Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  May 2016

Profit plennman bann provizyon sorti kot Zeova

Profit plennman bann provizyon sorti kot Zeova

“Mwan [Zeova] ou Bondye. Mon ansenny ou pour ou prop dibyen.”IZAI 48:17.

KANTIK: 117, 114

1, 2. (a) Ki mannyer Temwen Zeova i santi konsernan Labib? (b) Ki parti Labib ou prefere?

KONMAN Temwen Zeova, nou kontan Labib. I donn nou rekonfor, lespwar ek lenstriksyon ki nou kapab annan konfyans ladan. (Romen 15:4) I pa en liv avek bann nide zonm, me i “Parol Bondye”1 Tesalonisyen 2:13.

2 I tre probab, ki nou tou nou annan en parti Labib prefere. Serten i kontan bann Levanzil, parski zot montre sa zoli personnalite Zeova atraver Zezi. (Zan 14:9) Lezot i pli kontan bann liv profetik tel parey Revelasyon, ki montre nou “sa ki devre arive byento.” (Revelasyon 1:1) Serten i ganny rekonforte ler zot lir bann Psonm e lezot i kontan lir bann konsey pratik dan liv Proverb. I kler alor, ki Labib i en liv pour tou dimoun.

3, 4. (a) Ki mannyer nou santi konsernan nou bann piblikasyon? (b) Ki bann piblikasyon ki nou gannyen pour diferan group dimoun?

3 Vi ki nou kontan Labib, nou osi kontan nou bann piblikasyon ki baze lo Parol Bondye. Tou bann liv, brosir, magazin ek lezot piblikasyon ki nou gannyen i bann  provizyon sorti kot Zeova. Zot ed nou pour reste pros avek li e pour gard nou lafwa solid.Tit 2:2.

4 Laplipar nou bann piblikasyon in ganny ekrir pour Temwen Zeova an zeneral. Par kont, i annan serten piblikasyon ki ganny ekrir pour bann group spesifik, parey bann zenn ouswa bann paran. Laplipar nou bann lartik ek video lo nou sit Enternet, i ganny fer espesyalman pour dimoun ki pa Temwen Zeova. Tou sa varyete keksoz i montre ki Zeova in gard son promes pour donn tou dimoun en kantite lenstriksyon.Izai 25:6.

5. Ki nou kapab asire Zeova i apresye?

5 Laplipar parmi nou ti pou kontan pour annan plis letan pour lir Labib ek nou bann piblikasyon. Alor, nou pa kapab pas menm kantite letan pour etidye tou piblikasyon ki nou gannyen. Nou kapab asire ki Zeova i pran plezir dan nou ler nou servi byen nou letan pour lir e etidye Labib ek nou bann piblikasyon. (Efezyen 5:15, 16) Par kont, i annan en danze ki nou devret fer atansyon avek. Ki sa danze?

6. Kwa ki kapab anpes nou profit serten provizyon spirityel ki sorti kot Zeova?

6 Si nou pa fer atansyon, nou kapab krwar ki serten parti Labib ouswa serten piblikasyon pa aplik pour nou. Par egzanp, ki arive si i paret ki en parti Labib pa aplikab dan nou sityasyon? Oubyen, ki arive si sa piblikasyon pa prensipalman aplik pour nou sityasyon? Eski nou zis pas vitman lo sa lenformasyon oubyen nou pa lir li ditou? Si wi, nou kapab pe mank bann lenformasyon ki pour nou prop dibyen. Ki mannyer nou kapab evit sa danze? Nou devret mazinen ki tou sa bann lenformasyon nou gannyen i sorti kot Zeova. Dan Labib nou lir: “Mwan [Zeova], ou Bondye. Mon ansenny ou pour ou prop dibyen.” (Izai 48:17) Dan sa Lartik, nou pou diskit lo trwa sizesyon ki pou ed nou servi tou provizyon ki Zeova in donn nou pour nou prop dibyen.

