Skip to content

Al lo sa dezyenm lalis

Al lo konteni

Temwen Zeova

Kreol Seselwa

Latour Veyer (Edisyon letid)  |  February 2016

Kontinyen servi Zeova avek lazwa

Kontinyen servi Zeova avek lazwa

MAZIN sa moman pli zwaye dan ou lavi. Eski i ler ou ti marye oubyen ler ou ti ganny ou premye zanfan? Ouswa i ler ou ti batize? I tre probab ki sa ti sa moman pli enportan e pli zwaye dan ou lavi. Pa ou bann frer ek ser ti kontan pour vwar ou montre ki ou kontan Zeova avek tou ou leker, tou ou nanm, tou ou lespri e tou ou lafors!Mark 12:30.

San dout, ou’n ganny bokou lazwa pour servi Zeova depi ki ou’n batize. Par kont, plizyer proklanmater in perdi sa lazwa ki zot ti annan avan. Akoz sa in arive? Ki bann rezon nou annan pour kontinyen servi Zeova avek lazwa?

AKOZ SERTEN IN PERDI ZOT LAZWA?

Sa mesaz Rwayonm i donn nou bokou lazwa. Akoz? Parski Zeova in promet ki byento sa Rwayonm pou detri sa move lemonn e anmenn nouvo lemonn Bondye. Tsefanya 1:14 i dir: “Gran zour Zeova i pros! I pros e i pe vin byen vit!” Me si nou santi ki nou bezwen esper plis letan ki nou ti pe ekspekte, sa i kapab fer nou perdi nou lazwa e ler nou perdi nou lazwa, sa i kapab fer nou perdi nou devouman dan servis Bondye.Proverb 13:12.

Ler nou pas letan avek nou bann frer ek ser, sa i ankouraz nou pour kontinyen servi Zeova avek lazwa. I kapab ki bon kondwit bann Temwen Zeova ki’n atir nou ver vre ladorasyon e fer nou konmans servi Zeova avek lazwa. (1 Pyer 2:12) Me ki i kapab arive si enn nou frer oubyen ser ti ganny disiplinen akoz i pa ti obei bann komannman Bondye? Sa i kapab dekouraz serten dan kongregasyon e fer zot perdi zot lazwa.

Materyalizm osi i kapab fer nou perdi nou lazwa. Ki mannyer sa? Lemonn Satan i esey konvenk nou ki nou devret aste bann keksoz ki nou pa vreman bezwen. Alor annou mazin sa ki Zezi ti dir: “Personn pa kapab servi de met; parski swa i pou deteste enn e kontan lot; swa i pou devoue anver enn e mepriz lot. Ou pa kapab servi Bondye ek larises an menm-tan.” (Matye 6:24) Nou pa kapab servi Zeova dan lazwa e an menm tan esey ganny tou sa ki nou kapab dan sa lemonn.

TROUV OU LAZWA DAN SERVIS ZEOVA

Servi Zeova pa en fardo pour bann ki kontan li. (1 Zan 5:3) Rapel ki Zezi ti dir: “Vin kot mwan zot tou ki fatige e ki pe anmenn en fardo e mwan, mon a donn zot repo. Pran mon zoug e aksepte mon legzanp akoz mon dou e mon annan limilite dan mon leker e zot a ganny repo. Akoz mon zoug i fasil e mon fardo i leze.” (Matye 11:28-30) Viv konman en vre Kretyen i ankourazan e i donn nou lazwa. Sirman nou annan  bann bon rezon pour trouv lazwa dan servis Zeova. Annou vwar trwa sa bann rezon.Abakouk 3:18.

Nou servi sa Bondye ere, sa Enn ki’n donn nou lavi. (Akt 17:28; 1 Timote 1:11, NW) Nou realize ki nou dwa nou Kreater nou lavi. Alor annou kontinyen servi li avek lazwa, malgre nenport ki kantite lannen ki’n pase depi ki nou’n batize.

