Skip to content

Al lo konteni

 SAPIT 55

Parol Zezi i sok en kantite dimoun

Parol Zezi i sok en kantite dimoun

ZAN 6:48-71

  • MANZ SON LASER E BWAR SON DISAN

  • EN KANTITE DIMOUN I SOKE E ARET SWIV LI

Dan en sinagog Kapernaoum, Zezi i dir ki i sa vre dipen sorti dan lesyel. Aparaman sa i en kontinyasyon sa konversasyon ki Zezi ti annan dan les Lanmer Galile avek bann dimoun ki ti’n manz dipen ek pwason laba.

Zezi i dir: “Zot zanset ti manz lamann dan dezer, pourtan zot ti mor.” De lot kote, i eksplike: “Mwan menm sa dipen ki donn lavi. Sa ki manz sa dipen pou viv pour touzour e anfet, sa dipen ki mon pou donnen pour ki lemonn i viv, se mon laser.”​—Zan 6:48-51.

Prentan lannen 30, Zezi ti dir Nikodenm ki Bondye i telman kontan lemonn ki i’n donn son Garson konman Sover. La aprezan Zezi i met lanfaz lo lefet ki tou dimoun i bezwen manz son laser, setadir demontre lafwa dan sa sakrifis ki i pou fer. Koumsanmenm ki tou dimoun i kapab ganny lavi eternel.

Par kont, bann dimoun pa dakor avek parol Zezi. Zot demande: “Ki mannyer sa zonm i kapab donn nou son laser pour manze?” (Zan 6:52) Zezi i oule ki zot konpran ki sa ki i pe dir i senbolik. Zezi i eksplik zot sa ki i pe esey dir.

“Vreman mon dir zot laverite, si zot pa manz laser Garson zonm e bwar son disan, zot pa pou ganny lavi. Sa ki manz mon laser e bwar mon disan i a ganny lavi eternel, . . . parski mon laser i sa vre nouritir e mon disan sa vre labwason. Sa ki manz mon laser e bwar mon disan i ini avek mwan e mwan mon ini avek li.”​—Zan 6:53-56.

Pour bann Zwif, sa i vreman mal! Zot kapab krwar ki Zezi pe ankouraz zot pour manz dimoun oubyen pour kas lalwa Bondye ki defann servi disan. (Zenez 9:4; Levitik 17:10, 11) Me Zezi pa pe dir zot vreman manz son laser oubyen bwar son disan. I pe montre ki tou dimoun ki oule viv eternelman i bezwen demontre lafwa dan sa sakrifis ler i pou ofer son lekor parfe e vers son disan. Me menm en kantite son bann disip pa konpran sa lansennyman. Serten i dir: “Sa lansennyman i sokan, lekel ki kapab ekout sa?”​—Zan 6:60.

Vi ki Zezi i realize ki serten son bann disip pe konplent, i demande: “Eski sa i sokan pour zot? Me ki zot pou dir si zot vwar Garson zonm pe mont kot i ti ete avan? . . . Sa ki mon’n dir zot i an armoni avek lespri sen ek laverite. Me i annan serten parmi zot ki pa krwar.” Ler bann disip i tann sa, en kantite parmi zot i ale e zot aret swiv li.​—Zan 6:61-64.

Alor Zezi i demann son 12 zapot: “Zot pa anvi ale zot osi?” Pyer i reponn: “Senyer, kot lekel nou pou ale? Ou annan parol lavi eternel. Nou’n krwar e konnen ki ou sa Enn ki Sen sorti kot Bondye.” (Zan 6:67-69) Menm si Pyer ek lezot zapot pa vreman konpran sa ki Zezi pe ansennyen lo sa size, zot reste fidel. Pa sa i en zoli legzanp!

Menm si Zezi i kontan larepons Pyer, i fer sa remark: “Pa mon’n swazir douz zot, pourtan, enn parmi zot i fer kalonmni.” (Zan 6:70) Zezi pe koz lo Zida Iskaryot. I posib ki i apartir sa moman ki Zezi i remarke ki Zida pe konmans pran en move lapant.

Be kantmenm sa, Zezi i bezwen vreman kontan pour konnen ki Pyer ek lezot zapot osi pa’n aret swiv li e ki zot pare pour kontinyen fer sa travay ki sov lavi, zis parey Zezi pe fer.