SIZESYON POUR NOU PROP DIBYEN AVEK LEKTIR LABIB

7. Akoz nou bezwen lir Labib avek en lespri ouver?

7 Lir avek en lespri ouver. I vre ki serten parti Labib ti ganny ekrir pour en dimoun spesifik ouswa en group dimoun. Par kont, Labib i dir klerman ki “Tou Lekritir i enspire par Bondye e i itil.” (2 Timote 3:16) Sanmenm rezon akoz nou devret annan en lespri ouver ler nou lir Labib. Vi ki en frer ti toultan mazinen ki i kapab aprann detrwa leson dan zis en resi Labib, sa ti ed li pour retir serten leson ki pa ti tro evidan. Alor, avan ki nou lir Labib, nou devret demann Zeova pour donn nou en lespri ouver ek lasazes pour konpran bann leson ki i anvi nou aprann.Ezra 7:10; lir Zak 1:5.

Eski ou pe ganny bann byenfe avek ou lektir Labib? (Vwar paragraf 7)

8, 9. (a) Ler nou lir Labib, ki kestyon nou kapab demann nou lekor? (b) Ki nou aprann lo Zeova konsernan kalifikasyon pour vin en ansyen?

8 Demann bann kestyon. Ler ou lir Labib, fer en poz e demann ou lekor sa bann kestyon swivan: ‘Ki sa pe dir mwan lo Zeova? Ki mannyer mon kapab  servi sa bann lenformasyon dan mon lavi? Ki mannyer mon kapab servi sa lenformasyon pour ed lezot?’ Ler nou medit lo sa bann kestyon, nou pou tir plis byenfe dan nou lektir Labib. Annou vwar en legzanp. Labib i dekrir serten kalifikasyon ki bann ansyen i bezwen annan. (Lir 1 Timote 3:2-7.) I vre ki laplipar parmi nou pa en ansyen, alor nou kapab krwar ki sa lenformasyon pa kapab itil pour nou. Par kont, annou servi sa trwa kestyon ki’n ganny mansyonnen pli boner, pour vwar ki mannyer sa lalis kalifikasyon i kapab ed nou tou.

9 “Ki sa pe dir mwan lo Zeova?” Zeova in donn nou ase lenformasyon pour kalifye konman ansyen. I annan en standar o nivo pour sa bann zonm ki pran swen avek kongregasyon. Sa i montre ki kongregasyon i presye pour Zeova. Labib i dir ki i’n aste kongregasyon avek “disan son prop Garson.” (Akt 20:28) Alor, Zeova i ekspekte ki bann ansyen i bann bon legzanp e zot bezwen rann li kont pour lafason ki zot tret bann manm kongregasyon. I anvi ki nou santi nou an sekirite e ki sa bann zonm i pran byen swen avek nou. (Izai 32:1, 2) Ler nou lir konsernan kalifikasyon en ansyen, nou aprann ki mannyer Zeova i pran swen avek nou.

Zeova i ekspekte ki sakenn parmi nou i rezonnab e servi bon zizman

10, 11. (a) Ler nou pe lir lalis kalifikasyon vin ansyen, ki mannyer nou kapab aplik sa bann lenformasyon dan nou lavi? (b) Ki mannyer nou kapab servi sa bann lenformasyon pour ed lezot?

 10 “Ki mannyer mon kapab servi sa lenformasyon dan mon lavi?” Si ou en ansyen, tanzantan ou devret repas lo sa lalis kalifikasyon e esey amelyore. Si ou pe “fer zefor pour kalifye pour vin en sirveyan” ou devret fer ou mye pour kalifye. (1 Timote 3:1, NW) Me tou Kretyen i kapab aprann avek sa lalis kalifikasyon. Par egzanp, Zeova i ekspekte ki sakenn parmi nou i rezonnab e servi bon zizman. (Filipyen 4:5; 1 Pyer 4:7) Ler bann ansyen i “en model pour troupo,” nou kapab aprann avek zot e “imit zot lafwa.”1 Pyer 5:3; Ebre 13:7.

