Skip to content

Al lo sa dezyenm lalis

Al lo konteni

Temwen Zeova

Kreol Seselwa

Zezi i semen, laverite ek lavi

 SAPIT 84

Responsabilite en disip Kris

Responsabilite en disip Kris

LIK 14:25-35

  • EN DIMOUN I BEZWEN KALKILE KONBYEN I POU KOUT LI POUR VIN EN DISIP KRIS

Zezi in ansenny bann keksoz enportan ler i’n pran en repa kot lakour en sef bann Farizyen. Anmezir ki Zezi i al Zerizalenm, en gran lafoul i swiv li. Akoz? Eski zot vreman anvi vin son vre disip e fer nenport kwa ki zot ganny demande?

Pandan zot vwayaz, Zezi i dir en keksoz ki kapab sok serten parmi zot: “Si en dimoun i vin kot mwan me i pli kontan son papa, manman, madanm, zanfan, frer, ser oubyen menm son prop lavi ki mwan, i pa kapab vin mon disip.” (Lik 14:26) Me ki Zezi pe esey dir ler i dir sa?

Zezi pa pe dir ki son disip pa devret kontan zot fanmir. Plito, i pe dir ki zot devret kontan Zezi plis ki zot fanmir. Zot pa devret parey sa zonm ki ti’n ganny envite sa dinen me ki ti refiz sa lenvitasyon enportan akoz i ti’n fek marye. (Lik 14:20) Labib i dir ki Zakob, en zanset bann Zwif, “pa ti kontan” Lea me i ti kontan Rasel. Sa i vedir ki i ti pli kontan Rasel ki Lea son ser.​—Zenez 29:31.

Remarke ki Zezi i dir ki en disip i devret pli kontan Zezi ki “menm son prop lavi.” Sa i vedir ki en vre disip i menm pare pour mor si i neseser. I kler ki i en gro responsabilite pour vin en disip Kris. I pa devret ganny pran alalezer san byen reflesir.

En dimoun i kapab ganny bann difikilte ek persekisyon ler i vin en disip, parski Zezi i dir: “Sa ki pa anmenn son poto martir e swiv mwan, i pa kapab vin mon disip.” (Lik 14:27) Bann vre disip Zezi i bezwen pare pour anmenn zot poto setadir ki zot devret pare pour soufer zis parey Zezi. Zezi ti menm dir ki son bann lennmi pou touy li.

Alor lafoul ki pe swiv Zezi i bezwen reflesir seryezman lo sa ki enplike pour vin en disip Kris. Zezi i servi en legzanp pour fer sa pwen pli kler. I dir: “Par egzanp, lekel parmi zot ki oule konstri en lakaz ki pa premyerman asize e kalkile konbyen i pou kout li pour vwar si i annan ase larzan pour li fini li? Parski si non, i kapab fer son fondasyon me i pa arive fini li.” (Lik 14:28, 29) Alor avan ki bann ki pe al Zerizalenm avek li i vin son disip, zot devret determinen pour fer tou sa ki zot in deside pour fer. I met lanfaz lo sa pwen par servi en lot legzanp:

“Ki lerwa ki pe al lager kont en lot lerwa ki pa premyerman asize e rod konsey pour vwar si i kapab ranport laviktwar avek 10,000 solda kont sa enn ki annan 20,000 solda? Anfet, si i pa kapab fer li, letan ki sa lot lerwa i ankor lwen, i pou anvoy bann anbasader pour fer lape. Dan menm fason, zot kapab asire ki si en  dimoun pa abandonn tou son bann byen, i pa pou kapab vin mon disip.”​—Lik 14:31-33.

Byensir, Zezi pa pe zis dir sa pour sa lafoul ki pe swiv li lo semen. Tou dimoun ki aprann konn Kris i bezwen pare pour fer sa ki Zezi in dir. Sa i vedir ki si zot anvi vin son disip, zot bezwen pare pour sakrifye tou sa ki zot annan, par egzanp zot byen materyel e menm zot lavi. Sa i en keksoz ki nou devret reflesir e priy lo la.

Aprezan Zezi i koz lo en keksoz ki i ti’n deza koz lo la dan son Sermon lo Montanny, ler i ti dir zot, “zot disel later.” (Matye 5:13) I tre probab ki i ti pe dir ki zis parey disel i prezerv en keksoz e anpes li gate, son bann disip i kapab ed lezot pour pa ganny kontaminen spirityelman oubyen moralman. La ver lafen son minister, Zezi i dir: “Nou asire ki disel i bon. Me si disel i nepli sale, ki mannyer i pou revin sale?” (Lik 14:34) Bann dimoun i konnen ki serten kalite disel pa pir e i kapab annan later ladan. Si sa disel pa vreman sale, alor i pa bon pour nanryen.

La Zezi pe montre ki menm si zot enn son disip depi en bon pe letan, zot bezwen fer sir ki zot pa perdi zot determinasyon pour reste son disip. Si sa arive, zot pou nepli itil, zis parey disel ki nepli sale. Deplis, dimoun i kapab boufonn zot, zot pa pou ganny laprouvasyon Bondye e zot menm kapab sali son non. Pour montre ki i vreman enportan pour pa les sa arive, Zezi i dir: “Sa enn ki annan zorey pour ekoute, ekoute.”​—Lik 14:35.