Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  Fevriye 2018

Imit lafwa ek lobeisans Noe, Danyel ek Zob

Imit lafwa ek lobeisans Noe, Danyel ek Zob

“Noe, Danyel ek Zob, zis zot ki ava sov zot lavi, par zot fidelite.”​—EZEKYEL 14:14.

KANTIK: 89, 119

1, 2. (a) Akoz nou kapab ganny ankouraze ler nou egzamin legzanp Noe, Danyel ek Zob? (b) Ki ti bann sirkonstans ler Ezekyel ti ekri sa parol ki dan Ezekyel 14:14?

ESKI ou pe pas atraver difikilte akoz ou malad, ou annan bann problenm finansyel ouswa akoz ou pe ganny persekite? Eski parfwa i difisil pour ou gard ou lazwa dan ou servis pour Zeova? Si ou santi koumsa, ou kapab ganny ankouraze ler ou egzamin legzanp Noe, Danyel ek Zob. Sa bann zonm ti enparfe e zot ti annan bann menm kalite defi parey sa ki nou nou annan ozordi. Me zot ti reste fidel avek Zeova menm si parfwa zot lavi ti an danze. Alor i pour sa rezon ki Zeova ti vwar zot konman bann legzanp lo lafason pour demontre lafwa ek lobeisans.​—Lir Ezekyel 14:12-14.

2 Ezekyel ti ekri sa parol ki dan verse tenm pour sa lartik  ler i ti Babilonn apepre lannen 612 avan Kris. * (Vwar not.) (Ezekyel 1:1; 8:1) Sa pa ti bokou letan avan ki Zerizalenm ti ganny detrir lannen 607. Zis en ptigin dimoun Zerizalenm ki ti sirviv parski zot ti fidel e obeisan parey Noe, Danyel ek Zob. (Ezekyel 9:1-5) Parmi bann sirvivan i ti annan Zeremi, Barouk, Ebed-Melek ek bann Rekabit.

3. Ki nou pou vwar dan sa lartik?

3 Pareyman ozordi, zis bann dimoun ki Zeova i vwar konman drwat, bann dimoun ki parey Noe, Danyel ek Zob, ki pou sirviv lafen sa move lemonn. (Revelasyon 7:9, 14) Alor annou vwar akoz Zeova ti servi sa trwa zonm konman legzanp bann ki ti fer sa ki drwat dan son lizye. Nou pou diskit (1) bann defi ki sakenn parmi zot ti annan e (2) ki mannyer nou kapab imit zot lafwa ek lobeisans.

NOE TI FIDEL E OBEISAN POUR PLIS KI 900 AN!

4, 5. Ki serten defi Noe ti fer fas avek e kwa ki ti enpresyonan avek li?

4 Ki serten defi Noe ti fer fas avek? Dan letan Enok ki ti granper Noe, dimoun ti deza move. Zot ti dir bann “keksoz sokan” lo Zeova. (Zid 14, 15) Lemonn ti kontinyen vin pli vyolan e dan letan Noe “later ti’n . . . ranpli avek vyolans.” Bann move lanz ti vin lo later, pran laform imen e marye avek bann fiy zonm. Zot bann garson ti kriyel e vyolan. (Zenez 6:2-4, 11, 12) Me tou dimoun ti kapab vwar ki Noe ti diferan. Labib i dir ki “Noe ti trouv faver devan [Zeova].” Kontrerman avek bann dimoun otour li, i ti fer sa ki drwat. “I ti mars avek Bondye.”​—Zenez 6:8, 9.

5 Ki sa bann parol i dir nou lo Noe? Premyerman, mazin lo sa kantite letan ki Noe ti servi Zeova fidelman dan sa lemonn move avan Deliz. I pa ti zis pour 70 ouswa 80 lannen me pour preski 600 lannen! (Zenez 7:11) Dezyenmman, rapel ki Noe ti napa en kongregasyon pour ed e ankouraz li parey nou nou annan ozordi. I paret ki menm son bann frer ek ser pa ti siport li. *​—Vwar not.

