Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  November 2016

“Kontinyen ankouraz kanmarad sak zour”

“Kontinyen ankouraz kanmarad sak zour”

“Si zot annan okenn keksoz pour dir pour ankouraz nou, koze.”AKT 13:15.

KANTIK: 121, 45

1, 2. Akoz i enportan pour ankouraz lezot?

CHRISTINA, ki annan 18 an i dir: “I byen rar ki mon paran i ankouraz mwan, par kont zot kritik mwan en kantite. Zot kapab dir bann parol ki vreman bles mwan. Zot dir ki mon pa ase matir, mon pa pou zanmen kapab aprann nanryen e ki mon tro gro. Souvan, mon zis plere e pa koz avek zot. Mon santi ki mon pa vo nanryen.” [1] (Vwar lezot not.) Lavi i kapab vreman difisil ler lezot pa ankouraz nou!

2 De lot kote, zis mazinen ki kantite nou kapab ed lezot ler nou ankouraz zot. Rubén i dir: “Mon’n lite avek sa santiman ki mon pa vo nanryen pour plizyer lannen. Me en zour, ler mon ti pe prese avek en ansyen, i ti vwar ki mon pa ti tro byen, alor i ti ekout mwan koz lo mon bann santiman e i ti senpatiz avek mwan. Apre, i ti fer mwan mazin bann bon keksoz ki mon ti pe fer. I ti osi fer mwan rapel parol Zezi ki montre ki mon annan plis  valer ki en kantite sren. Mon souvan mazin sa verse e i ankor pe tous mon leker. Parol sa ansyen ti fer en gran diferans dan mon lavi.”Matye 10:31.

3. (a) Ki zapot Pol ti dir konsernan ankouraz lezot? (b) Ki nou pou diskite dan sa lartik?

3 Labib i dir ki nou bezwen kontinyen ankouraz kanmarad. Zapot Pol ti ekri bann Kretyen Ebre: “Mon bann frer, fer byen atansyon ki zot pa zanmen devlop en move leker ki mank lafwa par elwanny zot avek sa Bondye vivan. Me kontinyen ankouraz kanmarad sak zour.” Pol ti eksplike akoz: “Pour ki personn parmi zot pa les son leker vin dir avek pouvwar pese ki anbet dimoun.” (Ebre 3:12, 13) Zis mazinen ki mannyer ou ti santi ler en dimoun ti ankouraz ou. Alor, ki bann rezon nou annan pour ankouraz nou bann frer ek ser? Ki nou kapab aprann avek legzanp Zeova, Zezi ek Pol lo konman pour ankouraz lezot? Ki serten fason nou kapab ankouraz lezot? Annou diskit lo sa bann kestyon.

NOU TOU NOU BEZWEN GANNY ANKOURAZE

4. Lekel ki bezwen ganny ankouraze? Akoz bokou dimoun pa ankouraz kanmarad ozordi?

4 Nou tou nou bezwen ganny ankouraze, me i annan en bezwen spesyal pour bann paran ankouraz zot zanfan. Timothy Evans, en ansenyan, i eksplike ki bann zanfan “i bezwen lankourazman parey bann plant i bezwen delo.” I osi dir: “Ler en zanfan i ganny ankouraze, i santi ki i annan valer e ki i ganny apresye.” Vi ki nou pe viv “dan dernyen zour,” bokou dimoun i egois e napa “lanmour” pour kanmarad. (2 Timote 3:1-5) Serten paran pa ankouraz zot zanfan akoz zot prop paran pa ti ankouraz zot. Bann adilt i osi bezwen ganny ankouraze, me souvan sa pa arive. Par egzanp, bokou i konplent ki zot pa zanmen ganny felisite pour sa ki zot fer dan zot travay.

Felisit lezot pour en keksoz ki zot in byen fer

5. Ki mannyer nou kapab ankouraz lezot?

5 Nou kapab ankouraz lezot par felisit zot pour en keksoz ki zot in byen fer. Nou kapab osi ankouraz zot par dir zot ki zot annan bann zoli kalite e konsol zot ler zot dekouraze oubyen dan sagrinasyon. (1 Tesalonisyen 5:14) Vi ki nou souvan avek nou bann frer ek ser, sa i donn nou bokou loportinite pour dir en pti keksoz ankourazan avek zot. (Lir Eklezyast 4:9, 10.) Alor demann ou lekor: ‘Eski mon fer lezot konnen akoz ki mon apresye e kontan zot? Eski mon fer sa sak fwa ki i annan en loportinite?’ Mazin sa ki Labib i dir: “Pa i vreman bon en parol ki’n ganny dir dan en moman apropriye!”Proverb 15:23.

