganny dir ki apre sak letid nou bezwen pran detrwa minit pour ed sa etidyan konn plis lo lorganizasyon Zeova. Nou kapab servi sa video Kwa ki pase dan en Lasal Rwayonm? ek sa brosir Lekel ki pe fer lavolonte Zeova ozordi? Apre ki nou’n konplet sa liv Ki Labib i dir?, nou kapab ed sa etidyan pour fer son “lafwa vin pli stab” par etidye sa liv “Reste dan lanmour Bondye” avek li, menm si i’n fini batize. (Kolosyen 2:7) Eski ou pe swiv lenstriksyon sorti kot lorganizasyon Zeova?

18, 19. Ki serten rezon akoz nou devret remersye Zeova?

18 I annan plizyer rezon akoz nou devret remersi Zeova! En rezon prensipal i akoz “gras a li ki nou vivan, ki nou mouvmante e egziste.” (Akt 17:27, 28) I’n osi donn nou son prop Liv, Labib. Parey bann Kretyen Tesalonik, nou kontan sa kado akoz i en mesaz sorti kot li.1 Tesalonisyen 2:13.

19 Labib in ed nou pour vin pli pros avek Zeova e i’n vin pli pros avek nou. (Zak 4:8) Pa nou vreman rekonesan ki nou Papa in envit nou pour form parti son lorganizasyon! Nou pou santi parey sa psalmis ki ti ekri: “Remersye Zeova parski i bon! Son lanmour fidel i pour touzour.” (Psonm 136:1, NWT) Dan tou bann verse sa psonm, sa psalmis ti repet sa bann mo, “son lanmour fidel i pour touzour.” Wi, si nou fidel anver Zeova e swiv lenstriksyon ki i donnen par son lorganizasyon, i pou donn nou lavi eternel e i pou fidel avek nou pour touzour!