Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 48

Menm si Zezi i fer mirak Nazaret, zot pa krwar dan li

Menm si Zezi i fer mirak Nazaret, zot pa krwar dan li

MATYE 9:27-34; 13:54-58 MARK 6:1-6

  • ZEZI I GERI BANN AVEG EK BANN KOZPA

  • BANN DIMOUN NAZARET PA KRWAR DAN ZEZI

Ozordi, Zezi in fer en kantite keksoz. Apre ki i’n vwayaze sorti Dekapol, i’n geri sa madanm ki ti annan lemorazi e resisit fiy Zairis. Me son lazournen pa fini la. Ler Zezi i kit lakour Zairis, de zonm aveg i swiv li e zot pe kriye: “Garson David, pran pitye pour nou.”​—Matye 9:27.

Lefet ki zot kriy Zezi “Garson David,” sa bann zonm i montre ki zot krwar ki Zezi i en desandans David ki pou vin Lerwa e ki i Mesi. I paret ki Zezi i inyor zot, petet pour gete si zot pou persiste e se sa ki zot fer. Ler Zezi i antre dan en lakaz, sa de zonm i swiv li e zot osi zot antre. Zezi i demann zot: “Eski zot annan lafwa ki mon kapab fer sa?” Zot reponn avek lasirans: “Wi, Senyer.” Alor Zezi i tous zot lizye e dir: “Ki sa ki zot in demande i arive dapre zot lafwa.”​—Matye 9:28, 29.

En sel kou zot vwar kler! Parey i’n fer pli boner, Zezi i demann zot pour pa dir lezot sa ki i’n fer. Me zot telman kontan ki pli tar zot koz lo li avek tou dimoun dan sa rezyon.

Ler sa de zonm pe kit sa landrwa, dimoun i anmenn en zonm ki pa kapab koze akoz i posede par demon. Zezi i sas sa demon e deswit sa zonm i konmans koze. Lafoul i enpresyonnen ler zot vwar sa e zot dir: “En keksoz koumsa pa’n zanmen deza arive Izrael.” Bann Farizyen osi i la. Zot pa kapab dir ki Zezi pa’n fer sa bann mirak, alor zot fer menm lakizasyon ki avan e zot demande kote i ganny pouvwar pour fer sa. Zot dir: “Se avek pouvwar sef demon ki i sas demon.”​—Matye 9:33, 34.

Pa bokou letan apre, Zezi i retourn Nazaret, me safwasi i avek son bann disip. Apepre enn an pase, i ti ansenny dan sinagog laba. O konmansman bann dimoun ti enpresyonnen avek sa ki Zezi ti dir me pli tar son lansennyman ti ofans zot e zot ti esey touy li. Ankor enn fwa Zezi i esey ed bann dimoun dan sa landrwa kot i’n grandi.

Zour Saba, i retourn dan Sinagog pour ansennyen. En kantite dimoun i etonnen e zot menm demande: “Kote sa zonm in ganny sa lasazes e ki mannyer i kapab fer sa bann mirak? Pa i garson sa sarpantye li? Son manman pa i apel Mari e son bann frer pa zot apel Zak, Zozef, Simon ek Zida? Son bann ser, pa zot tou zot la avek nou? Alor, kote i’n ganny tousala?”​—Matye 13:54-56.

Pour sa bann dimoun, Zezi i zis parey nenport ki dan sa landrwa. I konmsi dan zot menm zot pe dir: ‘Pa nou’n vwar li grandi, ki mannyer i kapab Mesi?’ Alor, malgre tou sa ki zot vwar, lasazes Zezi ek bann mirak ki i pe fer, zot pa krwar dan li. Vi ki zot abitye avek Zezi menm son fanmir pa krwar dan li. Sanmenm sa Zezi i dir: “En profet i ganny loner partou eksepte dan son prop lavil e dan son prop lakour.”​—Matye 13:57.

Zezi i sirprann ki zot telman mank lafwa. Alor i pa fer okenn mirak laba “eksepte poz son lanmen lo detrwa dimoun malad e geri zot.”​—Mark 6:5, 6.