Héctor i gard son lazwa ler i mazin son lespwar pour sa Rwayonm e reste aktif

Annou vwar legzanp Héctor, ki ti servi pour 40 an konman en sirveyan rezyonal. “Menm dan [son] vye zour” i ankor kontan servi Zeova. (Psonm 92:12-14) Maladi son madanm in fer ki i pa kapab fer bokou dan servis Bondye, me Héctor pa’n perdi son lazwa. I dir: “Menm si i tris pour vwar lasante mon madanm deteryore ptitapti e i pa fasil pour pran swen avek li, mon pa’n les sa fer mwan perdi mon lazwa pour servi sa vre Bondye. Vi ki mon konnen ki Zeova i’n kree zonm pour en bi e ki mon dwa li mon lavi, sa i donn mwan ase rezon pour vreman kontan li e servi li avek tou mon leker. Mon fer zefor pour reste aktif dan predikasyon e mon esey kit sa lespwar pour sa Rwayonm premye dan mon lespri pour ki mon pa perdi mon lazwa.”

Zeova in donn ranson ki fer li posib pour nou viv dan lazwa. Byensir, “Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” (Zan 3:16) Wi, nou pese i kapab ganny pardonnen e nou kapab ganny lavi eternel ler nou demontre lafwa dan sa ranson ki en zoli kado. Pa sa i en bon rezon pour nou rekonesan! Nou rekonesans pour sa ranson pou pous nou pour servi Zeova dan lazwa.

Jesús ti senplifye son lavi e servi Zeova dan lazwa pour plizyer lannen

En frer ki apel Jesús, ki ti reste Meksik, ti dir: “Mon ti lesklav mon travay e par ler mon ti travay senk shift en sel tre menm si mon pa ti oblize fer li. Mon ti fer sa zis pour mwan ganny plis larzan. Me apre mon ti aprann konn Zeova e ki i’n donn son Garson byenneme pour limanite. Mon ti vreman anvi servi li. Alor mon ti dedye mon lavi avek Zeova e mon ti deside aret travay pour sa lakonpannyen ki mon ti’n travay avek pour 28 an e pran servis a plen tan.” Se koumsa ki Jesús ti konmans servi Zeova avek lazwa.

Nou viv en lavi pir moralman e sa i donn nou lazwa. Eski ou rapel ki mannyer ou ti pe viv avan ou konn Zeova? Zapot Pol ti fer bann Kretyen Ronm rapel ‘ki avan zot ti lesklav pese’ me zot ti’n vin “lesklav lazistis.” Vi ki zot ti pe viv  en lavi pir, zot ti annan sa lespwar pour ganny lavi eternel. (Romen 6:17-22) Nou osi nou swiv standar Zeova e sa i fer ki nou evit bann sagrinasyon ki en lavi imoral e vyolan i anmennen. Pa sa i fer nou zwaye!

“Sa bann lannen ki mon’n servi Zeova i bann lannen ki mon’n pli ere dan mon lavi.”—Jaime

Annou vwar legzanp Jaime, en bokser, ki pa ti krwar dan Bondye me dan evolisyon. Jaime ti konmans asiste bann renyon Kretyen e i ti ganny touse par sa lanmour ki i ti vwar laba. Pour sanz son fason viv, Jaime ti bezwen demann Zeova led pour krwar dan Li. Jaime i dir, “Ptitapti, mon ti dekouver ki i annan en Papa lanmour e i en Bondye ki pran pitye. Gard bann standar zis Zeova in en proteksyon pour mwan. Si mon pa ti’n sanze, mon ti’n kapab ganny touye, parey serten mon bann dalon bokser. Sa bann lannen ki mon’n servi Zeova i bann lannen ki mon’n pli ere dan mon lavi.”

PA BES LEBRA!

Ki mannyer nou devret santi anmezir ki nou esper lafen sa move lemonn? Rapel ki nou pe fer lavolonte Bondye e ki nou pe esper lavi eternel avek pasyans. “Annou pa aret fer sa ki byen, parski nou pou rekolte kan letan i a’n arive, si nou pa arete.” (Galat 6:8, 9) Avek led Zeova, annou andire, travay dir pour devlop bann kalite ki nou bezwen pour sirviv “gran [“ladetres,” NW]” e kontinyen servi Zeova avek lazwa.Revelasyon 7:9, 13, 14; Zak 1:2-4.

Nou kapab asire ki Zeova pou rekonpans nou si nou andire parski i konn travay ki nou fer e lanmour ki nou demontre pour li ek son non. Si nou kontinyen servi li avek lazwa, nou pou parey psalmis David ki ti dir: “Mon toultan gard Zeova devan mwan. Parski i dan mon kote drwat, mon pa pou zanmen tranble. Mon leker i dan lazwa, tou sa ki mon ete i dan lazwa. Mon osi viv an sekirite.”Psonm 16:8, 9.