6. Ki mannyer Noe ti demontre kouraz?

6 Noe pa ti krwar ki i ase pour zis vin en bon dimoun. Avek lardyes i ti koz avek lezot konsernan son lafwa dan Zeova. Labib i dir ki i ti “en zonm ki ti . . . pres lo ladrwatir.” (2 Pyer 2:5) Zapot Pol ti dir: “Akoz son lafwa, Noe ti kondann lemonn.” (Ebre 11:7) San dout, dimoun ti sikann li e esey anpes li prese. Petet zot ti menm menase pour fer li dimal. Me Noe pa ti annan lafreyer zonm. (Proverb 29:25) O kontrer, i ti annan lafwa, alor Zeova ti donn li kouraz. Ozordi osi, Zeova i donn tou son bann serviter fidel sa menm kouraz.

7. Ki bann defi Noe ti fer fas avek ler i ti konstri lars?

7 Noe ti deza pe servi Zeova fidelman pour plis ki 500 lannen ler Zeova ti demann li pour konstri en gro lars. Sa lars  ti pou ganny servi pour sov serten dimoun ek zannimo ler Deliz i arive. (Zenez 5:32; 6:14) Petet Noe ti mazinen ki i ti pou difisil pour konstri en lars sa groser. I ti osi konnen ki dimoun ti pou sikann li plis ankor e fer son lavi vreman difisil. Me Noe ti annan lafwa e i ti obei Zeova. I “ti fer tou sa ki Bondye ti’n dir li.”​—Zenez 6:22.

8. Ki mannyer Noe ti met son konfyans dan Zeova pour pran swen avek son fanmir?

8 Noe ti annan en lot defi. I ti bezwen pran swen avek son madanm ek zanfan. Avan Deliz, dimoun ti bezwen travay vreman dir pour prodwir manze. Noe osi ti bezwen fer sa. (Zenez 5:28, 29) Kantmenm sa, i pa ti les bezwen son fanmir vin son pli gran konsern. Servi Zeova ti toultan sa keksoz pli enportan dan son lavi. Menm si Noe ti okipe pe konstri lars pour apepre 40 an oubyen 50 an, i ti reste konsantre lo Zeova. I ti fer sa pour ankor 350 an apre Deliz. (Zenez 9:28) Noe ti en bon legzanp en dimoun ki ti annan lafwa ek lobeisans!

9, 10. (a) Ki mannyer nou kapab imit lafwa ek lobeisans Noe? (b) Ki ou kapab asire Zeova pou fer si ou determinen pour obei son bann lalwa?

9 Ki mannyer nou kapab imit lafwa ek lobeisans Noe? Nou fer sa ler nou defann pwennvi Zeova konsernan sa ki drwat, ler nou pa form parti lemonn Satan e ler nou met Zeova premye. (Matye 6:33; Zan 15:19) Sanmenm sa lemonn pa kontan nou. Par egzanp, vi ki nou determinen pour obei lalwa Bondye konsernan sèks ek maryaz, dimoun i kapab dir bann keksoz negatif lo nou dan medya. (Lir Malaki 3:17, 18.) Parey Noe, nou napa lafreyer zonm. Nou annan lafreyer pour Zeova, ki vedir nou annan en gran respe pour li e nou pa anvi dezapwent li. Nou konnen ki zis Li ki kapab donn nou lavi eternel.​—Lik 12:4, 5.

10 Demann ou lekor: ‘Eski mon pou kontinyen fer sa ki drwat dan lizye Zeova menm ler lezot i sikann ouswa kritik mwan? Eski mon annan konfyans ki Zeova i kapab pran swen avek mon fanmir menm ler i difisil pour ganny en reveni?’ Si ou annan konfyans dan Zeova e obei li parey Noe ti fer, ou kapab asire ki Zeova pou pran swen avek ou.​—Filipyen 4:6, 7.

