Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 51

En dimoun i ganny touye pandan en parti lanniverser nesans

En dimoun i ganny touye pandan en parti lanniverser nesans

MATYE 14:1-12 MARK 6:14-29 LIK 9:7-9

  • EROD I FER KOUP LATET ZAN KI BATIZE

Pandan ki bann zapot Zezi pe prese Galile, sa premye dimoun ki ti koz lo Zezi napa sa menm liberte parey zot. I fer preski de-z-an depi ki Zan ki batize i dan prizon.

Lerwa Erod Antipas in pran Erodyad konman son madanm menm si i ti madanm son demi frer Filip. Erod ti divorse avek son premye madanm pour li marye avek Erodyad. Erod i swadizan swiv Lalwa Moiz e dapre sa lalwa, sa ti en maryaz adilter. Zan ti dir an piblik ki sa i mal. Sanmenm sa Erod in fer Zan ganny mete dan prizon, petet akoz Erodyad in demann li pour fer sa.

Erod pa konnen ki i pou fer avek Zan akoz bann dimoun i “konsider Zan konman en profet.” (Matye 14:5) Me Erodyad li i konnen ki i anvi fer. I “pe gard rankin kont Zan” e anfet i pe menm rod en fason pour fer li ganny met amor. (Mark 6:19) Finalman, i ganny sa sans.

Zis avan Lapak lannen 32, Erod i fer en gro parti pour son lanniverser nesans. Tou son bann o zofisye, zofisye larme ek dimoun o plase Galile i ganny envite. Pandan sa festen, Salome, fiy Erodyad ki i ti gannyen avek Filip, son msye avan, i ganny demande pour vin danse pour bann envite. Tou dimoun i kontan lafason ki i’n danse.

Erod i telman kontan ki i dir avek fiy Erodyad: “Nenport keksoz ki ou demann mwan, mon pou donn ou.” I menm fer serman avek li: “Nenport keksoz ki ou demann mwan, mon pou donn ou, menm ziska lanmwatye mon rwayonm.” Avan ki Salome i reponn, i al demann son manman: “Ki mon devret demann li?”​—Mark 6:22-24.

La loportinite ki Erodyad pe rode! Deswit i dir li: “Latet Zan sa enn ki batize.” Osito, Salome i retourn kot Erod e i dir li: “Mon oule ki la konmela menm ou donn mwan latet Zan ki batize lo en plato.”​—Mark 6:24, 25.

Sa i fer Erod vreman tris, me tou son bann envite in tann sa serman ki i’n fer avek Salome. I anbarase pour pa fer sa ki Salome in demann li, menm si sa i vedir touy en dimoun inosan. Alor, Erod i anvoy en gard kot prizon. Sa i vreman fer lapenn! Pa bokou letan apre, sa gard i tournen avek latet Zan lo en plato. I donn Salome sa plato e Salome i anmenn sa plato kot son manman.

Ler bann disip Zan i tande ki’n arive, zot vin pran lekor Zan e anter li. Apre sa, zot les Zezi konnen ki’n arive.

Pli tar, Erod i per ler i tande ki Zezi pe geri bann dimoun e sas bann demon. I mazinen si sa zonm ki pe fer tou sa bann keksoz, setadir Zezi, i an realite Zan ki batize ki’n “ganny resisite.” (Lik 9:7) I pour sa rezon ki Erod Antipas i vreman anvi vwar Zezi. Sa i pa akoz i anvi tann Zezi prese. Plito, Erod i anvi vwar Zezi pour konnen si sa ki i pe mazinen i vre oubyen non.