Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 65

Zezi i ansennyen ler zot pe al Zerizalenm

Zezi i ansennyen ler zot pe al Zerizalenm

MATYE 8:19-22 LIK 9:51-62 ZAN 7:2-10

  • PWENNVI KI BANN DEMI FRER ZEZI I ANNAN LO LI

  • KI PLAS RWAYONM BONDYE I DEVRET ANNAN DAN NOU LAVI?

Pour en pe letan, Zezi in fer laplipar son bann aktivite Galile, kot plis dimoun in aksepte li konpare avek bann dimoun Zide. Deplis, ler i ti geri en zonm zour Saba Zerizalenm, “bann Zwif ti pli anvi touy li ankor.”​—Zan 5:18; 7:1.

Aprezan i lotonn lannen 32 e Lafet bann Latant (oubyen Payot) i pros. Sa lafet i ganny selebre pour set zour e wityenm zour zot fer en rasanbleman sakre. Sa lafet i ganny selebre a lafen rekolt e i en letan kot bann dimoun i dan lazwa e zot remersye Bondye.

Bann demi frer Zezi ki apel Zak, Simon, Zozef ek Zida i dir li: “Kit sa landrwa, al Zide.” Zerizalenm i sa landrwa prensipal kot dimoun i ador Bondye. Pandan sa trwa lafet ki ganny fer tou le lannen, i annan en kantite dimoun dan sa lavil. Bann frer Zezi i dir: “Napa personn ki fer keksoz an kasyet si i oule ki dimoun i konn li. Si ou pe fer sa bann keksoz, ale pour ki tou dimoun i vwar ou.”​—Zan 7:3, 4.

An realite, son kat frer ‘pa pe demontre lafwa dan li’ konman Mesi. Kantmenm sa, zot anvi ki bann dimoun ki’n rasanble pour sa lafet i vwar li fer bann mirak. Zezi i konnen ki sa i danzere, alor i dir zot: “Lemonn napa rezon pour ay zot, me i ay mwan, parski mon dir ki lemonn i fer sa ki move. Al sa lafet zot, pa konmela ki mon pou al lafet mwan, parski mon ler pa ankor arive.”​—Zan 7:5-8.

Detrwa zour apre ki bann frer Zezi in ale avek bann dimoun ki pe vwayaze, Zezi ek son bann disip i al an sekre akoz i pa oule ki tou dimoun i vwar zot. Zot pas par Samari, ki sa larout pli direk olye sa larout ki pas o bor Larivyer Zourden ki laplipar dimoun i pran. Zezi ek son bann disip pou bezwen en landrwa reste Samari alor i anvoy serten son bann disip par devan zot pour fer bann preparasyon. Bann dimoun sa lepok i abitye resevwar bann etranze avek lospitalite. Me dan sa landrwa, zot refize resevwar Zezi ek son bann disip akoz zot pe al Zerizalenm pour sa lafet Zwif. Zak ek Zan i ankoler, alor zot demande: “Senyer, eski ou anvi ki nou fer dife sorti dan lesyel pour ekstermin zot?” (Lik 9:54) Zezi i koz severman avek zot akoz zot in fer sa sizesyon e zot kontiny zot larout.

Ler zot pe ale lo semen, en profeser lalwa i dir Zezi: “Mon pou swiv ou partou kot ou ale.” Zezi i reponn: “Renar i annan zot trou e zwazo i annan zot nik, me Garson zonm napa okenn landrwa pour poz son latet.” (Matye 8:19, 20)  I pe fer resorti ki sa profeser lalwa pou ganny bann difikilte si i vin en disip Zezi e i paret ki sa profeser lalwa i tro fyer pour viv sa kalite lavi. Alor nou tou nou devret demann nou lekor, ‘Ki kantite sakrifis mon pare pour fer pour swiv Zezi?’

Zezi dir avek en lot zonm: “Vin mon disip.” Sa zonm i reponn: “Senyer, les mwan al anter mon papa avan.” Zezi i konn sirkonstans sa zonm alor i dir li: “Les bann mor anter bann mor, me ou ale e anons Rwayonm Bondye partou kote.” (Lik 9:59, 60) I paret ki papa sa zonm pa ankor mor. Si i ti’n mor, sa garson pa ti pou la pe koz avek Zezi. Sa zonm pa pare pour met Rwayonm Bondye premye dan son lavi.

Anmezir ki zot kontinyen desann Zerizalenm, en lot zonm i dir Zezi: “Mon pou swiv ou, Senyer, me les mwan al dir orevwar bann ki dan lakour avan.” Zezi i reponn: “Napa personn ki’n tyonbo en zouti pour labour later e ki get deryer li ki diny pour Rwayonm Bondye.”​—Lik 9:61, 62.

Bann ki anvi vin vre disip Zezi i bezwen reste konsantre lo sa travay Rwayonm. Si sa zonm ki labour oubyen kas later pa get drwat devan li, i tre probab ki sa pti transe kot i pou senm lagrenn pou tord. Si i poz son zouti ater pour get en kou deryer li, i pa pou fini son travay dan sa plantasyon aler. Pareyman, si en dimoun i get deryer dan sa lemonn, i tre probab ki i pou kit sa semen ki anmenn ver lavi eternel.