6. Akoz Satan i anvi dekouraz pep Bondye? Donn en legzanp lo ki mannyer i ti esey fer sa.

6 Proverb 24:10 i dir: “Si ou dekouraze  dan letan ladetres, ou lafors pou ptigin.” Satan i konnen ki si i dekouraz nou, i pou kapab gat nou relasyon avek Zeova. I ti esey dekouraz Zob par fer li soufer en kantite, me i pa ti reisi akonpli son plan. Zob ti reste fidel avek Zeova. (Zob 2:3; 22:3; 27:5) Nou osi nou kapab lite kont Satan pour ki i pa reisi dekouraz nou. Si nou kontinyen ankouraz nou fanmir ek nou bann frer ek ser dan kongregasyon, nou pou kapab ed kanmarad pour ere e reste pros avek Zeova.

BANN LEGZANP KI NOU KAPAB IMITE

7, 8. (a) Ki mannyer Zeova in ankouraz bann dimoun? (b) Ki mannyer bann paran i kapab imit legzanp Zeova? (Vwar portre lo paz 3.)

7 Zeova i ankouraz bann dimoun. En psalmis ti ekri: “Zeova i pre avek sa bann ki annan leker brize e i sov bann ki dekouraze.” (Psonm 34:18, not dan NWT) Ler profet Zeremi ti per e dekouraze, Zeova ti promet pour ed li. (Zeremi 1:6-10) Zeova ti anvoy en lanz pour fortifye Danyel, sa profet aze. Sa lanz ti dir Danyel: “Ou ki Bondye i kontan.” (Danyel 10:8, 11, 18, 19) Pareyman, eski ou ti kapab ankouraz ou bann frer ek ser, bann pionye ek bann aze ki pa kapab fer otan ki zot ti abitye fer?

Paran, ed ou zanfan pour fer fas avek bann leprev kot lekol

8 Menm si Zeova ek Zezi ti’n viv ansanm pour en kantite lannen, Zeova ti konnen ki i ti bezwen ankouraz son Garson ler i ti lo later. Zezi ti tann son Papa koze dan lesyel ler i ti konmans son minister e pandan son dernyen lannen lo later. De fwa, Zeova ti dir: “Sa i mon Garson ki mon kontan ki mon’n aprouve.” (Matye 3:17; 17:5) Sirman Zezi ti ganny ankouraze ler i ti tann son Papa dir ki i ti kontan li e ki i ti fyer pour annan en garson parey li. Pli tar, sa zour swar avan ki i ti mor, Zezi ti pe trakase. Zeova ti anvoy en lanz pour fortifye e konsol li. (Lik 22:43) Paran, ou kapab imit legzanp Zeova par regilyerman ankouraz ou zanfan. Felisit zot ler zot fer en bon keksoz. Ler zot pe fer fas avek bann leprev kot lekol, fer tou sa ki ou kapab pour fortifye e ed zot pour andire.

9. Ki nou kapab aprann avek fason ki Zezi ti tret son bann zapot?

9 Zezi osi in kit en bon legzanp pour nou imite. Sa zour swar avan i ti mor, i ti lav lipye son bann zapot e dir zot ki i enportan pour annan limilite. Me zot ti orgeye e argimante lo lekel ki ti pli enportan, Pyer ti menm vant son lekor e dir ki i pa pou zanmen abandonn Zezi. (Lik 22:24, 33, 34) Par kont, Zezi pa ti konsantre lo zot fot. O kontrer, i ti felisit zot pour reste fidel avek li. I ti promet zot ki zot ti pou fer en pli gran keksoz ki li e i ti asir zot ki Zeova i kontan zot. (Lik 22:28; Zan 14:12; 16:27) Sakenn  parmi nou i kapab demann son lekor, ‘Eski mon imit legzanp Zezi par felisit lezot pour zot bon kalite dan plas konsantre lo zot fot?’