11 Ki mannyer mon kapab servi sa lenformasyon pour ed lezot?” Nou kapab servi sa lalis kalifikasyon pour ed bann etidyan Labib ek lezot ki enterese, pour konpran ki mannyer bann ansyen i diferan avek bann sef relizye. Sa lalis i osi kapab ed nou pour rapel bann travay dir ki bann ansyen i fer dan nou kongregasyon. Sa an retour pou ed nou annan respe pour sa bann frer. (1 Tesalonisyen 5:12) Pli nou annan respe pour zot, pli zot pou desarz zot responsabilite avek lazwa.Ebre 13:17.

12, 13. (a) An servan bann zouti ki nou annan, ki kalite resers nou kapab fer? (b) Donn en legzanp lo ki mannyer bann lenformasyon detaye i kapab revel bann leson ki pa evidan.

12 Fer resers. Ler nou etidye Labib, nou kapab rod bann larepons pour sa bann kestyon swivan:

  • Lekel ki’n ekri sa parti Labib?

  • Kote e kan i’n ganny ekrir?

  • Ki levennman enportan ki ti pe arive ler sa liv ti ganny ekrir?

Bann lenformasyon koumsa i kapab ed nou pour vwar bann leson ki pa tro evidan.

13 Par egzanp, Ezekyel 14:13, 14 i dir: “Kan zabitan en pei i fer pese kont mwan e zot enfidel anver mwan, mon pou azir kont zot. Mon pou detri zot sours manze e anvoy lafamin kont zot. Mon pou fer disparet bann imen osi byen ki bann zannimo. Menm si sa trwa zonm i parmi zot: Noe, Danyel ek Zob, zis zot ki ava sov zot lavi, par zot fidelite, Senyer [Zeova] ki deklare.” Si nou fer en pe resers, nou aprann ki Ezekyel ti ekri sa bann parol apepre 612 lannen avan Zezi Kri. Noe ek Zob ti’n fini mor depi plizyer santenn lannen, me Zeova i ankor rapel zot fidelite. Danyel par kont, ti ankor vivan. I tre probab ki i ti annan apepre 20 an ler Zeova ti dir ki i ti en zonm drwat, parey Noe ek Zob. Ki nou aprann? Zeova i vwar valer tou son bann serviter fidel enkli bann zenn.Psonm 148:12-14.

 TIR BYENFE DAN SA VARYETE PIBLIKASYON

14. Ki mannyer bann piblikasyon pour bann zenn i ed bann zenn e ki mannyer i ed lezot osi? (Vwar portre lo paz 27.)

14 Piblikasyon pour bann zenn. Nou’n aprann ki nou kapab ganny byenfe dan tou bann parti Labib. Dan menm fason, nou kapab ganny byenfe dan tou nou bann piblikasyon. Annou vwar detrwa legzanp. Tou dernyenman, Zeova in donn bann zenn bokou lenformasyon. [1] (Vwar lezot not.) Sa bann lenformasyon i ed zot pour fer fas avek bann presyon kot lekol ek bann sanzman ler zot pe grandi. Ki mannyer nou tou nou kapab tir byenfe ler nou lir sa bann lartik ek liv? Ler nou lir sa bann lenformasyon, nou aprann lo bann problenm ki zenn i annan e i pli fasil pour kapab ed e ankouraz zot.

Bann Kretyen pli aze pa devret krwar ki zot pa bezwen lir bann lenformasyon pour zenn

15. Akoz bann Kretyen pli aze i devret enterese avek bann lenformasyon ki pour zenn?

15 Bann Kretyen pli aze pa devret krwar ki zot pa bezwen lir bann lenformasyon pour zenn. Laplipar problenm ki ganny diskite dan sa bann lartik pour zenn, i annan en lefe lo tou Kretyen. Par egzanp, nou tou nou bezwen defann nou krwayans, annan kontrol lo nou lemosyon, pa les lezot met presyon lo nou e evit bann move frekantasyon ek divertisman. Alor, kantmenm sa bann piblikasyon in ganny ekrir pour bann zenn, sa bann lenformasyon i sorti dan Labib e sa i kapab anmenn byenfe pour tou Kretyen.

