Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  November 2016

Zot in ganny libere avek fo larelizyon

Zot in ganny libere avek fo larelizyon

“Mon pep, sorti ladan.”REVELASYON 18:4.

KANTIK: 101, 93

1. Ki mannyer nou konnen ki pep Bondye ti pou ganny libere avek Gran Babilonn e ki bann kestyon nou pou reponn?

DAN sa lartik avan, nou’n vwar ki bann Kretyen fidel ti parey bann egzile dan Gran Babilonn. Sa ki rekonfortan, i ki zot pa ti pou reste an egzil pour touzour. Nou konn sa akoz dan Labib, Bondye ti donn son pep sa lord pour “sorti” dan fo larelizyon. (Lir Revelasyon 18:4.) Sa i montre ki bann Kretyen ti pou ganny libere avek Gran Babilonn. Nou vreman anvi konnen kan ki zot ti pou ganny libere! Me premyerman, nou bezwen reponn sa bann kestyon swivan: Ki bann Etidyan Labib ti determinen pour fer konsernan Gran Babilonn menm avan 1914? Ki mannyer bann frer ek ser ti devoue dan predikasyon pandan Premye Lager Mondyal? Eski pep Bondye ti an egzil Babilonn pandan sa letan akoz zot ti bezwen fer bann azisteman?

“BABILONN IN TONBE”

2. Menm avan Premye Lager Mondyal, ki bann etidyan Labib ti deside fer?

2 Plizyer lannen avan Premye Lager Mondyal (1914-1918),  Charles Taze Russell ek lezot Etidyan Labib ti realize ki larelizyon Kretyen pa ti pe ansenny laverite sorti dan Labib. Alor, zot pa ti oule annan nanryen pour fer avek fo larelizyon. Menm an 1879, Zion’s Watch Tower ti dir ki nenport legliz ki dir i nouvel marye fidel Kris, me ki siport bann gouvernman, i form parti Gran Babilonn ki Labib i apel en prostitye.—Lir Revelasyon 17:1, 2.

3. Ki bann etidyan Labib ti fer pour montre ki zot pa ti form parti fo larelizyon? (Vwar portre lo paz 27.)

3 Bann zonm ek fanm fidel ti konnen ki si zot kontinyen siport fo larelizyon, Bondye pa ti pou beni zot. Alor, bokou zot ti anvoy bann let kot zot legliz pour dir ki zot nepli anvi reste en manm. I ti menm annan bann ki ti lir zot let for dan legliz. Kot zot pa ti ganny drwa fer sa, zot ti anvoy en let kot sak manm legliz. Bann Etidyan Labib ti fer kler ki zot pa ti oule annan nanryen pour fer avek fo larelizyon! Plizyer lannen oparavan, zot ti’n kapab ganny touye pour fer sa. Me ver lannen 1870, gouvernman dan plizyer pei pa ti pe siport legliz parey zot ti fer avan. Aprezan, dimoun ti kapab koz lo labib e menm pa dakor avek sa ki legliz ti ansennyen.

4. Pandan Premye Lager Mondyal ki mannyer bann Etidyan Labib ti vwar Gran Babilonn? Eksplike.

4 Bann Etidyan Labib pa ti anvi ki zis zot fanmir, zanmi ek bann manm Legliz i konnen ki zot ti nepli siport fo larelizyon, me zot ti anvi lemonn antye konnen ki Gran Babilonn i en prostitye relizye. Alor, ant Desanm 1917 e boner 1918 sa detrwa milye Etidyan Labib ti distribye 10,000,000 kopi en trak ki ti enkli en lartik ki apel “Babilonn in tonbe” (“The Fall of Babylon.”) Sa trak ti pe montre klerman laverite konsernan bann larelizyon Kretyen. Parey ou kapab mazinen, bann sef relizye ti vreman ankoler! Me bann Etidyan Labib pa ti aret la. Zot ti determinen pour kontinyen prese e obei “Bondye plito ki zonm.” (Akt 5:29) Ki sa i montre nou? Sa i montre ki pandan Premye Lager Mondyal, sa bann zonm ek fanm Kretyen pa ti pe al an egzil, o kontrer zot ti pe liber zot avek fo larelizyon e ed lezot pour fer parey.

