Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 77

Zezi i donn konsey konsernan larises

Zezi i donn konsey konsernan larises

LIK 12:1-34

  • LEGZANP EN ZONM RIS

  • ZEZI I KOZ LO BANN KORBO EK LIS

  • EN “PTI TROUPO” KI POU ANTRE DAN RWAYONM

Zezi pe pran en repa kot en Farizyen, plizyer milye dimoun i rasanble deor pour esper li. Sa in deza arive Galile osi. (Mark 1:33; 2:2; 3:9) La Zide, bokou dimoun i anvi vwar li e ekout li, kontrerman avek bann Farizyen ki pe manz avek li.

Sa premye keksoz ki Zezi i dir i annan en gran sinifikasyon pour son bann disip: “Fer atansyon lelven bann Farizyen, setadir lipokrizi.” Zezi in deza donn son bann disip sa lavertisman, me sa ki i’n vwar pandan sa repa i montre ki kantite i irzan pour aplik sa konsey. (Lik 12:1; Mark 8:15) Bann Farizyen i kapab fer krwar ki zot byen relizye pour kasyet sa ki zot vreman ete, me zot en gran danze ki bezwen ganny devwale. Zezi i eksplike: “Napa en keksoz ki byen kasyet ki pa pou ganny revele e napa sekre ki pa pou ganny devwale.”​—Lik 12:2.

I kapab ki laplipar dimoun dan lafoul i sorti Zide e zot pa’n tann Zezi ansennyen ler i ti Galile. Alor i repet bann pwen prensipal ki i ti’n dir avan. I dir zot: “Pa bezwen per sa bann ki kapab touy ou me ki pa kapab fer plis ki sa apre ki ou’n mor.” (Lik 12:4) Parey i’n fer avan, i fer resorti ki son bann disip i bezwen annan konfyans ki Bondye pou pran swen avek zot. Zot osi bezwen vin en disip Garson zonm e realize ki Bondye i kapab ed zot.​—Matye 10:19, 20, 26-33; 12:31, 32.

Apre sa, en zonm dan lafoul i koz avek Zezi lo son problenm. I dir: “Ansenyan, dir mon frer partaz avek mwan leritaz ki nou papa in kite.” (Lik 12:13) Lalwa i dir ki garson premye ne i devret ganny de fwa plis ki lezot zanfan, alor i pa devret annan okenn problenm. (Deterononm 21:17) Me i paret ki sa zonm i anvi ganny plis ki i sipoze gannyen. Avek lasazes, Zezi pa pran okenn kote dan sa zafer. I demande: “Msye, lekel ki’n apwent mwan ziz ouswa sa enn ansarz pour partaz keksoz ant zot de?”​—Lik 12:14.

Apre Zezi i donn tou dimoun sa konsey: “Gard zot lizye ouver e evit tou sort vorasite, parski menm ler en dimoun i annan en kantite keksoz, pa sa bann keksoz ki donn li lavi.” (Lik 12:15) Nenport ki kantite larises en dimoun i annan, pa en zour i pou mor e kit tou keksoz deryer? Zezi i servi en legzanp ki fasil pour rapel pour fer resorti sa pwen e ki montre lenportans pour annan en bon repitasyon devan Bondye.

“En zonm ris ti’n ganny en bon rekolt dan son plantasyon. Alor i ti mazinen dan li menm, ‘Ki mon devret fer la ki mon napa ankor landrwa pour met mon rekolt?’ Alor i ti dir, ‘Mon konnen ki mon pou fer: Mon pou kas mon bann stor e konstri bann pli gran. Mon pou met tou mon rekolt ek mon bann keksoz ladan e mon pou dir dan mwan menm: “Mon annan en kantite bon keksoz ki mon’n anmase pour plizyer lannen, aprezan mon pou profite, manze, bwar e anmize.”’ Me Bondye ti dir li, ‘Enbesil, ozordi swar ou pou mor. Lekel alor ki pou ganny sa bann keksoz ki ou’n anmase?’ Sanmenm sa ki arive avek en dimoun ki anmas en trezor pour li menm, me ki pa ris devan Bondye.”​—Lik 12:16-21.

Bann disip Zezi ek lezot ki pe ekout li i kapab tonm dan en latrap si zot tay deryer larises. Bann traka lavi i osi kapab vin en distraksyon ki anpes zot servi Zeova. Alor Zezi i repet sa bon konsey ki i ti donnen enn an edmi pase pandan Sermon lo Montanny:

 “Aret trakase konsernan sa ki zot pou manze pour viv oubyen lenz ki zot pou mete. . . . Get byen bann korbo: Zot pa senm lagrenn, ni rekolte, zot napa ni langar, ni stor, pourtan Bondye i donn zot manze. Pa zot annan bokou plis valer ki bann zwazo? . . . Get byen lafason ki bann lis i pouse: Zot pa rente, ni koud lenz, me mon dir zot ki menm Salomon dan tou son laglwar pa ti abiye parey enn sa bann lis. . . . Alor, aret enkyet pour sa ki zot pou manze e bwar e aret trakas tro bokou, . . . zot Papa i konnen ki zot bezwen sa bann keksoz. . . . Kontinyen rod son Rwayonm e i pou donn zot sa bann keksoz.​—Lik 12:22-31; Matye 6:25-33.

Lekel ki pou rod Rwayonm Bondye? Zezi i dir ki dan en sans zis en pti group dimoun fidel oubyen en “pti troupo” ki pou fer sa. Pli tar, Zeova pou revele ki i pou annan zis 144,000 dimoun. Ki pou arive avek zot? Zezi i asir zot: “Zot Papa in deside pour donn zot Rwayonm.” Zot pa pou konsantre lo anmas trezor lo later kot bann voler i kapab vole. Plito, zot pou konsantre lo “trezor dan lesyel ki pa pou zanmen gate,” kot zot pou diriz ansanm avek Kris.​—Lik 12:32-34.