Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 115

Dernyen lafet Lapak ki Zezi i selebre i aprose

Dernyen lafet Lapak ki Zezi i selebre i aprose

MATYE 26:1-5, 14-19 MARK 14:1, 2, 10-16 LIK 22:1-13

  • ZIDA ISKARYOT I GANNY PEYE POUR TRAI ZEZI

  • DE ZAPOT I FER BANN PREPARASYON POUR LAPAK

Zezi in fini ansenny son kat zapot lo Montanny Pye Zoliv. I’n reponn zot kestyon konsernan ler i pou la konman Lerwa e lo lafen sa lemonn.

En kantite keksoz in arive sa zour le 11 Nizan! Petet i ler zot pe retourn Betani pour pas lannwit ki Zezi i dir son bann zapot: “Zot konnen ki ankor dan de zour i pou annan lafet Lapak e Garson zonm pou ganny livre pour li ganny met amor lo en poto.”​—Matye 26:2.

I paret ki Zezi i pas son lannmen, setadir Merkredi, trankil avek son bann zapot. Son Mardi, i ti’n reprimann bann sef relizye e kondann zot an piblik. Vi ki zot pe rod touy li, i pa al an piblik le 12 Nizan pour ki nanryen pa anpes li selebre Lapak avek son bann zapot apre soley kouse son lannmen, ler le 14 Nizan i konmanse.

Me bann sef pret ek ansyen pa pe reste trankil avan Lapak. Zot rasanble dan lakour lakaz Granpret Kaif. Akoz? Zot ankoler akoz Zezi in kondann zot. Aprezan, zot fer konplo pour rod en mwayen “pour tyonbo Zezi e touy li.” Kan e ki mannyer zot pou fer sa? Zot dir: “Me selman pa pandan lafet pangar lepep i revolte.” (Matye 26:4, 5) Zot per parski en kantite dimoun i kontan Zezi.

Antretan, i annan en dimoun ki al vwar bann sef relizye. Zot pa ti ekspekte ki enn bann zapot Zezi, Zida Iskaryot, ti pou vin kot zot. Satan in met sa nide dan lespri Zida pour trai son Met! Zida i demann zot: “Ki zot pou donn mwan pour ki mon livre li avek zot?” (Matye 26:15) Zot kontan pour tann sa, alor zot “dakor pour donn li larzan.” (Lik 22:5) Konbyen? Zot dakor pour donn li 30 pyes  larzan. Sa letan, pri en lesklav ti 30 pyes larzan. (Egzod 21:32) Sa i montre ki kantite bann sef relizye i mepriz Zezi akoz pour zot i napa valer. Aprezan, Zida i konmans “rod en loportinite pour trai li ler napa dimoun.”​—Lik 22:6.

Le 13 Nizan i konmans Merkredi apre soley kouse. Sa i sa sizyenm e dernyen swar ki Zezi i pase Betani. Son lannmen, zot pou bezwen fer bann dernyen preparasyon pour Lapak. Zot bezwen rod en pti mouton, touy li e roti li antye le 14 Nizan. Kote zot pou pran sa repa e lekel ki pou prepar li? Zezi pa’n donn tou sa detay. Alor, Zida pa kapab donn bann sef pret sa lenformasyon.

Probableman byen boner Zedi apremidi, zot ankor Betani. Zezi i anvoy Pyer ek Zan e dir zot: “Al prepar repa Lapak pour nou manze.” Zot dir: “Kote ou oule nou al prepare?” Zezi i eksplike: “Ler zot ariv dan lavil, en zonm ki pe anmenn en resipyan delo pou zwenn zot. Swiv li ziska kot sa lakaz ki sa zonm i antre. Dir avek met sa lakour, ‘Ansenyan i demann ou: “Kote lasanm envite i ete pour mwan kapab manz repa Lapak avek mon bann disip?”’ Sa zonm pou montre zot en gran lasanm anler ki annan sa ki neseser. Met tou keksoz pare laba.”​—Lik 22:8-12.

San dout, met sa lakour i en disip Zezi. Petet i ti konnen ki Zezi i kapab demande pour servi son lakaz pour sa lokazyon. Ler sa de zapot i ariv Zerizalenm, zot vwar tou keksoz parey Zezi ti’n dir zot. Alor zot fer sir ki sa pti mouton e tou lezot keksoz in pare pour ki sa 13 dimoun, setadir Zezi ek son 12 zapot, i kapab selebre Lapak.