Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 31

Zot kas zepi zour Saba

Zot kas zepi zour Saba

MATYE 12:1-8 MARK 2:23-28 LIK 6:1-5

  • BANN DISIP I KAS ZEPI ZOUR SABA

  • ZEZI I “ANNAN LOTORITE LO SABA”

Aprezan Zezi ek son bann disip i al dan direksyon nor pour al Galile. I dan letan prentan e i annan bann lagrenn dible dan bann plantasyon. Bann disip i kas zepi pour manze akoz zot lafen. Me i en zour Saba e bann Farizyen pe get sa ki zot fer.

Rapel ki pa bokou letan pase, i ti annan serten Zwif Zerizalenm ki ti akiz Zezi ki i’n kas lalwa Saba e zot ti anvi touy li akoz sa. La aprezan, bann Farizyen i akiz Zezi akoz sa ki son bann disip in fer. “Gete! Ou bann disip pe fer sa ki kont lalwa zour Saba.”​—Matye 12:2.

Bann Farizyen i krwar ki kas zepi, frot frot li dan lanmen pour tir lapay i parey rekolte e bat dible. (Egzod 34:21) Zot in etabli bann lalwa sever konsernan bann travay ki defann fer zour Saba e sa i en gro fardo pour bann dimoun. Pourtan, Saba ti sipoze en zour zwaye e ankourazan spirityelman. Zezi i donn zot bann legzanp pour montre ki Zeova pa ti zanmen anvi ki Son lalwa lo Saba i ganny aplike dan sa fason sitan strik.

En legzanp ki Zezi i donnen i konsernan David ek son bann zonm. Ler zot ti lafen, zot ti aret kot tabernak e manz dipen prezantasyon. Normalman, se bann pret ki ti manz sa bann dipen ki ti’n fini ganny tire devan Zeova dan tabernak e ranplase par dipen fre. Par kont, dan sa sityasyon, David ek son bann zonm pa ti koupab pour manz sa dipen.​—Levitik 24:5-9; 1 Samyel 21:1-6.

Zezi i donn en dezyenm legzanp. “Pa zot in osi lir dan Lalwa ki zour Saba bann pret i travay dan  tanp san ki zot koupab pour kas lalwa Saba?” Zezi pe dir ki menm zour Saba, bann pret i touy bann zannimo pour fer sakrifis e zot osi fer lezot louvraz dan tanp. Zezi i osi dir, “Me mwan mon dir zot ki sa enn ki la i pli enportan ki tanp.”​—Matye 12:5, 6; Nonm 28:9.

Ankor enn fwa, Zezi i servi Lekritir pour eksplik zot: “Si zot ti’n konpran ki sa i vedir, ‘Pa sakrifis ki mon oule me konpasyon,’ zot pa ti pou’n kondann bann ki pa koupab.” Finalman, i dir zot: “Parski Garson zonm ki annan lotorite lo Saba.” La Zezi pe koz lo sa letan kot i pou annan lape ler i pou diriz Rwayonm pour mil an.​—Matye 12:7, 8; Osea 6:6.

I fer plizyer lannen depi ki bann imen pe soufer akoz vyolans ek lager partou kote e akoz zot lesklav Satan. Pa i pou fer en gran diferans ler nou pou dan sa gran zour Saba ler Zezi pou dirize! Nou pou vreman ganny sa repo ki nou anvi e bezwen!