Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  Mars 2018

Nou bezwen annan sa bon labitid pour demontre lospitalite!

Nou bezwen annan sa bon labitid pour demontre lospitalite!

“Demontre lospitalite anver kanmarad san konplent.”​—1 PYER 4:9.

KANTIK: 100, 87

1. Ki difikilte bann Kretyen ti fer fas avek dan premye syek?

ANT lannen 62 ek lannen 64, zapot Pyer ti ekri “bann rezidan tanporer . . . ki’n disperse Pon, Galasi, Kapados, Lazi ek Bitini.” (1 Pyer 1:1) Sa bann frer ek ser ti’n sorti dan diferan landrwa. Zot ti pe fer fas avek “bann gro leprev,” setadir persekisyon e zot ti bezwen lankourazman ek gidans. Zot ti osi pe viv pandan en letan vreman danzere. Pyer ti ekri: “Lafen tou keksoz in vin pli pros.” Dan mwens ki di-z-an, Zerizalenm ti pou ganny detrir. Kwa ki ti pou ed bann Kretyen partou kote pour andire pandan sa bann letan difisil?​—1 Pyer 4:4, 7, 12.

2, 3. Akoz Pyer ti ankouraz son bann frer ek ser pour demontre lospitalite? (Vwar portre o konmansman sa lartik.)

2 En keksoz ki Pyer ti ankouraz son bann frer ek ser pour fer se “demontre lospitalite anver kanmarad.” (1 Pyer 4:9) Sa mo Grek ki’n ganny tradwir konman “lospitalite” i literalman vedir “lafeksyon pour oubyen labonte anver bann etranze.” Me Pyer ti pe ankouraz son bann frer ek ser pour  demontre lospitalite “anver kanmarad,” menm si zot ti deza konn kanmarad e pe fer keksoz ansanm. Ki byenfe zot ti pou gannyen ler zot demontre lospitalite?

3 I ti pou fer zot vin pli pros avek kanmarad. Me ou? Eski ou rapel ler en dimoun ti envit ou kot li e zot ti pas en bon moman ansanm? Ler ou osi ou ti envit en dimoun kot ou, pa sa ti fer zot vin pli pros? En bon fason pour aprann konn nou bann frer ek ser i ler nou demontre lospitalite anver zot. Bann Kretyen ki ti viv dan letan Pyer ti bezwen vin pli pros avek kanmarad anmezir ki bann problenm ti vin pli pir. Dan sa “bann dernyen zour,” nou osi nou bezwen fer parey.​—2 Timote 3:1.

4. Ki bann kestyon nou pou reponn dan sa lartik?

4 Dan ki fason nou kapab demontre lospitalite “anver kanmarad”? Kwa ki kapab anpes nou demontre lospitalite e ki mannyer nou kapab amelyore? Kwa ki kapab ed nou pour azir konman bann bon envite?

BANN LOPORTINITE POUR DEMONTRE LOSPITALITE

5. Ki mannyer nou kapab demontre lospitalite dan nou bann renyon Kretyen?

5 Dan bann renyon: Zeova ek son lorganizasyon i envit nou pour asiste bann renyon. Nou anvi ki tou dimoun ki asiste nou bann renyon i santi ki zot in ganny byen resevwar, sirtou bann nouvo. (Romen 15:7) Zot osi zot bann envite Zeova, alor san pran kont zot laparans oubyen fason sanze, nou bezwen fer zot santi zot alez. (Zak 2:1-4) Si ou remarke ki en viziter i li tousel, eski ou kapab demann li pour asiz o bor ou? Petet i pou apresye si ou ed li konpran sa ki pou pase pandan renyon oubyen si ou ed li rod bann verse Labib ki pe ganny lir. Sa ti pou en bon fason pour met an pratik sa konsey: “Annan labitid pour demontre lospitalite.”​—Romen 12:13.

6. Anver lekel ki nou devret demontre plis lospitalite?

6 Pour en pti snak oubyen en repa: Dan letan Labib, souvandfwa dimoun ti demontre lospitalite par envit lezot pour en repa e sa ti montre ki zot ti anvi vin zanmi e annan lape antre zot. (Zenez 18:1-8; Ziz 13:15; Lik 24:28-30) Anver lekel ki nou devret demontre plis lospitalite? I devret anver nou bann frer ek ser dan kongregasyon. Anmezir ki sa lemonn i vin pli pir, nou pou bezwen depan lo nou bann frer ek ser e vin zot bann zanmi fidel. An 2011, Konsey Direkter ti sanz ler ki lafanmir Betel Leta-z-ini i fer zot Letid Latour Veyer. Olye 6:45 diswar zot ti met li pour 6:15 diswar. Akoz? Dan sa lanons ki ti ganny fer zot ti eksplike ki si sa renyon i fini pli boner, i tre probab ki sa ti pou fer li pli fasil pour bann Betelit aksepte e demontre lospitalite anver kanmarad. Lezot biro brans in osi fer parey. Sa in donn lafanmir Betel en bon loportinite pour aprann konn kanmarad.

