Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 50

Zezi i prepar son bann disip pour prese menm si zot pou ganny persekite

Zezi i prepar son bann disip pour prese menm si zot pou ganny persekite

MATYE 10:16–11:1 MARK 6:12, 13 LIK 9:6

  • ZEZI I FORM BANN ZAPOT E ANVOY ZOT PRESE

Zezi i anvoy son bann zapot de par de e i donn zot bann bon lenstriksyon lo konman pour prese. Me i osi fer plis ki sa. I averti zot ki i pou annan dimoun ki pou opoz zot: “Ekoute! Mon pe anvoy zot parey mouton parmi lelou . . . Fer atansyon, parski dimoun pou anmenn zot ankour e pou fwet zot dan zot sinagog. Zot pou ganny anmennen devan bann gouverner ek lerwa akoz mwan.”​—Matye 10:16-18.

Alor i kapab arive ki bann disip Zezi i pas atraver bann gro persekisyon, me i fer en promes avek zot. I asir zot: “Ler zot ganny anmennen devan lakour, pa bezwen trakase ki mannyer zot pou koze e ki zot pou dir, parski sa letan zot pou konnen ki pour dir akoz pa zis zot ki pou koze, me se avek led lespri sen zot Papa ki zot pou koze. Deplis, frer pou denons frer pour li ganny touye, papa pou denons son zanfan e zanfan pou vir kont paran e fer zot ganny met amor. Tou dimoun pou ay zot akoz zot port mon non, me sa enn ki’n andire ziska lafen pou ganny sove.”​—Matye 10:19-22.

Vi ki prese i sa travay pli enportan ki son bann disip i annan pour fer, Zezi i dir ki zot bezwen reste pridan koumsa zot kapab reste lib pour fer sa travay. I dir: “Ler zot ganny persekite dan en lavil, sov dan en lot, parski laverite mon dir zot, zot pa pou zanmen kapab fini pres dan tou lavil ek vilaz Izrael avan ki Garson zonm i arive.”​—Matye 10:23.

Pa Zezi i donn son 12 zapot bann bon lenstriksyon, lavertisman ek lankourazman! Anfet, sa bann parol i osi aplik pour bann ki pou partisip dan predikasyon apre ki Zezi i mor e resisite. Nou konn sa akoz Zezi i dir ki “tou dimoun pou ay” son bann disip, pa zis bann dimoun ki bann zapot in pres avek. Deplis, dan Labib, nou pa lir ki pandan sa kanpanny predikasyon Galile bann zapot ti ganny anmennen devan bann gouverner ek lerwa, ni ki zot fanmir ti denons zot pour ganny touye.

I kler ki Zezi pe mazin lavenir ler i donn sa bann lenstriksyon avek son bann zapot. Pran par egzanp sa fraz kot Zezi i dir ki son bann disip pa pou fini pres dan tou lavil ek vilaz “avan ki Garson zonm i arive.” La Zezi pe montre ki son bann disip pa pou fini prese konsernan Rwayonm Bondye avan ki li konman Lerwa dan lesyel i vin ziz later.

Ler bann zapot pe prese, zot pa devret sirprann si dimoun i opoz zot parski Zezi i dir: “En disip pa pli siperyer ki son ansenyan, ni en lesklav  pa pli siperyer ki son met.” Sa ki Zezi pe esey dir i kler. Bann dimoun i tret li dan en move fason e persekit li akoz i pres lo Rwayonm Bondye, alor zot osi zot pou pas parey. Par kont i ankouraz zot: “Pa bezwen per bann ki kapab touy ou me ki pa kapab anpes ou reganny lavi a lavenir, plito, per sa enn ki kapab detri ou dan Zeenn.”​—Matye 10:24, 28.

Zezi in kit en bon legzanp dan sa domenn. I pa ti per pour mor e i pa ti kas son fidelite avek sa enn ki annan tou pouvwar, Zeova. Se Bondye Tou Pwisan ki kapab detri en dimoun (setadir i pou napa lespwar pour viv a lavenir) oubyen ki kapab resisit li pour ganny lavi eternel. Pa sa in bezwen ankouraz son bann zapot!

Zezi i servi en legzanp pour montre ki kantite Bondye i pran swen avek bann disip Zezi. I dir: “Pa de sren i vann pour en pti sou? Pourtan, napa ni enn parmi zot ki tonm ater san ki zot Papa i konnen. . . . Alor, pa bezwen per, zot annan bokou plis valer ki en kantite sren.”​—Matye 10:29, 31.

Sa mesaz ki bann disip Zezi pe anonse pou diviz bann fanmir parski serten dan fanmir pou aksepte sa mesaz tandis ki lezot non. Zezi i eksplike: “Pa krwar ki mon’n vin anmenn lape lo later.” I demann kouraz pour en manm fanmir aksepte laverite dan Labib. “En dimoun ki annan plis lanmour pour son papa oubyen son manman ki pour mwan pa diny pour vin mon disip e en dimoun ki annan plis lanmour pour son garson oubyen son fiy ki pour mwan pa diny pour vin mon disip.”​—Matye 10:34, 37.

Par kont, i annan serten ki pou byen akeyir son bann disip. I dir: “En dimoun ki donn zis en ver delo fre avek sa enn ki pli pti parmi mon bann disip, zis akoz i mon disip, vreman mon dir zot, i pou sirman ganny son rekonpans.”​—Matye 10:42.

Bann zapot in ganny byen prepare. Zezi in donn zot bann lenstriksyon, lavertisman ek lankourazman, alor zot al “dan tou vilaz, enn apre lot pe anons sa bon nouvel e geri bann dimoun partou.”​—Lik 9:6.