Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 56

Kwa ki vreman fer en dimoun enpir?

Kwa ki vreman fer en dimoun enpir?

MATYE 15:1-20 MARK 7:1-23 ZAN 7:1

  • ZEZI I KRITIK BANN TRADISYON IMEN

Anmezir ki Lapak lannen 32 i aprose, Zezi i okipe pe ansenny bann dimoun Galile. I tre probab ki apre sa, i al Zerizalenm pour Lapak, zis parey Lalwa Bondye i demande. Par kont, Zezi i fer atansyon akoz bann Zwif pe rod touy li. (Zan 7:1) Apre sa, i retourn Galile.

I tre probab ki Zezi i Kapernaoum ler bann Farizyen ek profeser lalwa i vin kot li sorti Zerizalenm. Akoz zot in fer sa vwayaz? Zot pe rod fason pour zot kapab akiz Zezi konmkwa i’n kas en lalwa relizye. Zot demann li: “Akoz ou bann disip pa swiv tradisyon nou zanset? Par egzanp, zot pa lav zot lanmen avan manze.” (Matye 15:2) Bondye pa ti zanmen demann son pep pour swiv sa koutim ‘lav lanmen ziska kot koud.’ (Mark 7:3) Par kont, pour bann Farizyen, sa i en gran lofans.

Olye reponn zot bann lakizasyon direkteman, Zezi i koz lo lafason ki zot zot volonterman kas Lalwa Bondye. I demann zot: “Akoz zot tradisyon i fer zot pa obei komannman Bondye? Par egzanp, Bondye ti dir, ‘Onor ou papa ek ou manman’ e ‘Sa ki ensilte son papa oubyen son manman i devret ganny met amor.’ Me zot zot dir, ‘En dimoun ki dir son papa oubyen son manman: “Tou sa ki mon annan pour kapab ed ou, mon’n fini donn li avek Bondye,” andotmo, sa dimoun pa oblize onor son papa ditou.’”​—Matye 15:3-6; Egzod 20:12; 21:17.

Bann Farizyen i dir ki larzan, propriyete ek okenn keksoz ki’n ganny dedye avek Bondye i pour tanp, alor i pa kapab ganny servi pour en lot keksoz. Me an realite, sa kado ki’n ganny dedye i ankor pour sa dimoun. Par egzanp, en garson i kapab dir ki son larzan ek propriyete i “korbann,” setadir ki sa larzan oubyen propriyete i en kado ki’n ganny dedye avek Bondye oubyen tanp. Alor, sa kado i devret ganny servi premyerman pour tanp. Sa garson i ankor kapab servi sa larzan oubyen propriyete, me i dir ki i pa kapab servi sa bann keksoz pour ed son paran aze ki dan bezwen. Koumsa, i nepli annan sa responsabilite pour pran swen avek zot.​—Mark 7:11.

Zezi i annan rezon ankoler ki zot in sanz Lalwa Bondye e i dir: “Zot in fer parol Bondye napa valer akoz zot tradisyon. Ipokrit, Izai ti annan rezon ler i ti profetiz sa lo zot: ‘Sa pep i onor mwan avek zot labous, me zot leker i vreman lwen avek mwan. I anven ki zot pe kontinyen ador mwan, parski se bann komannman zonm ki zot ansennyen.’” Bann Farizyen pa dir nanryen ler zot tann Zezi kritik zot. Alor i demann lafoul pour vin pli pre pour zot kapab tande. I dir: “Ekoute e konpran sa parol: Pa sa ki antre dan labous en zonm ki fer li vin enpir, me sa ki sorti dan son labous ki fer li vin enpir.”​—Matye 15:6-11; Izai 29:13.

Pli tar, ler zot dan en lakaz, bann disip i demann Zezi: “Eski ou konnen ki bann Farizyen pa’n kontan sa ki ou’n dir?” Zezi i dir: “Tou plant ki mon Papa ki dan lesyel pa’n plante pou ganny derasinen. Les zot, zot bann gid aveg. Alor, si en aveg i gid en lot aveg, tou le de pou tonm dan trou.”​—Matye 15:12-14.

I paret ki Zezi i sirprann ler Pyer, delapar bann disip, i demann Zezi pour eksplike kwa ki fer en dimoun enpir. Zezi i reponn: “Eski zot pa konnen ki sa ki en dimoun i manze i desann dan vant e apre i sorti dan lekor? Par kont, sa ki sorti dan labous i sorti dan leker e se sa bann keksoz ki fer en dimoun vin enpir. Par egzanp, se dan leker ki sorti bann move rezonnman, mert, adilter, imoralite seksyel, vol, fo  temwannyaz e koz an mal lo keksoz sakre. Se sa bann keksoz ki fer en dimoun vin enpir, me pran en repa san lav lanmen pa fer en dimoun vin enpir.”​—Matye 15:17-20.

Zezi pa pe dir ki nou pa devret prop e i pa ni pe dir ki en dimoun pa devret lav son lanmen avan i prepar en repa oubyen avan i manze. Plito, i pe kondann lipokrizi bann sef relizye ki met an plas bann tradisyon imen pour ki zot pa bezwen swiv bann lalwa Bondye. Anfet, se bann move aksyon ki sorti dan leker en dimoun, ki fer li enpir.