Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 39

Maler pour en zenerasyon rebel

Maler pour en zenerasyon rebel

MATYE 11:16-30 LIK 7:31-35

  • ZEZI I REPRIMANN BANN DIMOUN DAN SERTEN LAVIL

  • I SOULAZ E FORTIFYE LEZOT

Zezi i annan en kantite respe pour Zan ki batize, me ki mannyer laplipar dimoun i vwar Zan? Zezi i dir: “Sa zenerasyon . . . i parey bann zanfan ki pe asize lo bazar pe kriy avek kanmarad, ‘Nou ti zwe laflit pour zot, me zot pa ti danse, nou ti plere e fer leokri, me zot pa ti tap zot lestoman pour montre ki zot dan lapenn.’”​—Matye 11:16, 17.

Ki sa i vedir? Zezi i eksplike: “Zan pa ti manze ni bwar parey tou dimoun, me dimoun i dir, ‘I posede par en demon.’ Garson zonm li i manze e bwar, me dimoun i dir, ‘Get sa zonm! I manz tro bokou e i kontan bwar diven, en zanmi bann kolekter taks ek dimoun ki annan en move lavi.’” (Matye 11:18, 19) Lo en kote, nou annan Zan ki’n viv en lavi senp konman en Nazireen. I menm pa bwar diven, me sa zenerasyon i dir ki i posede par en demon. (Nonm 6:2, 3; Lik 1:15) Lo lot kote, nou annan Zezi ki viv parey tou lezot dimoun. I manze e bwar dan en fason rezonnab, me dimoun i akiz li ki i fer tousala an ekse. I paret ki i enposib pour satisfer dimoun.

Zezi i dir ki sa zenerasyon i parey bann zanfan dan bazar ki refize danse ler lezot zanfan i zwe laflit oubyen ki refize dan lapenn ler lezot i plere e fer leokri. I dir: “Lasazes en dimoun i ganny rekonnet par son aksyon.” (Matye 11:16, 19) Sa bann “aksyon” i levidans ki Zan ek Zezi i donnen pour montre ki sa bann lakizasyon kont zot i fo.

Apre ki Zezi in koz lo sa zenerasyon ki’n rebel, i koz lo lavil Korazin, Betsayda ek Kapernaoum kot i’n fer bokou mirak. Zezi i reprimann bann dimoun dan sa bann lavil e dir ki si i ti’n fer sa bann mirak Tir ek Sidon, de lavil ki Fenisi, bann dimoun dan sa lavil ti pou’n repantir. I osi koz lo Kapernaoum, sa landrwa kot i’n reste laplipar ditan. Menm laba, laplipar dimoun pa’n aksepte son mesaz. Zezi i dir sa lo sa lavil: “Zour Zizman, i pou pli sever pour zot ki pour Sodonm.”​—Matye 11:24.

Apre sa, Zezi i loue son Papa ki kasyet bann laverite spirityel avek “bann ki saz e entelizan” me ki revel zot avek bann ki annan limilite, ki parey bann zanfan. (Matye 11:25) I donn bann dimoun koumsa en zoli lenvitasyon: “Vin kot mwan, zot tou ki pe rente e fatige e mon pou redonn zot lafors. Vin mon disip e swiv mon legzanp, parski mon dous e mon annan limilite e zot pou reganny lafors. Parski i fasil pour vin mon disip e sa ki mon demann zot pour anmennen i pa lour.”​—Matye 11:28-30.

Ki mannyer Zezi i redonn lafors lezot? Bann sef relizye in met en kantite fardo lo bann dimoun avek zot bann tradisyon ki fer dimoun vin parey prizonnyen. Par egzanp, zot in fer bann lareg sever konsernan Saba. Me Zezi i redonn bann dimoun lafors ler i ansenny zot laverite lo Bondye ki napa nanryen pour fer avek sa bann tradisyon. I osi montre ki mannyer pour soulaz bann ki oprimen par bann lotorite politik oubyen ki trouble akoz zot pese. I montre zot ki mannyer zot kapab ganny pardonnen e anpe avek Bondye.

Tou bann dimoun ki anvi vin disip Zezi i kapab dedye zot lavi avek Bondye e servi nou Papa dan lesyel ki toultan demontre konpasyon ek pitye anver son serviter. Servi Bondye i pa parey anmenn en gro pake lour parski bann komannman Bondye pa en fardo.​—1 Zan 5:3.