7, 8. Ki mannyer nou kapab demontre lospitalite anver bann orater ki vin fer diskour dan nou kongregasyon?

7 Par ler bann frer ki sorti dan lezot kongregasyon, bann sirveyan rezyonal oubyen bann reprezantan sorti Betel i vin fer en diskour dan nou kongregasyon. Eski nou kapab servi sa bann lokazyon pour demontre lospitalite anver sa bann frer? (Lir 3 Zan 5-8.) En fason ki  nou kapab fer sa i ler nou envit zot kot nou pour en pti snak oubyen en repa.

8 En ser Leta-z-ini i rapel: “Diran bann lannen, mwan ek mon msye nou’n ganny sa loportinite pour demontre lospitalite anver plizyer orater ek zot madanm ler nou’n envit zot kot nou.” Sa ser i santi ki sak leksperyans ti ranforsi zot lafwa e ki an menm tan i ti gou. I dir: “Nou pa’n zanmen regret sa.”

9, 10. (a) Lekel ki bezwen en landrwa reste pour en pli gran peryod letan? (b) Eski bann frer ek ser ki annan en pti lakaz i kapab ede? Donn en legzanp.

9 Bann envite ki reste pour pli lontan: Dan letan Labib, i ti dan zot koutim pour donn serten viziter en landrwa reste. (Zob 31:32; Filemon 22) Ozordi, petet nou osi nou bezwen fer parey. Souvandfwa bann sirveyan rezyonal i bezwen en landrwa reste ler zot vizit bann kongregasyon. Sa i osi kapab leka pour bann etidyan ki pe asiste en lekol teokratik e osi pour bann volonter konstriksyon. I osi annan bann ki’n perdi zot lakour apre en dezas natirel. Petet zot bezwen en landrwa reste ziska ki zot lakaz i ganny rekonstrir. Nou pa devret prezimen ki zis bann frer ek ser ki annan gro lakaz ki kapab ede. Petet zot in deza fer sa plizyer fwa oparavan. Eski ou kapab ofer en dimoun en landrwa reste, menm si ou lakour i ptipti?

10 En frer Sid Kore i rapel ler bann etidyan ki ti pe asiste en lekol teokratik ti vin reste avek li. I ekri: “Premye kou mon ti ezite parski nou ti’n fek marye e nou ti pe reste dan en pti lakaz. Me nou ti vreman kontan pour annan bann etidyan pe reste avek nou. Konman en nouvo koup marye, nou ti kapab vwar ki kantite lazwa en koup i kapab annan ler zot servi Zeova e esey atenn bann lobzektif spirityel ansanm.”

11. Akoz bann ki fek vin dan ou kongregasyon i bezwen lospitalite?

11 Bann nouvo frer ek ser dan kongregasyon: I kapab ki serten frer ek ser oubyen fanmir sorti dan lezot kongregasyon i vin reste dan ou zanmirant. Petet zot in fer sa sanzman akoz ou kongregasyon i bezwen led. Oubyen petet zot bann pionye ki’n ganny anvoye pour servi dan ou kongregasyon. Sa i en gran sanzman pour zot. Zot pou bezwen adapte avek en nouvo teritwar, en nouvo kongregasyon e petet menm en nouvo langaz oubyen kiltir. Eski ou kapab envit zot pour pran en pti snak oubyen en repa ouswa pour zot al en landrwa ansanm? Sa pou ed zot fer bann nouvo zanmi e pour adapte avek zot nouvo sirkonstans.

12. Ki leksperyans ki montre ki ou pa bezwen prepar bokou keksoz pour demontre lospitalite?

12 Ou pa bezwen prepar bokou keksoz pour demontre lospitalite. (Lir Lik 10:41, 42.) En frer i rapel en keksoz ki ti arive ler li ek son madanm ti fek vin misyonner. I dir: “Nou ti zenn, nou ti napa leksperyans e nou ti mank se nou. En zour swar mon madanm ti vreman mank se nou e mon bann zefor pour ede pa ti pe abouti dan nanryen. Me apepre 7:30 diswar en dimoun ti tap nou laport. Nou ti vwar en etidyan Labib pe debout devan nou laport e i ti’n anmenn trwa zoranz. Sa fiy ti’n vin pour akeyir bann nouvo misyonner. Nou ti envit li anndan e donn li en ver delo. Apre nou ti bwar dite ek sokola so. Nou pa ti ankor konn langaz Swahili e i pa ti konn koz Angle.” Sa frer ti dir ki sa leksperyans ti ed zot konmans  fer zanmi avek bann frer ek ser dan sa landrwa e pour vin pli ere.