DANYEL TI FIDEL E OBEISAN MALGRE I TI VIV DAN EN MOVE LAVIL

11. Ki bann gro defi Danyel ek son trwa zanmi ti fer fas avek Babilonn? (Vwar portre o konmansman sa lartik.)

11 Ki serten defi Danyel ti fer fas avek? Danyel ti ganny forse pour reste Babilonn, en lavil etranze ki ti ranpli avek bann fo bondye ek pratik demonyak. Bann dimoun laba pa ti kontan bann Zwif e ti monk zot ek zot Bondye Zeova. (Psonm 137:1, 3) Sa ti’n sirman fer Danyel ek lezot Zwif ki ti kontan Zeova sagren! Deplis, plizyer dimoun ti pe obzerv Danyel ek son trwa zanmi Ananya, Misael ek Azarya parski zot ti pe al ganny antrennen pour travay pour lerwa Babilonn. Zot ti sipoze manz manze lerwa ki ti enkli bann keksoz ki Zeova pa ti oule ki son pep i manze. Me Danyel pa ti “rann li enpir avek manze lerwa.”​—Danyel 1:5-8, 14-17.

12. (a) Ki kalite dimoun Danyel ti ete? (b) Ki mannyer Zeova ti konsider Danyel?

 12 Danyel ti annan en lot defi, ki premye kou pa ti paret tro difisil. I ti annan bokou abilite e akoz sa, lerwa ti donn li bann privilez spesyal. (Danyel 1:19, 20) Kantmenm sa, Danyel pa ti vin orgeye oubyen krwar ki son lopinyon ti toultan byen. I ti gard son limilite e reste modes. I ti toultan dir ki Zeova ki ti fer li ganny sikse. (Danyel 2:30) Zis mazinen: Zeova ti mansyonn Danyel ansanm avek Noe ek Zob konman en bon legzanp pour swiv. Sa letan, Noe ek Zob ti’n deza servi Zeova fidelman tou zot lavi, me Danyel ti ankor en zenn onm. Pa Zeova ti vreman annan konfyans dan Danyel! I ti annan rezon, parski Danyel ti reste fidel e obeisan anver Bondye tou son lavi. Ler Danyel ti pros pour ganny 100 an, lanz Bondye ti dir li sa bann zoli parol: “Danyel, ou en zonm ki vreman presye.”​—Danyel 10:11, NWT.

13. Petet akoz Zeova ti ed Danyel pour ganny en o pozisyon?

13 Avek sipor Zeova, Danyel ti vin en zofisye vreman enportan, premyerman dan Lanpir Babilonn e apre dan Lanpir Med ek Pers. (Danyel 1:21; 6:1, 2) Petet Zeova ti fer sir ki Danyel i ganny sa o pozisyon pour li kapab ed son prop pep, zis parey Zozef ti fer Lezip e osi parey Ester ek Mordekay ti fer Pers. * (Vwar not.) (Danyel 2:48) Eski ou kapab imazinen ki mannyer Ezekyel ek lezot Zwif ki ti an egzil ti santi ler zot ti vwar lafason ki Zeova ti servi Danyel pour ed zot? Sirman sa ti’n bezwen ankouraz zot!

Nou presye dan lizye Zeova ler nou reste fidel avek li (Vwar paragraf 14, 15)

14, 15. (a) Ki mannyer nou sityasyon i parey avek sa ki pour Danyel? (b) Ki bann paran ozordi i kapab aprann avek paran Danyel?

14 Ki mannyer nou kapab imit lafwa ek lobeisans Danyel? Sa lemonn ki nou viv ladan ozordi i ranpli avek imoralite seksyel ek fo ladorasyon. Dimoun in ganny enfliyanse par Gran Babilonn, ki reprezant tou fo larelizyon ki Labib i apel “en landrwa kot bann demon i reste.” (Revelasyon 18:2) Me nou parey  bann etranze dan sa lemonn. Sa i fer ki dimoun i kapab vwar ki nou vreman diferan e petet zot sikann nou. (Mark 13:13) Kantmenm sa, annou apros avek nou Bondye Zeova, zis parey Danyel ti fer. Ler nou annan limilite, annan konfyans dan Zeova e obei li, i pou osi konsider nou konman presye.​—Agai 2:7, NWT.

