Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 79

Akoz destriksyon i pros?

Akoz destriksyon i pros?

LIK 13:1-21

  • ZEZI I SERVI DE MALER POUR DONN EN LAVERTISMAN

  • EN MADANM ANDIKAPE I GANNY GERI ZOUR SABA

Zezi in servi diferan fason pour ankouraz bann dimoun pour reflesir lo zot relasyon avek Bondye. I ganny en lot lokazyon pour koz lo sa size apre son konversasyon avek bann dimoun an deor lakaz en Farizyen.

Serten parmi zot i koz lo en maler ki’n arive. Zot dir Zezi ki “[Gouverner Romen Pons] Pilat ti touy bann Galileen ler zot ti pe ofer zot sakrifis.” (Lik 13:1) Ki zot pe esey dir?

Petet sa bann Galileen i sa bann ki ti ganny touye ler plizyer milye Zwif ti proteste akoz Pilat ti’n servi larzan dan bwat kontribisyon tanp pour konstri en pon (aqueduct) pour anmenn delo Zerizalenm. Petet Pilat ti’n ganny sa larzan avek led bann ki ti ansarz tanp. I posib ki bann dimoun ki pe rakont sa zistwar i krwar ki sa maler ti ariv lo bann Galileen akoz zot ti’n fer bann keksoz mal. Me Zezi pa dakor.

I demande: “Eski zot krwar ki sa bann Galileen ki ti mor dan sa fason, zot pese ti pli pir ki tou lezot Galileen?” Son larepons i non. Me i servi sa lensidan pour averti bann Zwif: “Tan ki zot pa repantir, zot tou zot pou osi ganny detrir.” (Lik 13:2, 3) Apre sa, Zezi i koz lo en lot maler ki’n arive pa tro lontan e i posib ki sa i osi relye avek konstriksyon sa pon. I demande:

“Eski zot krwar ki sa 18 dimoun ki latour Siloam ti tonm lo zot e touy zot ti pli koupab ki tou lezot dimoun ki ti pe reste Zerizalenm?” (Lik 13:4) I kapab ki lafoul i krwar ki sa bann dimoun ti mor akoz zot ti’n fer en keksoz mal. Ankor enn fwa Zezi pa dakor. I konnen ki bann maler i kapab arive nenport ler e nenport landrwa e ki dan sa ka, sa maler ti en aksidan ki ti’n kapab ariv avek nenport ki. (Eklezyast 9:11) Me bann dimoun i devret aprann en leson avek sa levennman. Zezi i dir: “Tan ki zot pa repantir, zot tou zot pou ganny detrir parey zot.” (Lik 13:5) Be akoz i pe met lanfaz lo sa size aprezan?

Nou kapab konpran akoz ler nou mazinen ki kantite letan i reste li avan son lanmor. Zezi i servi en legzanp pour eksplik sa. “En zonm ti plant en pye fig dan son plantasyon rezen e ler i ti vin rod fri lo la i pa ti vwar ni enn. Alor i ti dir son zardinyen, ‘Get sa, i fer trwa-z-an depi ki mon pe vin rod fri lo sa pye fig me mon pa’n zanmen vwar ni enn. Koup li! Akfer kit li la si i pa pe raport okenn fri?’ Sa zardinyen ti dir son met, ‘Met, les li pour ankor enn an, mon ava fouy toultour li e met fimyen. Si apre sa i raport fri, sa i byen, me si non alor ou a koup li.’”​—Lik 13:6-9.

I fer plis ki trwa-z-an depi ki Zezi pe esey ed bann Zwif devlop lafwa. Par kont, pa bokou dimoun ki’n vin son disip e ki kapab ganny konsidere konman bann fri ki Zezi in prodwir. La pandan katriyenm lannen son minister, i pe fer plis zefor ankor. I konmsi i pe fouy toultour sa pye fig ki reprezant sa nasyon Zwif e i pe met fimyen par pres e ansenny an Zide ek Pere. Ki rezilta sa in anmennen? Pa bokou Zwif ki aksepte lansennyman Zezi. Konman en nasyon, bann Zwif i refize repantir e zot pou ganny detrir.

 Pa bokou letan apre, en zour Saba, en lot keksoz i arive ki montre ki bann Zwif pa’n aksepte lansennyman Zezi. Zezi pe ansennyen dan en sinagog. I vwar en madanm ki kourbe depi 18 an akoz i posede par en demon. Zezi i pran pitye pour li e i dir: “Madanm, ou’n geri.” (Lik 13:12) I poz son lanmen lo li, deswit sa madanm i debout drwat e konmans glorifye Bondye.

Sa i fer zofisye sinagog ankoler e i dir: “I annan sis zour ki travay i devret ganny fer, alor vin rod gerizon dan sa bann zour me pa zour Saba.” (Lik 13:14) Sa zofisye pa pe dir ki Zezi napa pwisans pour geri, me i pe kondann bann dimoun akoz zot in vin kot Zezi pour ganny geri zour Saba. Zezi i reponn dan en fason kler e lozik: “Ipokrit, pa sakenn ant zot ki la i delarg son toro oubyen bourik ki dan park pour anmenn li bwar delo zour Saba? Pa sa madanm ki en fiy Abraam e ki Satan in anmare pour 18 an i merit ganny delarge zour Saba?”​—Lik 13:15, 16.

Bann dimoun ki pe opoz li i onte me lafoul i dan lazwa akoz tou bann keksoz merveye ki zot pe vwar Zezi fer. Apre lanmenm la Zide, i repet de legzanp profetik konsernan Rwayonm. Zezi ti’n fini koz lo sa de legzanp pli boner ler i ti dan en kannot lo Lanmer Galile.​—Matye 13:31-33; Lik 13:18-21.