PA BEZWEN LES NANRYEN ANPES OU DEMONTRE LOSPITALITE

13. Ki mannyer ou benefisye ler ou demontre lospitalite?

13 Eski ou’n deza ezite pour demontre lospitalite? Si wi, petet ou’n mank en loportinite pour pas en bon moman e pour fer zanmi ki ou pou annan pour touzour. Demontre lospitalite i enn parmi bann pli bon fason pour aret santi ou tousel. Alor, akoz en dimoun ti pou ezite demontre lospitalite? I annan detrwa rezon.

14. Ki nou kapab fer si nou napa ase letan ek lenerzi pour demontre oubyen aksepte lospitalite?

14 Letan ek lenerzi: Pep Zeova i vreman bizi e zot annan bokou responsabilite. Petet serten i santi ki zot napa ase letan oubyen lenerzi pour demontre lospitalite. Si ou santi koumsa, petet ou bezwen sanz ou progranm pour ou kapab demontre oubyen aksepte lospitalite. Sa i enportan akoz Labib i ankouraz nou pour demontre lospitalite. (Ebre 13:2) Alor i byen pour demontre lospitalite. Me pour demontre lospitalite, petet ou bezwen diminyen lakantite letan ki ou pase pe fer bann keksoz ki mwen enportan.

15. Akoz serten i santi ki zot pa kapab demontre lospitalite?

15 Lafason ki ou konsider ou lekor: Eski ou’n deza anvi demontre lospitalite me ou santi ki ou pa kapab fer li? Petet ou timid e ou per ki ou bann envite pa pou pas en bon moman. Petet ou napa bokou larzan e ou per ki ou pa kapab donn ou bann envite menm keksoz ki lezot frer ek ser i kapab donnen. Me rapel ki en lakour pa bezwen deliks. Ou bann envite pou kontan si ou lakour i prop e annord e si ou amikal anver zot.

16, 17. Ki ou kapab fer si ou santi ou enkyet pour annan bann envite?

16 Si ou enkyet pour annan bann envite, rapel ki pa zis ou ki santi koumsa. En ansyen Grannbretanny i admet: “Ou kapab santi ou en pe per ler ou pe prepar pour bann envite. Me zis parey i leka pour tou keksoz ki annan pour fer avek servi Zeova, bann byenfe ek satisfaksyon ki ou gannyen apre i bokou plis ki okenn lenkyetid ki ou ti annan. Mon’n kontan pour zis koz koze avek mon bann envite anmezir nou bwar en tas kafe.” I toultan byen pour demontre lentere personnel dan ou bann envite. (Filipyen 2:4) Laplipar dimoun i kontan rakont zot bann leksperyans dan lavi. Petet sel fason pour ekout zot leksperyans i ler nou zwenn ansanm avek zot. En lot ansyen i ekri: “Ler mon envit bann zanmi dan mon kongregasyon kot mwan, sa i ed mwan pour konpran zot pli byen e i donn mwan letan pour aprann konn zot, espesyalman lafason ki zot in vin dan laverite.” Si ou demontre lentere personnel dan ou bann envite, ou kapab asire ki tou dimoun pou pas en bon moman.

17 En ser pionye ki souvandfwa ti annan bann etidyan diferan lekol teokratik vin reste kot li, ti admet: “Premye kou mon ti en pe trakase akoz mon landrwa reste i senp e mon annan bann meb dezyenmmen. Madanm enn bann enstrikter ti fer mwan santi mwan vreman alez. I ti dir ki ler li ek son msye zot vwayaze dan zot  servis konman sirveyan rezyonal, zot bann pli bon semenn i ler zot reste avek en dimoun spirityel ki petet napa bokou keksoz materyel me ki annan menm lobzektif avek zot, setadir, servi Zeova e gard en lavi senp. Sa ti fer mwan rapel sa ki mon manman ti abitye dir nou ler nou ti ankor manrmay: ‘Vomye en pla legim kot lanmour i rennyen.’” (Proverb 15:17) Nou pa bezwen trakase, parski sa ki vreman konte se ki nou demontre lanmour anver nou bann envite.

18, 19. Ki mannyer demontre lospitalite i kapab ed nou rezet bann santiman negatif ki nou annan anver lezot?

18 Lafason ki ou konsider lezot: Eski i annan en dimoun dan ou kongregasyon ki irit ou? Si ou pa esey retir sa bann santiman negatif, ou pou kontinyen annan menm santiman. Petet ou pa pou anvi envit en dimoun kot ou si ou pa kontan son personnalite. Oubyen petet i annan en dimoun ki’n bles ou santiman dan lepase e i difisil pour ou oubliy sa.

