Skip to content

Al lo konteni

 SAPIT 74

Leson konsernan lospitalite ek lapriyer

Leson konsernan lospitalite ek lapriyer

LIK 10:38–11:13

  • ZEZI I VIZIT MART EK MARI

  • NOU BEZWEN PERSISTE DAN LAPRIYER

Betani i en vilaz ki en zistans anviron trwa kilomet avek Zerizalenm. I lo kote les Montanny Pye Zoliv. (Zan 11:18) Zezi i al kot lakaz de ser ki apel Mart ek Mari, Betani. Zot ek zot frer Lazar i zanmi Zezi e zot kontan pour resevwar li.

I en gran loner pour envit Mesi. Mart i vreman anvi fer tou sa ki i kapab pour Zezi, alor i konmans prepar en gran repa pour li. Pandan ki Mart pe travay, son ser Mari i asiz o bor Zezi pour ekout li. Avek letan, Mart i dir Zezi: “Senyer, ou pa vwar li en problenm ki mon ser in kit mwan tousel pe fer louvraz? Dir li vin ed mwan.”​—Lik 10:40.

Olye kritik Mari, Zezi i konsey Mart pour aret enkyet konsernan bann keksoz materyel. I dir: “Mart, Mart ou pe trakase e fatig ou avek bokou keksoz. Nou pa bezwen en kantite keksoz, zis en keksoz i ase. Mari in fer sa bon swa e sa pa pou ganny pran avek li.” (Lik 10:41, 42) Zezi i fer resorti ki i pa neseser pour pas en ta letan pe prepar en kantite pla. En senp manze i ase.

Mart i annan en bon lentansyon. I anvi demontre lospitalite. Me i telman pe konsantre pour prepar sa repa, i pa ganny sans ekout lansennyman presye sorti kot Garson Bondye! Zezi i dir ki Mari in fer en bon swa ki pou benefisye li pour touzour e sa i en bon leson pour nou rapel.

En lot fwa, Zezi i ansenny en leson ki enportan osi. En disip i demann li: “Senyer, montre nou konman pour priye zis parey Zan ti montre son bann disip.” (Lik 11:1) Zezi ti’n fini fer sa apepre enn an pase pandan son Sermon lo Montanny. (Matye 6:9-13) Me i kapab ki sa disip pa ti la sa zour, alor Zezi i repet bann pwen prensipal. Apre sa, i donn en legzanp ki montre ki nou bezwen persevere dan lapriyer.

“Meton enn ant zot i annan en zanmi e ou al kot li minwi e dir li, ‘Mon zanmi, donn mwan trwa dipen, parski enn mon zanmi fek ariv kot mwan apre en gran vwayaz e mon napa nanryen pour donn li.’ Me sa met lakour ki ti anndan ti dir: ‘Aret fatig mwan. Laport i deza take e mon bann zanfan pe dormi lo lili avek mwan. Mon pa kapab leve pour donn ou nanryen.’ Mon dir zot, menm si i pa pou leve e donn li nanryen akoz i son zanmi, me akoz i pe vreman persiste, i pou leve e donn li tou sa ki i bezwen.”​—Lik 11:5-8.

Zezi pa pe dir ki Zeova i parey sa zanmi dan sa legzanp e ki i pa anvi reponn bann lapriyer. O kontrer, i pe montre ki si en zanmi ki pa anvi fer en keksoz i pare pour fer li si sa dimoun i persiste, definitivman nou Papa ki kontan nou pou reponn bann lapriyer senser son bann serviter fidel! Zezi i osi dir: “Mon dir zot, kontinyen demande e zot pou gannyen, kontinyen rode e zot pou trouve, kontinyen tap laport e i pou ouver. Parski tou sa ki demande i gannyen, tou sa ki rode i trouve e tou sa ki tap laport, laport pou ouver.”​—Lik 11:9, 10.

Apre Zezi i met lanfaz lo sa pwen par fer en konparezon avek bann papa: “Lekel sa papa parmi zot ki si son garson i demann li en pwason, i pou donn li en serpan olye en pwason? Oubyen si i demann li en dizef i pou donn li en skorpyon? Alor, si zot, menm si zot move, zot konn donn bann bon kado zot zanfan, pa zot Papa ki dan lesyel pou pli pare ankor pour donn lespri sen bann ki pe demann li!” (Lik 11:11-13) Pa sa i en zoli lasirans ki nou Papa dan lesyel i pare pour ekout nou lapriyer e donn nou sa ki nou bezwen!