Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 28

Akoz bann disip zezi pa zennen?

Akoz bann disip zezi pa zennen?

MATYE 9:14-17 MARK 2:18-22 LIK 5:33-39

  • BANN DISIP ZAN I DEMANN ZEZI AKOZ ZOT PA ZENNEN

Apre ki Zezi ti asiste Lapak lannen 30, Zan ki batize ti ganny met dan prizon. I fer en pe letan depi ki i dan prizon. Zan i oule ki son bann disip i vin bann disip Zezi, me pa zot tou ki’n fer sa.

La aprezan, Lapak lannen 31 i pros e serten disip Zan i vin kot Zezi e demann li: “Akoz nou ek bann Farizyen nou abitye zennen me ou bann disip pa zennen?” (Matye 9:14) Bann Farizyen i abitye zennen, pour zot, sa i en pratik relizye. Pli tar, Zezi i menm servi legzanp en Farizyen ki krwar i sitan drwat devan Bondye ki i priye: “Ar Bondye, mon remersye ou ki mon pa parey lezot dimoun . . . de fwa par semenn mon zennen.” (Lik 18:11, 12) Bann disip Zan osi ti annan labitid zennen. I osi kapab ki zot ti pe zennen akoz zot ti tris ki Zan ti dan prizon. Bann disip Zan i anvi konnen akoz bann disip Zezi pa zennen, petet pour montre ki zot osi zot sagren akoz sa ki’n arive avek Zan.

Zezi i servi en legzanp pour reponn zot: “Bann zanmi nouvo marye napa rezon pour zot dan dey osi lontan ki nouvo marye i avek zot, pa i vre? Me sa zour pou arive ler nouvo marye pou ganny pran avek zot, la zot pou zennen.”​—Matye 9:15.

Zan li menm ti’n refer avek Zezi konman en nouvo marye. (Zan 3:28, 29) Alor, pandan ki Zezi i la, son bann disip pa bezwen zennen. Pli tar ler Zezi i mor, son bann disip pou dan en gran sagrinasyon e zot pa pou anvi manze. Me keksoz pou sanze ler i ganny resisite! Alor, zot pou nepli annan rezon pour zennen akoz zot sagren.

Apre sa, Zezi i donn sa de legzanp: “Personn pa pyeste en vye lenz avek en latwal nef, parski sa latwal nef pou retresi e sa trou pou vin pli gran. Personn pa met nouvo diven dan bann vye boutey lapo. Si zot fer sa, sa boutey lapo pou pete, diven pou fann ater e boutey pou gate. Me dimoun i met nouvo diven dan bann boutey nef.” (Matye 9:16, 17) Ki Zezi pe esey dir?

Zezi pe esey ed bann disip Zan ki batize pour konpran ki personn pa devret ekspekte ki bann disip Zezi i swiv bann vye pratik larelizyon Zwif, tel parey zennen. I pa’n vin pour pyeste en vye form ladorasyon e fer li dire plis letan. Son letan in fini e i pe ganny ranplase. Zezi pe ansenny zot konsernan en ladorasyon ki napa nanryen pour fer avek larelizyon Zwif ki sa letan i ranpli avek bann tradisyon zonm. I pa pe esey met en latwal nef lo en vye lenz oubyen nouvo diven dan en vye boutey lapo ki’n red.