DEVOUMAN PANDAN PREMYE LAGER MONDYAL

5. Akoz nou kapab dir ki bann frer ek ser ti devoue pandan Premye Lager Mondyal?

5 Dan lepase, nou ti dir ki pep Bondye pa ti ganny son laprouvasyon pandan Premye Lager Mondyal akoz zot pa ti pres avek devouman. I pour sa rezon ki nou ti krwar ki Zeova ti’n permet  Gran Babilonn pour anmenn zot an egzil pour en pti pe letan. Par kont, bann frer ek ser fidel ki ti servi Bondye ant 1914 a 1918, ti pli tar eksplike ki konman en group zot ti fer tou sa ki zot ti kapab pour kontinyen prese. Ler nou pli byen konpran ki ti arive avek bann Etidyan Labib pandan sa letan, sa pou ed nou konpran serten levennman ki ganny rikorde dan Labib.

Bann frer ek ser fidel ki ti servi Bondye ant 1914 a 1918, ti pli tar eksplike ki konman en group zot ti fer tou sa ki zot ti kapab pour kontinyen prese

6, 7. (a) Ki defi bann Etidyan Labib ti fer fas avek pandan Premye Lager Mondyal? (b) Kwa ki montre ki bann Etidyan Labib ti devoue?

6 Anfet, pandan Premye Lager Mondyal, bann Etidyan Labib ti byen okipe dan predikasyon. Me zot ti osi fer fas avek plizyer defi. Annou vwar de sa bann defi. Premyerman, bann Etidyan Labib pa ti’n aprann prese zis avek Labib. Zot ti abitye zis distribye bann liv e les bann piblikasyon eksplik laverite. Alor ler sa liv The Finished Mystery ti ganny enterdi par gouvernman konmansman 1918, i ti difisil pour laplipar bann frer ek ser prese. En dezyenm defi ki ti konmanse sa menm lannen ti lafyev Espanyol. Sa maladi terib ti kontazye e sa ti fer li difisil pour bann frer ek ser vwayaze e prese. Malgre sa bann defi, bann Etidyan Labib ti fer zot mye pour kontinyen prese.

Pa sa bann Etidyan Labib ti devoue! (Vwar paragraf 6, 7)

7 An 1914, sa pti group Etidyan Labib ti montre “Photo-Drama of Creation.” Sa prezantasyon, ki ti enkli bann slayd, film ek son, ti en nouvo keksoz sa letan. Sa Dram, parey son tit i fer vwar, ti rakont zistwar limanite depi kreasyon Adan ziska lafen Renny Kris. An 1914, premye lannen ki i ti ganny zwe, plis ki 9,000,000 dimoun ti vwar sa Dram. Zis mazin sa. Sa i plis ki lakantite Temwen Zeova ki egziste dan lemonn ozordi! Lezot rapor i montre ki an 1916, plis ki 809,000 dimoun ti  asiste renyon piblik Leta-z-ini e an 1918 sa sif ti preski 950,000. Pa sa bann Etidyan Labib ti devoue!

Bann frer ki ti pe dirize ti travay dir pour donn bann piblikasyon baze lo Labib ek lankourazman tou bann Etidyan Labib

8. Ki mannyer bann frer ki ti pe dirize ti fortifye bann Etidyan Labib pandan Premye Lager Mondyal?

8 Pandan Premye Lager Mondyal, bann frer ki ti pe dirize ti travay dir pour donn bann piblikasyon baze lo Labib ek lankourazman tou bann Etidyan Labib. Sa sipor ki zot ti ganny donnen avek lanmour ti fortifye zot pour kontinyen prese. Richard Barber, ki ti pe pres avek devouman pandan sa letan i dir: “Nou ti reisi ed detrwa sirveyan rezyonal kontinyen prese e fer ki Latour Veyer i kontinyen ganny distribye e fer ki i ganny anvoye Kanada kot i ti’n ganny enterdi.” I ti kontinyen: “Mon ti annan sa privilez pour poste bann pti kopi sa liv The Finished Mystery ki ti kapab met dan pos, pour bann zanmi ki zot kopi ti’n ganny konfiske. Frer Rutherford ti demande ki nou organiz bann lasanble dan detrwa lavil dan Was Leta-z-ini e anvoy bann orater pour ankouraz bann frer otan posib.”

