Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 44

Zezi i kalmi en tanpet lo lanmer

Zezi i kalmi en tanpet lo lanmer

MATYE 8:18, 23-27 MARK 4:35-41 LIK 8:22-25

  • ZEZI I KALMI EN TANPET LO LANMER GALILE

Ozordi, Zezi in pas en gran lazournen dan son minister. Aswar, i dir son bann disip: “Annou al lot kote lanmer,” ki an fas Kapernaoum.​—Mark 4:35.

Bann Zerazenyen i reste dan les Lanmer Galile. Sa landrwa i osi ganny apele Dekapol. Bann lavil Dekapol i ganny bokou enfliyanse par kiltir Grek, me i osi annan en kantite Zwif ki reste laba.

Bann dimoun i vwar ler Zezi i kit Kapernaoum. Zot anbark dan bann kannot pour al lot kote lanmer zot osi. (Mark 4:36) Anfet, Lanmer Galile pa sitan gran, i parey en gran lak delo dou, ki anviron 21 kilomet longer e en larzer pa plis ki 12 kilomet. Me i ase fon.

Menm si Zezi i en zonm parfe, nou kapab konpran ki par ler i fatige akoz tou sa ki i pe fer dan son minister. Alor apre ki zot konmans navige, Zezi i alonze deryer dan kannot, i poz son latet lo en zorye e tonm dormi.

Serten zapot i bann maren byen kalipa, me sa vwayaz pa fasil. I annan bann montanny toultour sa lak e laplipar ditan delo Lanmer Galile i ase so. Par ler, divan fre sorti anler lo montanny i desann e melanz avek sa ler so ki par lao delo. Akoz sa, bann gro tanpet i deklare en sel kou lo lanmer. Sanmenm sa ki arive la. I pa pran bokou letan avan bann laroul i konmans kraz lo kannot. Kannot i konmans “ranpli avek delo e zot lavi [i] an danze.” (Lik 8:23) Kantmenm sa, Zezi i kontinyen dormi!

Bann zapot i bann bon maren ki’n deza pas dan movetan e zot fer zot mye pour anpes kannot koule. Me safwasi, nanryen pa marse. Zot konmans per pour zot lavi. Zot lev Zezi e dir li: “Senyer, sov nou, nou pe al mor!” (Matye 8:25) Bann disip i per ki zot pou noye!

Ler Zezi i leve, i dir son bann zapot: “Akoz zot sitan per koumsa? Akoz zot lafwa i ptigin?” (Matye 8:26) Apre Zezi i donn lord divan ek lanmer: “Silans! Reste trankil!” (Mark 4:39) Sa gro divan i aret soufle en sel kou e lanmer i kalmi. (Mark ek Lik i rakont sa levennman enpresyonan. Zot koz lo sa ki Zezi in fer premye e apre zot dir ki bann disip i mank lafwa.)

Zis mazin lefe ki sa i annan lo bann disip! Zot in fek vwar lanmer ki ti vreman move kalmi konpletman. Zot ganny en nespes lafreyer. Zot dir avek kanmarad: “Lekel li? Menm divan ek lanmer i obei li.” Zot ariv lot kote lanmer sen e sof. (Mark 4:41–5:1) Petet lezot kannot ki ti pe swiv in nobou retourn lo kote was lakot.

Pa i ankourazan pour konnen ki Garson Bondye i annan kontrol lo letan! Konman Lerwa, ler Zezi pou konpletman kontrol later, tou dimoun pou viv an sekirite, akoz i pou napa okenn dezas natirel!