Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 38

Zan i anvi konnen si Zezi i Mesi

Zan i anvi konnen si Zezi i Mesi

MATYE 11:2-15 LIK 7:18-30

  • ZAN KI BATIZE I DEMANN KONSERNAN ROL ZEZI

  • ZEZI I FELISIT ZAN

I fer apepre enn an depi ki Zan ki batize i dan prizon. Me kantmenm sa i ganny nouvel konsernan bann mirak Zezi. Zis mazinen ki mannyer Zan i santi ler son bann disip i dir li ki Zezi in resisit garson en vev dan lavil Nain. Toudmenm, Zan i anvi tann avek Zezi li menm ki tousala i vedir. Alor i kriy de son bann disip e anvoy zot kot Zezi pour demande: “Eski ou sa Enn ki nou pe espere oubyen nou bezwen esper en lot?”​—Lik 7:19.

Eski sa kestyon i paret drol? Zan i en serviter fidel Bondye ki de-z-an pase ti batiz Zezi. I ti vwar lespri sen Bondye desann lo Zezi e i ti tann Bondye dir Zezi ki i’n aprouv li zour son batenm. Nou napa okenn rezon pour krwar ki lafwa Zan in afebli. Si non, Zezi pa ti pou koz an byen lo Zan, parey i fer sa zour. Me si Zan pa pe ganny okenn dout, akoz i demann sa kestyon lo Zezi?

I kapab ki Zan i senpleman anvi ki Zezi i konfirm avek li direkteman ki i sa Mesi. Sa ti pou ankouraz Zan ki pe soufer dan prizon. I osi paret ki i annan en lot rezon ki Zan i demann sa kestyon. I konn bann profesi Labib ki dir ki Mesi i sipoze vin en lerwa ek sover. Par kont, plizyer mwan apre ki Zezi in ganny batize, Zan i ankor dan prizon. Alor Zan pe demande si i pou annan en lot ki vini pour ranplas Zezi e ki pou fini akonpli tou sa ki sa Mesi i sipoze fer dapre bann profesi.

Zezi pa zis dir bann disip Zan, ‘Byensir mon sa Enn ki zot pe espere,’ me i geri en kantite dimoun ki annan toudsort maladi pour montre ki i annan laprouvasyon Bondye. Apre sa, i dir bann disip: “Ale e rakont Zan sa ki zot pe tande e vwar: Bann aveg pe vwar aprezan, bann ki bwete pe marse, bann ki annan lalep pe vin pir, bann sourd pe tande, bann mor pe ganny resisite e bann pov pe ganny anonse sa bon nouvel.”​—Matye 11:4, 5.

Petet Zan pe demann sa akoz i ekspekte ki Zezi pou fer plis ki sa ki i pe deza fer e ki i pou tir li dan prizon. Me Zezi pe dir Zan ki i pa devret ekspekte plis ki bann mirak ki i deza pe fer.

Ler bann disip Zan i ale, Zezi i fer sir ki lafoul i konnen ki Zan pa zis en profet. I “mesaze” Zeova ki’n ganny profetize dan Malaki 3:1. I osi profet Eliya ki’n ganny predir dan Malaki 4:5, 6. Zezi i eksplike: “Laverite mon dir zot, napa personn ki’n ne lo later ki pli gran ki Zan ki batize, me sa enn ki pli pti dan Rwayonm lesyel i pli gran ki li.”​—Matye 11:11.

Ler Zezi i dir ki enn ki pli pti dan Rwayonm lesyel i pli gran ki Zan, i pe montre ki Zan pa pou dan sa Rwayonm dan lesyel. Zan ti prepar semen pour Zezi me i pou mor avan ki Kris i fer li posib pour dimoun konmans al dan lesyel. (Ebre 10:19, 20) Par kont, Zan i en profet fidel Bondye e i pou en sitwayen Rwayonm Bondye ki pou viv lo later.