15 Bann paran i kapab aprann bann leson enportan avek paran Danyel. Ler Danyel ti ankor en pti garson, laplipar dimoun ti move kot i ti reste Zida. Kantmenm sa, i ti devlop lanmour pour Zeova. Eski sa ti ariv zis par azar? Non. Son paran ti’n sirman ansenny li lo Zeova. (Proverb 22:6) Menm non Danyel ki vedir “Bondye i mon Ziz,” i montre ki son paran ti kontan Zeova. (Danyel 1:6, not dan NWT) Alor bann paran, annan pasyans ler ou pe ansenny ou zanfan lo Zeova. Pa abandonnen. (Efezyen 6:4) Priy avek zot. Priy pour zot. Fer tou sa ki ou kapab pour ansenny zot pour kontan sa ki drwat dan lizye Zeova e Zeova pou donn ou bokou benediksyon.​—Psonm 37:5, NWT.

ZOB TI FIDEL E OBEISAN KI SWA I TI RIS OUSWA POV

16, 17. Ki bann defi Zob ti fer fas avek dan diferan moman son lavi?

16 Ki serten defi Zob ti fer fas avek? Zob ti pas atraver bann gro sanzman dan son lavi. Premyerman, Zob ti sa “pli gran personnaz dan pei Les.” (Zob 1:3) I ti vreman ris, plizyer dimoun ti konn li e annan en gran respe pour li. (Zob 29:7-16) Malgre sa, Zob pa ti krwar ki i ti pli meyer ki lezot ouswa santi ki i pa ti bezwen Bondye. Nou konn sa parski Zeova ti apel li “mon serviter” e i ti dir sa lo li: “I en zonm zis e drwat ki annan bokou respe pour Bondye, e ki evite fer sa ki mal.”​—Zob 1:8.

17 Me en sel kou lavi Zob ti sanze. I ti perdi tou sa ki i ti annan, tonm dan en gran depresyon e sa ti fer li anvi mor. Ozordi, nou konnen ki Satan ki ti fer Zob ganny tou sa problenm. I ti dir ki Zob ti servi Zeova zis pour bann rezon egois. (Lir Zob 1:9, 10.) Zeova ti pran sa move lakizasyon vreman o serye. Ki i ti pou fer pour montre ki Satan i en gran manter? Bondye ti donn Zob sa loportinite pour prouv son fidelite anver li e pour montre ki i servi li akoz i kontan li.

18. (a) Kwa ki enpresyonn ou lo Zob? (b) Ki nou aprann lo Zeova avek lafason ki i ti tret Zob?

18 Satan ti plàn byen ki mannyer i pou atak Zob plizyer fwa e i ti fer li krwar ki sa bann latak ti sorti kot Bondye. (Zob 1:13-21) Apre sa, trwa zonm ki ti swadizan bann zanmi Zob ti dir li bann keksoz blesan. Zot ti dir ki i ti en move dimoun e ki Bondye ki ti pe pini li. (Zob 2:11; 22:1, 5-10) Malgre tousala, Zob ti reste fidel avek Zeova. I vre ki parfwa Zob ti dir bann keksoz bet. (Zob 6:1-3) Me Zeova ti konpran ki Zob ti fer sa zis akoz i ti pe soufer e dan depresyon. Zeova ti vwar ki Zob pa ti zanmen abandonn li menm si Satan, ki ti parey en gran bouli ti atak e ensilte li plizyer fwa. Apre ki Zob ti’n pas dan sa sityasyon terib, Zeova ti donn li de fwa plis sa ki i ti annan avan e azout ankor 140 lannen lo son lavi. (Zak 5:11) Apre tousala, Zob ti  kontinyen servi Bondye avek tou son leker. Ki mannyer nou konn sa? Parski Ezekyel 14:14, ki nou verse tenm pour sa lartik ti ganny ekrir plizyer santenn lannen apre ki Zob ti’n mor.