16. Kwa ankor ki nou bann piblikasyon i ed bann zenn pour fer?

16 Bann piblikasyon ki’n ganny ekrir pour bann zenn i kapab osi ed zot pour ranforsi zot lanmitye avek Zeova. (Lir Eklezyast 12:1, 13.) Bann adilt osi i kapab servi sa bann piblikasyon pour zot prop byenfe. Par egzanp, dan Awake! Avril 2009, i ti annan en lartik lo “Young People Ask . . . How Can I Make Bible Reading Enjoyable?” Dan sa lartik i ti annan detrwa sizesyon e en bwat ki ti kapab ganny dekoupe, anmase e servi pour etidye. Eski bann adilt in ganny byenfe avek sa lartik? En manman ti dir ki lir Labib ti toultan difisil pour li. Me i ti servi bann sizesyon dan sa lartik e la prezan i kontan pour lir Labib. I dir ki i kontan vwar ki mannyer bann liv Labib i relye avek kanmarad e zot form en zoli portre. I ti azoute, “Mon pa’n zanmen eksite koumsa pour lir Labib.”

17, 18. Ki byenfe nou gannyen ler nou lir sa ki’n ganny ekrir pour piblik? Donn en legzanp.

17 Piblikasyon pour piblik. Depi 2008 nou pe apresye edisyon letid Latour Veyer. Sa edisyon in ganny ekrir sirtou pour bann Temwen Zeova, me nou osi annan bann magazin ki espesyalman pour piblik. Ki byenfe nou osi nou kapab gannyen avek sa bann  magazin? Annou pran en legzanp. Ler ou envit en dimoun Lasal Rwayonm, pa ou eksite ler ou vwar li vini! Pandan ki orater pe fer son diskour, ou mazin ou envite. Ou pe mazinen ki mannyer sa dimoun i santi konsernan tou sa ki i pe tande e ki mannyer sa bann lenformasyon i kapab sanz son lavi. Pour fini kont, ou leker i ganny touse e ou vin pli rekonesan pour sa bann lenformasyon ki ou tande.

18 Menm keksoz i kapab arive avek nou ler nou lir piblikasyon ki’n ganny ekrir pour piblik. Par egzanp, edisyon piblik Latour Veyer ek bann lartik lo jw.org i eksplik Labib an servan bann mo ek lekspresyon ki fasil pour konpran. Ler nou lir sa bann lenformasyon, nou aprofondir nou konnesans ek lanmour pour laverite dan Labib ki nou deza konnen. Nou osi kapab aprann bann nouvo fason pour eksplik nou krwayans dan predikasyon. Dan menm fason, magazin Awake! i ranforsi nou krwayans ki i annan en Kreater. I osi ed nou pour aprann ki mannyer pour defann nou krwayans.Lir 1 Pyer 3:15.

19. Ki mannyer nou kapab demontre nou rekonesans anver Zeova pour son bann provizyon?

19 I kler ki Zeova in donn nou bokou konsey ek lenstriksyon pour nou prop dibyen. (Matye 5:3, NW) Annou kontinyen lir e aplik tou lenformasyon ki i’n donn nou. Si nou fer sa, nou pou ganny bann byenfe e nou pou montre Zeova ki nou rekonesan pour tou son bann provizyon.Izai 48:17.

^ [1] (paragraf 14) Sa lenformasyon i enkli Questions Young People Ask—Answers That Work, Volim 1 ek 2, e osi sa seri “Young People Ask,” ki deza lo Enternet.