10, 11. Ki mannyer Pol ti ankouraz son bann frer e ki i ti pare pour fer?

10 Zapot Pol ti souvan dir bann bon keksoz lo son bann frer. I ti’n voyaz avek zot pour plizyer lannen e menm si i ti’n konn zot byen, i pa ti ekri konsernan zot bann defo. O kontrer, i ti felisit zot. Par egzanp, Pol ti dir sa konsernan Timote, sa i “mon garson ki mon kontan e ki fidel dan Senyer.” I ti annan konfyans ki Timote ti pou pran swen avek lezot. (1 Korentyen 4:17; Filipyen 2:19, 20) Pol ti dir sa avek bann Kretyen Korent konsernan Tit: “Li ki akonpanny mwan e travay ansanm avek mwan pour zot byennet.” (2 Korentyen 8:23) Pa Timote ek Tit ti’n bezwen ganny ankouraze ler zot ti konn sa ki Pol ti’n dir lo zot!

11 Pol ek Barnabas ti met zot lavi an risk pour ankouraz zot bann frer ek ser. Par egzanp, tou le de ti konnen ki bann dimoun dan lavil Lis ti anvi touy zot, me kantmenm sa, zot ti retourn laba pour ankouraz bann nouvo disip e ed zot pour reste fidel avek Zeova. (Akt 14:19-22) En lot fwa, ler zot ti Efez, menm si Pol ti an danze akoz en lafoul ankoler, i ti reste ase letan laba pour ankouraz son bann frer. Akt 20:1, 2 i dir: “Pol ti fer bann disip vin kot li. Apre ki i ti’n ankouraz zot, i ti dir zot orevwar e i ti konmans son vwayaz pour al Masedwann. Apre ki i ti’n travers dan sa bann rezyon e ankouraz bann ki ti laba en kantite, i ti ariv Lagres.”

ANKOURAZ KANMARAD

12. Akoz i bon asiste bann renyon?

12 Zeova i anvi sa ki pli bon pour nou. Se pour sa rezon ki i dir nou zwenn ansanm regilyerman. Dan nou bann renyon, nou aprann konn li e nou ankouraz kanmarad. (1 Korentyen 14:31; lir Ebre 10:24, 25.) Christina, ki’n ganny mansyonnen o konmansman sa lartik i dir: “Sa ki mon pli kontan konsernan bann renyon i sa lanmour ek lankourazman ki mon gannyen. Par ler mon vin Lasal Rwayonm avek depresyon. Me apre sa, bann ser i apros mwan, anbras mwan, e dir ki mon zoli. Zot dir ki zot kontan mwan e ki zot kontan mon bann progre spirityel. Zot lankourazman i fer mwan santi mwan bokou pli byen! Alor, pa i enportan ki sakenn parmi nou i ankouraz lezot!Romen 1:11, 12.

13. Akoz menm bann ki’n servi Zeova pour en bon pe letan i bezwen ganny ankouraze?

13 Menm bann ki’n servi Zeova pour en bon pe letan i bezwen ganny ankouraze. Mazin Zozye, ler bann Izraelit ti pros pour antre dan Later Promiz, Zeova ti swazir li pour diriz zot. Me kantmenm sa, Zeova ti demann Moiz pour ankouraz li menm si i ti’n servi Zeova pour plizyer lannen. Zeova ti dir: “Donn ou lord Zozye, ankouraz li, rann li for, akoz li menm ki pou diriz le pep e donn li patrimwann  sa pei ki i pou war.” (Deterononm 3:27, 28) I ti neseser pour Zozye ganny ankouraze, parski pli tar, sa nasyon ti pou pran par dan plizyer batay e menm perdi omwen enn. (Zozye 7:1-9) Ozordi, nou kapab ankouraz bann ansyen ek sirveyan rezyonal ki travay dir pour pran swen avek pep Bondye. (Lir 1 Tesalonisyen 5:12, 13.) En sirveyan rezyonal ti dir: “Par ler, bann frer i donn nou en let remersiman pour dir ki kantite zot in apresye nou vizit. Nou gard sa bann let e lir zot ler nou santi nou dekouraze. Zot vreman en sours lankourazman.”

