Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 60

Laparans Zezi i sanze e zot vwar Kris dan son laglwar

Laparans Zezi i sanze e zot vwar Kris dan son laglwar

MATYE 16:28–17:13 MARK 9:1-13 LIK 9:27-36

  • EN VIZYON KOT LAPARANS ZEZI I SANZE

  • BANN ZAPOT I TANN LAVWA BONDYE

Zezi pe ansenny bann dimoun dan rezyon Sezare Filip, en landrwa ki apepre 25 kilomet avek Montanny Ermonn. Zezi i dir en keksoz ki sirprann son bann zapot. I dir: “Laverite mon dir zot, i annan serten ki pe debout la ki pa pou mor avan zot vwar Garson zonm pe vini dan son Rwayonm.”​—Matye 16:28.

Petet bann disip pe demann zot lekor ki Zezi pe esey dir. Apepre en semenn pli tar, i pran trwa parmi son bann zapot, Pyer, Zak ek Zan e i anmenn zot anler lo en montanny byen o. I tre probab ki i tar dan lannwit vi ki sa trwa zonm i ansonmey. Ler Zezi pe priye, son laparans i sanze la devan zot. Bann zapot i vwar son figir briye parey soley e son lenz i vin blan klate parey lalimyer.

Apre de zonm ki ganny idantifye konman “Moiz ek Eliya” i aparet. Zot konmans koz avek Zezi lo ‘son depar ki pou ariv Zerizalenm.’ (Lik 9:30, 31) I paret ki son depar pe refer avek lanmor Zezi ek son rezireksyon ki pou arive apre. Zezi fek koz lo la pa tro lontan pase. (Matye 16:21) Sa konversasyon i montre ki kontrerman avek sa ki Pyer ti’n ankouraz Zezi pour fer, i pa pe esey evit en lanmor fermal.

La sa trwa zonm i nepli ansonmey, zot etonnen, zot gete e ekoute. Sa i en vizyon, me i paret telman reel ki Pyer i esey rod en fason pour partisip dan sa ki pe pase. I dir: “Ansenyan, i byen ki nou la. Les nou mont trwa latant, enn pour ou, enn pour Moiz e enn pour Eliya.” (Mark 9:5) Eski Pyer i anvi mont bann latant pour ki sa vizyon i dir plis letan?

Ler Pyer pe koze, en nyaz klate i kouver zot e zot tann en lavwa dan sa nyaz dir: “Sa i mon garson ki mon kontan, sa enn ki mon’n aprouve. Ekout li.” Ler bann zapot i tann lavwa Bondye, zot per e tonm azenou lafas anba me Zezi i dir zot: “Leve. Pa per.” (Matye 17:5-7) Ler zot fer sa, sa trwa zapot pa vwar personn eksepte Zezi. Sa vizyon in fini. Ler lizour i fer e zot pe desann lo montanny, Zezi i donn zot sa lord: “Pa koz avek personn lo sa vizyon ziska ki Garson zonm i ganny resisite.”​—Matye 17:9.

Lefet ki Eliya ti dan sa vizyon, sa i fer bann zapot demann en kestyon. Zot dir: “Akoz bann profeser lalwa i dir ki Eliya i bezwen vin avan?” Zezi i reponn: “Eliya in fini vini, me zot pa ti rekonnet li.” (Matye 17:10-12) Zezi pe koz lo Zan ki batize ki ti annan en rol en pe parey pour Eliya. Eliya ti prepar semen pour Elisa e Zan ti prepar semen pour Kris.

Sa vizyon i vreman ankourazan pour Zezi ek son bann zapot! Sa vizyon i donn en apersi laglwar Kris dan Rwayonm Bondye. Alor parey Zezi ti’n promet, bann disip ti vwar “Garson zonm pe vini dan son Rwayonm.” (Matye 16:28) Ler zot ti lo sa montanny, zot ti ‘vwar pour zot menm son laglwar merveye.’ Menm si bann Farizyen ti anvi vwar en siny ki prouve ki Zezi i sa Lerwa ki Bondye in swazir, i pa ti donn zot en siny. Me bann disip ki pros avek Zezi in ganny drwa vwar Zezi sanz laparans e sa in konfirm bann profesi lo Rwayonm. Alor pli tar, Pyer ti kapab ekri: “Nou pli asire ki bann profesi pou ganny akonplir.”​—2 Pyer 1:16-19.