Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 16

Zezi i demontre devouman pour vre ladorasyon

Zezi i demontre devouman pour vre ladorasyon

ZAN 2:12-22

  • ZEZI I PIRIFYE TANP

Apre maryaz Kana, Zezi i al Kapernaoum. Manman Zezi ek son bann frer, setadir Zak, Zozef, Simon ek Zida pe vwayaz ansanm avek li.

Me akoz Zezi i al Kapernaoum? I paret ki sa lavil i pli gran e osi i pli fasil pour ganny akse avek ki Nazaret ek Kana. Deplis, en kantite parmi bann nouvo disip Zezi i reste Kapernaoum oubyen pa tro lwen. Alor, Zezi i kapab form zot dan rezyon kot zot reste.

Pandan ki Zezi i Kapernaoum, i osi fer bann mirak. Sa i fer ki en kantite dimoun dan sa lavil e dan zalantour i tann koz konsernan bann keksoz ki i fer laba. Me Zezi ek son bann disip i bann Zwif fidel, alor zot pou bezwen al Zerizalenm byento pour asiste Lapak lannen 30.

Ler bann disip Zezi i kot tanp Zerizalenm, sa ki Zezi i fer i vreman enpresyonn zot. I vreman diferan avek okenn keksoz ki zot in deza vwar avan.

Dapre Lalwa Bondye, bann Izraelit i bezwen fer bann sakrifis zannimo kot tanp e bann viziter i bezwen ganny manze pandan sa letan ki zot pase Zerizalenm. Alor Lalwa i permet bann ki sorti lwen pour vin Zerizalenm pour anmenn larzan pour aste bef, mouton, kabri ek lezot keksoz ki zot bezwen pandan sa letan ki zot Zerizalenm. (Deterononm 14:24-26) Sa i fer ki bann marsan Zerizalenm i vann bann zannimo ouswa zwazo dan en gran lakour dan tanp. Serten parmi zot pe vol dimoun par vann zot bann keksoz tro ser.

Zezi i ankoler ler i vwar sa. I zet ater larzan bann ki pe sanz larzan, savir zot latab e i pous sa bann zonm. Apre Zezi i dir: “Tir sa bann zafer la! Aret fer lakaz mon Papa vin en bazar!”​—Zan 2:16.

Ler bann disip Zezi i vwar sa, zot rapel sa profesi konsernan Garson Bondye ki dir: “Devouman pour ou lakaz pou brile dan mwan parey dife.” Me bann Zwif i demann li: “Ki siny ou pou fer pour montre ki ou annan drwa fer sa bann keksoz?” Zezi i reponn zot: “Detri sa tanp e mon pou rekonstri li dan trwa zour.”​—Zan 2:17-19; Psonm 69:9.

Bann Zwif i prezimen ki Zezi pe koz lo sa tanp ki la Zerizalenm, alor zot dir li: “I ti pran 46 an pour konstri sa tanp e ou, ou pou pran trwa zour pour rekonstri li?” (Zan 2:20) Me Zezi li pe refer avek son lekor konman en tanp. Trwa-z-an pli tar, son bann disip pou rapel sa bann parol ler i ganny resisite.