19, 20. (a) Ki mannyer nou kapab imit lafwa ek lobeisans Zob? (b) Ki mannyer nou kapab demontre konpasyon anver lezot parey Zeova i fer?

19 Ki mannyer nou kapab imit lafwa ek lobeisans Zob? Nenport ki sityasyon ki nou ladan, nou anvi fer sir ki Zeova i toultan sa Personnaz pli enportan dan nou lavi. Nou anvi met tou nou konfyans dan li e obei li avek tou nou leker. Anfet, nou annan plis rezon ki Zob ti annan pour nou fer sa. Mazin lo sa ki nou konnen ozordi. Nou konn en kantite lo Satan ek son bann metod. (2 Korentyen 2:11) Gras a Labib, espesyalman liv Zob, nou konnen akoz Bondye i permet soufrans. Atraver profesi Danyel, nou konnen ki Rwayonm Bondye i en vre gouvernman dirize par Zezi Kri. (Danyel 7:13, 14) Nou osi konnen ki byento sa Rwayonm pou diriz lo later antye e met en lafen avek tou soufrans.

20 Leksperyans Zob i osi ansenny nou pour demontre konpasyon ler nou bann frer ek ser pe soufer. Parey Zob, zot kapab dir bann keksoz bet. (Eklezyast 7:7) Me nou pa devret mazin an mal lo zot ouswa akiz zot konmkwa zot in fer en keksoz mal. O kontrer, nou devret esey konpran zot. Si nou fer sa nou pou parey nou Papa Zeova ki annan lanmour ek konpasyon.​—Psonm 103:8.

ZEOVA “POU FER ZOT FOR”

21. Ki mannyer bann parol dan 1 Pyer 5:10 i fer nou rapel sa ki Noe, Danyel ek Zob ti eksperyanse?

21 Noe, Danyel ek Zob pa ti viv dan menm lepok e zot bann sirkonstans ti diferan. Me zot tou zot ti andir zot bann leprev. Zot leksperyans i fer nou rapel sa ki zapot Pyer ti dir: “Apre ki zot in soufer pour en pe letan, Bondye ki annan tou labonte ekstraordiner . . . pou fini zot formasyon li menm. I pou fer zot ferm, i pou fer zot for e i pou met zot lo en fondasyon solid.”​—1 Pyer 5:10.

22. Ki nou pou aprann dan sa lot lartik?

22 Bann parol dan 1 Pyer 5:10 i osi vre pour pep Bondye ozordi. Zeova i asir nou ki i pou fer son bann serviter ferm e for. Nou tou nou anvi ki Zeova i fer nou for e nou anvi reste ferm e fidel avek li. Sanmenm sa ki nou anvi imit lafwa ek lobeisans Noe, Danyel ek Zob. Dan sa lot lartik, nou pou aprann ki sa bann zonm ti kapab reste fidel avek Zeova parski zot ti vreman konn li. Anfet, zot ti arive “konpran tou” sa ki Zeova ti anvi zot fer. (Proverb 28:5) Nou osi nou kapab fer parey.

^ par. 2 Ezekyel ti ganny anmennen Babilonn dan lannen 617 avan Kris. I ti ekri bann parol ki trouve dan Ezekyel 8:1–19:14 “dan sizyenm lannen” apre ki i ti’n ganny anmennen laba, setadir lannen 612.

^ par. 5 Lamek ki ti papa Noe, ti annan lafwa dan Bondye me i ti mor apepre senk an avan Deliz. Si manman Noe ek son bann frer ek ser ti ankor vivan ler Deliz ti konmanse, zot pa ti sirviv.

^ par. 13 I kapab ki Zeova ti fer menm parey pour Ananya, Misael ek Azarya pour ki zot osi zot ti kapab ed sa pep Zwif.​—Danyel 2:49.