Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 78

Bann administrater fidel i devret met zot pare!

Bann administrater fidel i devret met zot pare!

LIK 12:35-59

  • BANN ADMINISTRATER FIDEL I DEVRET MET ZOT PARE

  • ZEZI I VIN ANMENN DIVIZYON

Zezi in eksplike ki zis en “pti troupo” ki pou ganny en plas dan Rwayonm lesyel. (Lik 12:32) Me ganny en zoli rekonpans koumsa pa devret ganny pran alalezer. Anfet, apre sa Zezi i koz lo ki kantite i enportan pour en dimoun annan en bon latitid pour li kapab antre dan Rwayonm Bondye.

I pour sa rezon ki Zezi i demann son bann disip pour met zot pare pour son retour. I dir: “Met zot pare e gard zot lalanp alimen. Zot devret parey bann zonm ki pe esper zot met retournen sorti en maryaz, pour ki ler i vin tap laport, zot ava deswit kapab ouver laport pour li. Ere sa bann lesklav ki ler zot met i vini i vwar zot pe veye!”​—Lik 12:35-37.

Bann disip i kapab fasilman konpran sa legzanp ki Zezi in servi. Sa bann serviter ki Zezi i koz lo la in pare e zot pe esper zot met retournen. Zezi i eksplike: “Si [sa met] i vin tar aswar [ant ne-v-er diswar ek minwi] ouswa menm apre minwi [ant minwi ek trwa-z-er bomaten] e vwar zot pare, zot devret ere!”​—Lik 12:38.

Zezi pa pe zis donn konsey pour vin en bon serviter kot lakour son met. Sa i evidan ler Zezi i koz lo Garson zonm dan sa legzanp. I dir son bann disip: “Zot osi, met zot pare parski Garson zonm pe vin en ler ki zot pa pe ekspekte.” (Lik 12:40) Alor, Garson zonm setadir Zezi pou vini dan lavenir e i anvi ki son bann disip, sirtou bann ki form parti sa “pti troupo” i met zot pare.

Pyer i anvi byen konpran sa ki Zezi in dir, alor i demande: “Senyer, eski sa legzanp i zis pour nou ouswa pour tou dimoun osi?” Olye reponn Pyer direkteman, Zezi i donn en lot legzanp ki relye avek sa size: “Lekel vreman sa administrater fidel ki pridan ki son met pou met li ansarz son bann serviter pour kontinyen donn zot zot rasyon manze dan sa moman apropriye? Ere sa lesklav si ler son met i vini i vwar li pe fer son louvraz! Vreman mon dir zot, i pou met li ansarz tou son byen.”​—Lik 12:41-44.

Dan legzanp sa met ki sorti en maryaz, i kler ki sa “met” pe refer avek Zezi, Garson zonm. Alor i fer sans ki sa “administrater fidel” dan sa dezyenm legzanp pe refer avek bann dimoun ki form parti sa “pti troupo” ki Bondye pou donn zot Rwayonm. (Lik 12:32) La Zezi pe dir ki serten manm sa group pou donn “son bann serviter . . . zot rasyon manze dan sa moman apropriye.” Alor Pyer ek lezot disip ki Zezi pe ansennyen e nouri spirityelman i kapab konpran ki i pou annan en letan a lavenir kot Garson zonm pou vini. Ler Garson zonm pou vini, i pou annan en laranzman ki pou ganny met an plas pour donn manze spirityel “bann serviter” sa Met, setadir bann disip Zezi.

Zezi i met lanfaz lo lenportans pour son bann disip reste vizilan e vey byen zot latitid. Sa i akoz i fasil pour en dimoun aret veye oubyen menm opoz son bann frer ek ser. Zezi i dir: “Me si zanmen sa lesklav i dir dan li menm, ‘Mon met pe tarde’ e i konmans bat bann serviter ek servant, manze, bwar ziska i sou, alor, met sa lesklav pou vin en zour ki i pa pe ekspekte, en ler ki i pa konnen e i pou pini li severman e donn li en plas parmi bann enfidel.”​—Lik 12:45, 46.

Zezi i osi dir ki i’n vin pour “alim en dife lo later.” Sanmenm ki’n arive ler i’n koz lo  bann size ki kree bann divizyon. Bann lansennyman Zezi i parey en dife ki’n bril bann fo lansennyman ek tradisyon. Sa i menm fer bann dimoun ki sipoze ini vir kont kanmarad, par egzanp, “papa kont garson, garson kont papa, manman kont fiy, fiy kont manman, belmer kont belfiy e belfiy kont belmer.”​—Lik 12:49, 53.

Zezi i dir sa espesyalman pour son bann disip. Apre, Zezi i vire e get lafoul. Laplipar dimoun in konpletman refize aksepte levidans ki i Mesi, alor i dir zot: “Ler zot vwar nyaz dan was, deswit zot dir, ‘En tanpet pe al deklare’ e i arive. Ler vandsid pe soufle, zot dir, ‘I pou annan gro lasaler’ e i arive. Ipokrit, zot konn enterpret bann siny dan lesyel e lo later pour predir letan, me ki mannyer zot pa konn enterpret sa ki pe arive la konmela?” (Lik 12:54-56) I kler ki sa bann dimoun pa pare pour aksepte Mesi.