Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 21

Kot sinagog Nazaret

Kot sinagog Nazaret

LIK 4:16-31

  • ZEZI I LIR DAN ROULO IZAI

  • BANN DIMOUN NAZARET I ESEY TOUY ZEZI

Bann dimoun Nazaret i vreman eksite. Zezi ti en sarpantye Nazaret. En pti pe plis ki enn an pase, i ti kit sa lavil e i ti ganny batize par Zan. Me aprezan tou dimoun i konn li konman en zonm ki fer bann mirak. Bann dimoun ki reste dan sa lavil i vreman anvi vwar li fer bann mirak.

Zot pli eksite ankor ler parey son labitid, Zezi i al kot sinagog dan sa lavil. “Sak saba . . . dan sinagog,” i annan en dimoun ki fer lapriyer e lir bann liv Moiz. (Akt 15:21) Bann liv profetik i osi ganny lir. Ler Zezi i debout pour lir, i tre probab ki i konn en kantite dimoun apre tou sa bann lannen ki i’n al dan sa sinagog. Zot donn li roulo profet Izai. I ouver kot i koz lo sa Enn ki’n ganny swazir par lespri sen Zeova. Ozordi sa verse Labib i dan Izai 61:1, 2.

Zezi i lir sa pasaz ki koz lo ki mannyer sa Enn ki’n ganny swazir ti pou anons liberasyon avek bann lesklav, fer bann aveg vwar kler e pres lo sa letan kot i pou posib ganny laprouvasyon Zeova. Zezi i rann sa serviter sa roulo e apre i asize. Tou dimoun pe get li. Apre i koze, tre probab pour en pe letan e i fini par dir sa parol enportan: “Ozordi, sa parol dan lekritir ki zot fek tande in ganny akonplir.”​—Lik 4:21.

Bann dimoun i enpresyonnen par “son bann zoli parol” e zot demann kanmarad: “Pa i en garson Zozef li?” Me Zezi i realize ki zot anvi vwar li fer bann mirak parey zot in tann koz lo la, alor i dir zot: “San dout zot pou dir sa parol i aplik pour mwan, ‘Dokter, geri ou lekor. Nou’n tande ou’n fer bokou keksoz Kapernaoum, fer parey isi, dan ou prop lavil.’” (Lik 4:22, 23) I paret ki sa bann dimoun i panse ki Zezi ti devret konmans fer son bann gerizon Nazaret pour benefisye dimoun ki sorti dan son lavil. Alor i kapab ki zot krwar ki Zezi in mal azir akoz i pa’n fer mirak kot zot premye.

Ler Zezi i realize ki zot pe mazinen, i mansyonn serten levennman dan listwar Izrael. I dir ki i ti annan en kantite vev Izrael dan letan Eliya, me Eliya pa ti ganny anvoye kot okenn sa bann madanm. O kontrer, i ti al kot en vev ki pa ti en Izraelit dan lavil Zarefat, ki pre avek Sidon e laba menm ki Eliya ti fer en mirak ki ti sov zot lavi. (1 Lerwa 17:8-16) Deplis, dan letan Eliya, i ti annan en kantite lepre an Izrael, me sa profet ti geri zis Naamann ki ti en Siryen.​—2 Lerwa 5:1, 8-14.

Ki mannyer sa bann dimoun Nazaret i reazir ler zot tann sa konparezon ki montre ki zot egois e ki zot mank lafwa? Sa bann dimoun dan sinagog i ankoler, zot leve e pous Zezi an deor lavil. Lavil Nazaret in ganny konstrir lo en montanny, zot anmenn li ziska kot en ranpar e esey zet li anba. Me Zezi i nobou sove san ki zot fer li nanryen. Apre sa, Zezi i desann Kapernaoum ki lo lakot nor was Lanmer Galile.