Nou ed nou bann zanfan pour vin pli pros avek Zeova par ankouraz zot (Vwar paragraf 14)

14. Ki legzanp ki montre ki i byen pour felisit lezot ler nou pe donn zot konsey?

14 En fwa, Pol ti bezwen konsey bann Korentyen. Ler zot ti aplik son konsey, i ti felisit zot. (2 Korentyen 7:8-11) Sirman, son bann parol ti ankouraz zot pour kontinyen fer sa ki byen. Ozordi, bann ansyen ek paran i kapab swiv legzanp Pol. Andreas ki annan de zanfan i dir: “Lankourazman i ed bann zanfan pour grandi spirityelman e emosyonnelman. Nou fer tou pour ankouraz zot pour ki zot aksepte konsey. Menm si nou zanfan i konn sa ki byen, fer sa ki byen i vin zot fason viv e zot pou fer sa si zis nou kontinyen ankouraz zot.”

KWA KI KAPAB ED OU POUR ANKOURAZ LEZOT?

15. Donn en fason ki nou kapab ankouraz lezot.

15 Dir bann frer ek ser ki ou apresye bokou zot zefor e zot bann bon kalite. (2 Kronik 16:9; Zob 1:8) Ler nou fer sa, nou pe imit Zeova ek Zezi. Sa ki nou fer i annan en gran valer pour zot, menm si nou pa kapab fer otan ki nou ti a voudre. (Lir Lik 21:1-4; 2 Korentyen 8:12.) Par egzanp, nou konnen ki i demann bokou zefor pour nou bann aze vin renyon e prese regilyerman. Eski nou ankouraz e felisit zot pour tou sa ki zot fer?

16. Kan ki nou kapab ankouraz lezot?

16 Ankouraz lezot otan ki nou kapab. Ler ou vwar en dimoun fer en bon keksoz, fer sir ki ou felisit li. Ler Pol ek Barnabas ti Antyos, Pisidi, bann sef sinagog ti dir zot: “Bann  frer, si zot annan okenn keksoz pour dir pour ankouraz nou, koze.” Pol ti servi sa loportinite pour ankouraz bann dimoun. (Akt 13:13-16, 42-44) Ler nou ankouraz lezot, i tre probab ki lezot pou ankouraz nou osi.Lik 6:38.

17. Ki sa pli bon fason ankouraz lezot?

17 Nou devret spesifik. Ler Zezi ti felisit bann Kretyen Tyatir, i ti spesifik e i ti eksplike kwa ki zot ti’n fer byen. (Lir Revelasyon 2:18, 19.) Ki mannyer nou kapab imit li? Petet nou kapab felisit en manman tousel ki pe byen elve son bann zanfan menm si i difisil. Si ou en paran, felisit ou bann zanfan pour zefor ki zot fer pour servi Zeova. Eksplik zot bann bon keksoz ki ou’n remarke zot pe fer. Si nou spesifik ler nou ankouraz lezot, zot pou konnen ki nou serye dan sa ki nou dir.

18, 19. Ki mannyer nou kapab ed kanmarad pour reste pros avek Zeova?

18 Zeova ti dir Moiz ankouraz e fortifye Zozye. Byensir ozordi Zeova pa pou dir nou ankouraz en dimoun spesifik, me i kontan ler i vwar zefor ki nou pe fer pour ankouraz lezot. (Proverb 19:17; Ebre 12:12) Par egzanp, ler en frer i fer en diskour dan nou kongregasyon, nou kapab dir li kwa ki nou’n apresye dan son diskour. Petet i’n dir en keksoz ki’n ed nou fer fas avek en problenm oubyen konpran en verse Labib. En ser ti ekri en frer ki ti’n fer en diskour: “Menm si nou ti koz avek kanmarad zis pour detrwa minit, ou ti vwar ki mon ti tris e ou ti konsol e relev mwan. Mon anvi ki ou konnen ki ler ou koz zantiman dan ou diskour e avek mwan, mon santi ki i ti en kado sorti kot Zeova.”

19 Nou pou kapab ed kanmarad pour reste pros avek Zeova si nou swiv konsey Pol: “Kontinyen ankouraz kanmarad e batir kanmarad zis parey zot pe deza fer li.” (1 Tesalonisyen 5:11) Si nou “kontinyen ankouraz kanmarad sak zour,” nou pou fer Zeova kontan!

^ [1] (paragraf 1) Non in sanze.