19 Labib i dir ki si ou demontre lospitalite, ou kapab amelyor ou relasyon avek lezot, menm avek ou bann lennmi. (Lir Proverb 25:21, 22.) * (Vwar not.) Si ou envit en dimoun kot ou, petet ou pou kapab rezet bann santiman negatif e pour devlop en pli bon relasyon kot zot an pe avek kanmarad. Petet ou pou kapab konmans vwar bann menm bon kalite dan li ki Zeova ti vwar ler I ti atir li ver laverite. (Zan 6:44) Ler lanmour i pous ou pour  envit en dimoun san ki i ekspekte, sa i kapab konmansman en bon lanmitye. Ki mannyer ou kapab fer sir ki lanmour menm ki pous ou pour fer sa? En fason se par aplik sa konsey ki dan Filipyen 2:3: “Avek limilite konsider lezot pli siperyer ki zot.” Nou devret mazin lo bann fason ki nou bann frer ek ser i vreman pli siperyer ki nou. Petet nou kapab aprann avek zot legzanp lafwa, landirans oubyen en lot kalite Kretyen ki zot annan. Ler nou mazin lo zot bann bon kalite, sa pou fer nou lanmour pour zot vin pli for e i pou fer li pli fasil pour nou demontre lospitalite.

AZIR KONMAN EN BON ENVITE

Normalman bann ki envit lezot i prepar byen pour zot bann envite (Vwar paragraf 20)

20. Akoz e ki mannyer nou devret demontre ki nou diny konfyans ler nou aksepte en lenvitasyon?

20 Dan en psonm, David ti demande: “Lekel ki kapab vin en envite dan ou latant?” (Psonm 15:1, NWT) Apre sa, David ti diskit lo bann kalite ki Zeova i oule son bann envite i annan. Enn sa bann kalite se ki sa envite i diny konfyans: “I pa kas son promes, menm ler i pa dan son lavantaz.” (Psonm 15:4, NWT) Si nou aksepte en lenvitasyon, nou pa devret kennsel amwen i absoliman neseser. I kapab ki sa dimoun ki’n envit nou in fini prepar pour nou vizit e si nou kennsel, i pou konmsi i’n fer tou sa zefor pour nanryen. (Matye 5:37) Serten dimoun i kennsel en lenvitasyon pour ki zot kapab aksepte en lenvitasyon ki zot krwar i pli bon. Si nou fer sa, eski nou pe demontre lanmour ek respe? Nou devret rekonesan pour nenport kwa ki nou gannyen avek sa dimoun ki’n envit nou. (Lik 10:7) Si nou bezwen kennsel, i ti a byen ki nou les sa dimoun konnen pli vit posib. Sa i demontre ki nou annan lanmour ek konsiderasyon pour li.

21. Ki mannyer nou kapab azir konman bann bon envite ler nou swiv bann koutim sa landrwa?

21 I osi enportan pour respekte bann koutim sa landrwa. Dan serten kiltir, i normal pour bann ki pa’n ganny envite zis vini. Dan lezot kiltir, i pli byen pour fer en laranzman avan nou al vizit en dimoun. Dan serten landrwa, sa dimoun ki’n envit lezot i ofer son bann envite sa pli bon manze ki i annan e son fanmir i ganny sa ki reste. Dan lezot landrwa, tou dimoun i ganny trete parey. Oubyen i annan serten landrwa kot normalman bann envite i anmenn en keksoz pour kontribye anver sa repa. Me dan lezot landrwa, sa dimoun ki’n envit lezot i prefere ki son bann envite pa anmenn nanryen. Dan serten kiltir, avek respe bann envite i refiz premye oubyen dezyenm lenvitasyon ki zot gannyen. Me dan lezot kiltir, i malelve pour pa aksepte sa premye lenvitasyon. Nou devret toultan fer nou mye pour fer sir ki sa dimoun ki’n envit nou i kontan ki i’n fer li.

22. Akoz i sitan enportan pour “demontre lospitalite anver kanmarad”?

22 Pyer ti dir: “Lafen tou keksoz in vin pli pros.” (1 Pyer 4:7) Byento, nou pe al pas atraver sa pli gran ladetres ki lemonn pou eksperyanse. Anmezir ki sa lemonn i vin pli pir, nou pou bezwen annan profon lanmour pour nou bann frer ek ser. Plis ki zanmen oparavan konsey Pyer i aplikab: “Demontre lospitalite anver kanmarad.” (1 Pyer 4:9) Wi, i gou demontre lospitalite e i en keksoz neseser la konmela e pour touzour.

^ par. 19 Proverb 25:21, 22: 21 Si ou lennmi i lafen, donn li keksoz pour manze; si i swaf, donn li keksoz pour bwar. 22 Annefe, [“i pou konmsi ou pe met en ta labrez so lo son latet e Zeova pou rekonpans ou,” NWT].”