Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 54

Zezi i “dipen lavi”

Zezi i “dipen lavi”

ZAN 6:25-48

  • ZEZI I “DIPEN SORTI DAN LESYEL”

Ler Zezi ti dan les Lanmer Galile, i ti fer en mirak e nouri plizyer milye dimoun. Apre sa, i ti sove ler zot ti anvi fer li vin lerwa. Sa zour swar, i ti mars lo delo ler lanmer ti move e i ti sov Pyer ki ti osi mars lo delo, me ki ti konmans koule akoz i ti mank lafwa. Zezi ti osi kalmi divan e petet ler i’n fer sa, sa in anpes son bann disip fer nofraz.

La Zezi in retourn lo kote was Lanmer Galile, dan rezyon Kapernaoum. Bann dimoun ki Zezi in donn manze i rod li e zot demande: “Ki ler ou’n ariv la?” Zezi i reprimann zot akoz zot pe zis rod li pour ganny manze. I ankouraz zot pour “pa travay pour manze ki gate, me travay pour manze ki pa gate e ki donn lavi eternel.” Alor zot demande: “Ki nou devret fer pour ganny laprouvasyon Bondye?”​—Zan 6:25-28.

I posib ki zot pe mazin bann keksoz ki Lalwa i demann zot pour fer, me sa ki Zezi pe refer avek i pli enportan. I dir zot: “Pour ganny laprouvasyon Bondye, demontre lafwa dan sa enn ki i’n anvoye.” Par kont, malgre tou sa ki Zezi in fer, bann dimoun pa demontre lafwa dan Zezi. Zot demann li pour fer en siny pour zot kapab krwar dan li. Zot demande: “Ki ou pou fer? Nou zanset ti manz lamann dan dezer, zis parey i’n ganny ekrir: ‘I ti donn zot dipen sorti dan lesyel.’”​—Zan 6:29-31; Psonm 78:24.

Ler bann dimoun i demann Zezi pour fer en mirak, i fer zot konnen lekel ki donn li pouvwar pour fer sa: “Mon dir zot laverite, Moiz pa ti donn zot sa vre dipen sorti dan lesyel, me mon Papa i donn zot sa vre dipen ki sorti dan lesyel. Parski dipen Bondye i sa enn ki sorti dan lesyel pour donn lavi lemonn.” Me zot pa konpran sa ki Zezi pe esey dir zot, alor zot dir: “Senyer, toultan donn nou sa dipen.” (Zan 6:32-34) Me ki “dipen” Zezi pe koz lo la?

I eksplike: “Mwan menm sa dipen lavi. Sa ki vin kot mwan pa pou zanmen lafen ankor e sa ki demontre lafwa dan mwan pa pou zanmen swaf ankor. Me parey mon’n dir zot, menm si zot in vwar mwan zot pa krwar. . . . Mon’n desann sorti dan lesyel, pa pour fer mon prop lavolonte me pour fer lavolonte sa enn ki’n anvoy mwan. La lavolonte sa enn ki’n anvoy mwan, se ki mon pa perdi ni menm enn dan tou sa ki i’n donn mwan, me ki mon devret resisit zot dernyen zour. Parski sa i lavolonte mon Papa, ki sa ki aksepte Garson e demontre lafwa dan li pou ganny lavi eternel e mon pou resisit li dernyen zour.”​—Zan 6:35-40.

Ler bann Zwif i tann sa, zot ankoler e zot konmans kritik li. Zot pa konpran ki mannyer Zezi i kapab dir ki i “dipen sorti dan lesyel.” (Zan 6:41) Pour zot, i en senp zonm ki son paran i sorti dan lavil Nazaret, Galile. Bann dimoun i demande: “Eski sa pa Zezi garson Zozef, pa nou konn son papa ek son manman?”​—Zan 6:42.

Zezi i dir: “Aret konplent antre zot. Personn pa kapab vin kot mwan si mon Papa ki’n anvoy mwan pa atir li ver mwan e mon pou resisit li dernyen zour. La sa ki’n ganny ekrir dan liv bann Profet: ‘Zot tou zot pou ganny ansennyen par Zeova.’ Tou sa ki’n ekout e aprann avek Papa i vin kot mwan. Pa ki okenn imen in vwar Papa, zis sa enn ki’n sorti kot Bondye ki’n vwar Papa. Vreman mon dir zot laverite, sa ki krwar dan mwan pou ganny lavi eternel.”​—Zan 6:43-47; Izai 54:13.

Avan sa, ler Zezi ti koz avek Nikodenm, i ti mansyonnen ki pour en dimoun kapab ganny  lavi eternel i bezwen annan lafwa dan Garson zonm. I ti dir: “Nenport ki ki demontre lafwa dan [sel Garson Bondye] pa ganny detrir me i ganny lavi eternel.” (Zan 3:15, 16) Me la aprezan i pe koz avek en lafoul e i pe dir zot ki pour zot kapab ganny lavi eternel, zot bezwen aksepte rol Zezi dan plan Bondye. Ni lamann, ni sa dipen ki zot abitye manze Galile pa pou kapab donn zot lavi eternel. Alor, ki mannyer zot kapab ganny lavi eternel? Zezi i repet menm parol: “Mwan menm dipen lavi.”​—Zan 6:48.

Zezi i kontinyen koz lo sa menm size plis ankor dan sinagog Kapernaoum, annou vwar ki i annan pour dir.