SERTEN AZISTEMAN TI BEZWEN GANNY FER

9. (a) Akoz pep Bondye ti bezwen fer serten azisteman ant 1914 ek 1919? (b) Menm si zot ti bezwen fer serten azisteman, kwa ki i pa ti pou byen pour mazinen?

9 I ti annan serten azisteman ki bann Etidyan Labib ti bezwen fer. Zot pa ti vreman konpran parol Zeova ki dir ki zot devret obei bann gouvernman. (Romen 13:1) Sanmenm sa ki par ler, konman en group, zot ti pran kote pandan lager. Par egzanp, kan prezidan Leta-zi-ni ti demann bann dimoun pour priy pour lape le 30 Me 1918, Latour Veyer ti ankouraz bann Etidyan Labib pour zot osi priye. Serten frer ti donn sipor finansyel pour lager e serten parmi zot ti vin bann solda e al lager. Menm si zot ti bezwen fer serten azisteman, i pa ti pou byen pour mazinen ki sa i rezon ki zot ti ganny anmennen an egzil dan Gran Babilonn. Anfet, zot ti’n preski separ konpletman avek fo larelizyon pandan Premye Lager Mondyal.Lir Lik 12:47, 48.

Bann Etidyan Labib pa ti vreman konpran ki savedir pour en Kretyen pa pran kote, me zot ti konnen ki i pa byen pour touy en dimoun

10. Ki mannyer bann etidyan Labib ti demontre respe pour lavi?

10 I vre ki bann Etidyan Labib pa ti vreman konpran ki savedir pa pran kote dan bann zafer sa lemonn, me zot ti konnen ki i mal pour touy en dimoun. Alor, menm si sa detrwa frer ti vin solda e anmenn zouti lager pandan Premye Lager Mondyal, zot ti refize servi sa bann zouti pour touy en lot dimoun. Serten ki pa ti oule fer sa ti ganny anvoye lo fron batay pour ki zot ganny touye.

11. Ki mannyer gouvernman ti reazir ler bann Etidyan Labib ti refize lager?

 11 Dyab ti ankoler akoz sa bann frer ti fidel avek Bondye. Sa ti fer ki i ti “konplote o non lalwa.” (Psonm 94:20, NWT) James Franklin Bell, en zeneral larme, Leta-z-ini, ti dir avek Frer Rutherford ek Van Amburgh ki gouvernman ti’n esey fer en nouvo lalwa, ki okenn dimoun ki refize partisip dan lager pour ganny santans lanmor. I ti pe dir sa pour bann Etidyan Labib. Sa zeneral ti vreman ankoler e i ti dir Frer Rutherford ki sa lalwa pa’n ganny pase akoz prezidan Leta-z-ini pa ti dakor. Apre sa zeneral ti dir: “Me nou konnen ki mannyer pour ganny zot e nou pou fer li!”

12, 13. (a) Akoz wit frer ti ganny kondannen pour bokou letan dan prizon? (b) Eski prizon ti fer sa bann frer perdi zot determinasyon pour obeir Zeova? Eksplike.

12 Gouvernman ti finalman trouv en fason pour pini bann Etidyan Labib. Frer Rutherford ek Van Amburgh, ansanm avek sis lezot frer ki ti reprezantan Watch Tower Society ti ganny arete. Sa ziz ki ti ansarz sa ka ti dir ki sa bann frer ti pli danzere ki en gran group solda Alman. I ti dir ki zot ti’n komet en lofans grav kont gouvernman, larme ek tou bann legliz e ki zot devret ganny pini severman.  [1] (Vwar lezot not.) Alor sa wit Etidyan Labib ti ganny kondannen pour bokou letan dan prizon Atlanta, Georgia, Leta-z-ini. Par kont, ler lager ti fini, zot ti ganny large e bann sarz kont zot ti ganny tire.

