Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 34

Zezi i swazir douz zapot

Zezi i swazir douz zapot

MARK 3:13-19 LIK 6:12-16

  • SA DOUZ ZAPOT

I fer apepre enn an edmi depi ki Zan ki batize in entrodwi Zezi konman Pti Mouton Bondye. Ler Zezi in konmans son minister, plizyer zonm senser in vin son disip, parey Andre, Simon Pyer, Zan, petet Zak (frer Zan), Filip ek Bartelemi (ki osi ganny apele Natanael). Avek letan, plizyer lezot in swiv Kris.​—Zan 1:45-47.

Aprezan Zezi i pare pour swazir son bann zapot. Son bann zapot pou toultan travay ansanm avek Zezi e zot pou ganny en formasyon spesyal. Me avan ki Zezi i swazir zot, i al lo en montanny, petet pa tro lwen avek Kapernaoum o bor Lanmer Galile. I priy Bondye tou lannwit, san dout pour demann li lasazes ek son benediksyon. Son lannmen, i kriy son bann disip e i swazir 12 parmi zot pour vin son bann zapot.

Zezi i swazir sa sis zonm ki nou’n mansyonnen o konmansman. I osi swazir Matye ki travay dan lofis taks. Sa senk lezot ki ganny swazir i Zida (ki osi ganny apele Tade oubyen “garson Zak”), Simon sa enn ki devoue, Toma, Zak garson Alfe ek Zida Iskaryot.​—Matye 10:2-4; Lik 6:16.

Sa 12 zapot in swiv Zezi ziska aprezan, alor i konn zot byen. Serten parmi zot i son fanmir. I paret ki sa de frer, Zak ek Zan, i son kouzen. Serten i osi krwar ki Alfe ti frer Zozef, papa adoptif Zezi. Si i vre, Zak garson Alfe i kouzen Zezi.

Byensir i fasil pour Zezi rapel non son bann zapot. Me eski ou ou kapab? En keksoz ki kapab ed ou, se si ou gard antet ki i annan de parmi zot ki apel Simon, de ki apel Zak e de ki apel Zida. Simon (Pyer) i annan en frer ki apel Andre e Zak (garson Zebede) i annan en frer ki apel Zan. Sa pou ed ou rapel wit dan sa douz zapot. Parmi sa lot kat i annan en kolekter taks (Matye), enn ki pou annan bann dout pli tar (Toma), enn ki ti ganny apele ler i ti anba en pye fig (Natanael) ek zanmi Natanael (Filip).

Onz parmi sa bann zapot i sorti Galile, kot Zezi in grandi. Natanael i sorti Kana. Filip, Pyer ek Andre i sorti Betsayda. Pli tar, Pyer ek Andre i al reste Kapernaoum, kot aparaman Matye i reste. Zak ek Zan osi i reste Kapernaoum oubyen pa tro lwen e zot ti annan en biznes lapes lanmenm. I paret ki Zida Iskaryot ki trai Zezi pli tar i sa sel zapot ki sorti Zide.