Deswit apre ki Zezi in ganny batize par Zan, lespri sen Bondye i anmenn Zezi dan dezer Zide. I annan en kantite keksoz pour li reflesir lo la. Ler Zezi in batize, “lesyel ti ouver.” (Matye 3:16) Alor i kapab rapel bann keksoz ki i’n aprann e fer dan lesyel. Vreman, i annan en kantite keksoz pour li medit lo la!

Zezi i pas 40 zour ek 40 lannwit dan dezer. Pandan sa letan, i pa manz nanryen. Ler Zezi in vreman lafen, Satan i vin kot li pour esey tant li. I dir li: “Si ou en garson Bondye, dir sa bann ros vin dipen.” (Matye 4:3) Vi ki Zezi i konnen ki i mal pour servi sa pwisans ki i’n gannyen pour fer mirak pour satisfer son prop dezir, i rezet sa tantasyon.

Me Dyab pa aret la. I esey en lot metod. I anmenn Zezi anler lo miray tanp e demann li pour sot anba. Me Zezi pa les li ganny tante pour fer sa kalite spektak. Zezi i sit Lekritir pour monte ki i mal pour teste Bondye dan sa fason.

Apre, dan en trwazyenm tantasyon, Dyab i montre Zezi “tou bann rwayonm dan sa lemonn” e i dir: “Tousala mon pou donn ou si ou azenou devan mwan e ador mwan.” Me ankor enn fwa, Zezi i kareman refize e dir: “Sorti la ale Satan!” (Matye 4:8-10) I pa les li ganny tante pour fer sa ki mal parski i konnen ki i devret ador zis Zeova. Zezi i swazir pour reste fidel avek Bondye.

Nou kapab aprann en leson avek sa bann tantasyon ek lafason ki Zezi ti fer fas avek zot. Sa bann tantasyon ti reel e sa i montre ki Dyab pa zis lemal ki dan nou parey serten dimoun i dir. I en vre personnaz envizib. Sa resi i osi montre nou ki bann gouvernman sa lemonn i pour Dyab e ki i pe kontrol zot. Si non, ki mannyer i ti pou’n kapab ofer zot avek Zezi? I pa ti pou en vre tantasyon.

An plis ki sa, Dyab ti dir ki i pare pour rekonpans Zezi si i ti ador li zis en fwa e i ti menm pare pour donn Zezi tou bann rwayonm dan sa lemonn. I kapab arive ki Dyab i esey tant nou dan menm fason, petet par donn nou bann loportinite ki fer nou krwar ki nou kapab vin ris oubyen ganny en serten pouvwar ouswa pozisyon dan sa lemonn. Nou montre ki nou saz ler nou imit legzanp Zezi par reste fidel avek Bondye dan nenport tantasyon ki nou rankontre. Me pa bliye ki Dyab ti kit Zezi “ziska en pli bon lokazyon.” (Lik 4:13) I kapab fer menm parey avek nou, alor nou pa devret zanmen bes nou gard.