Skip to content

Al lo konteni

 SAPIT 8

Zot sov en move lerwa

Zot sov en move lerwa

MATYE 2:13-23

  • FANMIR ZEZI I SOVE E AL LEZIP

  • ZOZEF I AL NAZARET AVEK SON FANMIR

Zozef i lev Mari dan son sonmey pour dir li en keksoz irzan. Lanz Zeova fek aparet avek li dan en rev e dir li: “Leve, pran sa pti garson ek son manman e sov Lezip. Reste laba ziska ki mon a dir ou retournen, parski Erod pe al rod sa pti garson pour touy li.”​—Matye 2:13.

Deswit, Zozef, Mari ek zot garson i sove pandan lannwit. Zot fer sa zis a tan, akoz Erod i tande ki bann astrolog in anbet li. I’n demann zot pour tourn kot li pour donn li lenformasyon. Me zot in kit sa pei san retourn kot li. Erod i vreman ankoler. I ankor anvi touy Zezi, alor i donn lord pour touy tou bann pti garson de-z-an e mwens ki reste Betleenm e dan zalantour. I’n kalkil sa laz dapre sa ki bann astrolog in dir li.

Lanmor tou sa bann pti garson i vreman fer lapenn! Nou pa konnen konbyen pti garson ki ti ganny touye, me tou sa bann manman ki ti pe kriye e plere asodlarm ti akonpli en profesi Labib ki Bondye ti donnen atraver profet Zeremi.​—Zeremi 31:15.

Antretan, Zozef ek son fanmir in sove e al reste Lezip. Me en zour swar, lanz Zeova i aparet avek Zozef ankor enn fwa dan en rev. Sa lanz i dir li: “Leve, pran sa pti garson ek son manman e al dan pei Izrael, parski bann ki ti anvi pran lavi sa pti garson in mor.” (Matye 2:20) Alor Zozef i mazinen ki aprezan zot kapab retourn dan zot pei. Sa i akonpli en lot profesi Labib ki dir ki Bondye ti pou fer son Garson sorti Lezip.​—Osea 11:1.

I paret ki Zozef i anvi ki son fanmir i reste dan rezyon Zide, petet en lavil pros avek Betleenm kot zot ti pe reste avan zot sove pour  al Lezip. Me i tande ki se Arkelais, en garson Erod ki move ki pe diriz Zide. Alor dan en lot rev, Bondye i averti Zozef ki i danzere pour reste Zide. Aprezan, Zozef ek son fanmir i al reste dan lavil Nazaret, dan teritwar Galile, dan nor. Alor zot reste lwen avek Zerizalenm kot laplipar aktivite relizye Zwif i ganny fer. Zezi i grandi dan sa kominote e sa i akonpli en lot profesi: “I pou ganny apele en Nazareen.”​—Matye 2:23.