13 Menm ler zot ti dan prizon, sa wit zonm ti determinen pour obeir lalwa Bondye. Ki mannyer nou konn sa? Zot ti ekrir prezidan Leta-z-ini pour ki zot ganny large dan prizon. Dan sa let zot  ti dir ki Labib i dir ki nou pa devret touy lezot, alors okenn dimoun ki dedye li avek Bondye e ki volonterman dezobei li pou perdi son laprouvasyon e ganny detri. Zot ti eksplike ki sa ti rezon akoz zot pa ti kapab e pa pou kapab touy okenn imen. Zot ti fer en keksoz brav ler zot ti ekri sa prezidan. Sa bann frer pa ti pou zanmen perdi zot determinasyon pour obei Zeova.

PEP BONDYE TI FINALMAN GANNY LIBERE!

14. Atraver Labib dekrir sa ki ti arive depi 1914 ziska 1919.

14 Malaki 3:1-3 i eksplike ki ti arive avek bann Etidyan Labib ant 1914 e konmansman 1919. (Lir.) [2] (Vwar lezot not.) Zeova, “sa vre Senyer” e Zezi Kri “mesaze lalyans” ti vin enspekte “bann garson Levi” ki ti reprezant bann Kretyen swazir. Apre ki Zeova ti’n fer serten azisteman e pirifye zot, zot ti pare pour ganny en nouvo responsabilite. An 1919, Zezi ti apwent en “lesklav fidel e pridan” ki ti ganny sa responsabilite pour gid e donn lenstriksyon bann serviter Bondye. (Matye 24:45) Pep Bondye ti finalman ganny libere avek Gran Babilonn. Depi sa letan, zot in kontinyen aprann plis lo lavolonte Bondye e zot lanmour pour li in vin pli gran. Pa zot rekonesan pour son benediksyon! [3]—Vwar lezot not.

15. Ki mannyer nou kapab demontre ki nou rekonesan ki nou’n ganny libere avek Gran Babilonn?

15 Nou vreman rekonesan ki nou’n ganny libere avek Gran Babilonn. Satan pa’n kapab detri vre ladorasyon. Pa son plan in tonm dan delo! Par kont, nou bezwen rapel akoz Zeova in liber nou. Son plan i ki tou dimoun i ganny sove. (2 Korentyen 6:1) Me fo larelizyon i ankor pe kontrol plizyer milyon dimoun senser e zot bezwen nou led. Annou fer tou sa ki nou kapab pour imit nou bann frer fidel e ed bann dimoun ganny libere.

^ [1] (paragraf 12) Vwar Faith on the March, par A. H. Macmillan, paz 99.

^ [2] (paragraf 14) Malaki 3:1-3: 1 La sa ki Zeova bann larme in dir: ‘La, mon pe anvoy mon mesaze e i pou prepar en semen devan mwan. En sel kou, sa vre Senyer, ki zot pe rode, pou vin kot son tanp e sa mesaze lalyans, ki zot pran plezir ladan, pou vini. Me lekel ki pou andir sa zour ki i pou vini, e lekel ki pou tenir kan i aparet? Parski i pou parey dife en lorfev e parey savon bann blansisez. 3 E i devret asiz konman enn ki rafinen e netway larzan e i devret pirifye bann garson Levi, e i devret filtre zot parey lor ek larzan e zot a vin pour Zeova konman bann ki prezant en lofrann avek ladrwatir.’”

^ [3] (paragraf 14) I annan bokou similarite ant bann Zwif ki ti an egzil Babilonn ek sa ki ti arive avek bann Kretyen apre ki lapostazi ti konmanse. Par kont, nou pa kapab dir ki legzil bann Zwif i reprezant sa ki ti arive avek bann Kretyen swazir, alor nou pa devret esey rod en sinifikasyon profetik dan tou son bann detay. I annan serten diferans. En legzanp i ki bann Zwif ti an egzil pour 70 an, me bann Kretyen ti an egzil pour bokou plis letan ki sa.