Skip to content

Al lo sa dezyenm lalis

Al lo konteni

Temwen Zeova

Kreol Seselwa

Retourn kot Zeova

 PARTI KAT

Konsyans sarze—“Pirifye mwan avek mon pese”

Konsyans sarze—“Pirifye mwan avek mon pese”

“Mon nouvo plas travay ti permet mwan avek mon fanmir pour viv en pli bon lavi, me i ti osi enfliyans mwan pour fer bann keksoz ki pa apropriye. Mon ti konmans partisip dan bann lafet, levennman politik e menm al lanmes. Mon ti inaktif konman en Temwen Zeova pour 40 an. Pli letan ti pase, pli mon ti krwar ki Zeova pa ti pou pardonn mwan. Mon pa ti kapab pardonn mon lekor pour tou sa ki mon ti’n fer. Apre tou, mon ti konn laverite avan ki mon ti pran sa move semen.”—Martha.

I EN fardo pour annan en konsyans sarze. Lerwa David ti ekri: “Mon pa kapab aret mazin mon bann fot, zot tro lour pour mwan anmennen.” (Psonm 38:4) Serten Kretyen in tonm dan dezespwar akoz zot konvenki ki Zeova pa pou zanmen kapab pardonn zot. (2 Korentyen 2:7) Eski sa i vre? Menm si ou’n komet bann pese grav, eski ou telman elwannyen avek Zeova ki i pa pou zanmen kapab pardonn ou? Definitivman non!

“Annou aranz keksoz antre nou”

Zeova pa abandonn bann ki repantir. Anfet, i rod zot! Dan sa parabol garson perdi, Zezi i konpar Zeova avek en bon papa ki son garson i abandonn son fanmir e viv en lavi dezordonnen. Avek letan, sa garson i deside pour retourn kot li. Sa garson “ti ankor ase lwen avek lakour, ler son papa ti war li, e son leker ti touse avek konpasyon. I ti taye, i ti al zwenn li, i ti ser li dan son lebra e i ti anbras li.” (Lik 15:11-20) Eski ou anvi apros avek Zeova me ou krwar ki ou “ankor ase lwen” avek li? Parey sa papa dan parabol Zezi, Zeova i annan konpasyon pour ou. I enpasyan pour vwar ou retournen.

Me ki ou kapab fer si ou krwar ki ou bann pese i tro grav oubyen ki i annan tro bokou pour Zeova pardonnen? Silvouple reflesir lo lenvitasyon Zeova ki ganny trouve dan Izai 1:18: “Zeova i dir: ‘Aprezan, vini annou aranz keksoz antre nou. Menm si zot pese i byen rouz, zot pou vin blan parey lanez.’” Wi, menm bann pese ki paret parey en tentir byen rouz lo en latwal blan i kapab ganny pardonnen par Zeova.

Zeova pa anvi ki ou kontinyen soufer avek en konsyans sarze. Alor, ki mannyer ou kapab ganny soulaze e annan en konsyans kler ler ou ganny pardonnen avek Bondye? Annou vwar de letap ki Lerwa David ti pran. Premyerman i ti dir: “Mon pou konfes mon bann fot avek Zeova.” (Psonm 32:5) Rapel, Zeova in deza envit ou pour apros avek li dan lapriyer e pour “aranz keksoz” avek li. Aksepte sa lenvitasyon. Konfes ou fot avek Zeova e dir li ki mannyer ou santi. Atraver son prop leksperyans, David ti kapab priy avek konfyans: “Pirifye mwan avek mon pese. . . .  O Bondye, ou pa pou mepriz en leker kase e brize.”Psonm 51:2, 17.

Dezyenmman, David ti ganny led avek profet Natan, ki Bondye ti’n swazir pour reprezant li. (2 Samyel 12:13) Ozordi, Zeova in donn bann ansyen dan kongregasyon ki’n ganny formen pour ed bann ki repantir repar zot lanmitye avek li. Ler ou koz avek bann ansyen, zot pou  servi Labib e fer bann lapriyer ki pou konsol ou, diminyen oubyen ed ou rezet bann santiman negatif e ed ou geri spirityelman.Zak 5:14-16.

Zeova i anvi ki ou ganny soulaze e annan en konsyans kler

“Ere sa enn ki son lofans in ganny pardonnen”

I vre, petet ou santi ki enn parmi bann keksoz pli difisil pour fer se pour konfes ou bann pese avek Zeova e koz avek bann ansyen. I paret ki David osi ti santi koumsa. Pour en pe letan i ti “reste trankil,” i pa ti dir nanryen konsernan bann pese ki i ti’n komet. (Psonm 32:3) Me pli tar, i ti apresye bann byenfe ki i ti gannyen ler i ti konfes son bann pese e sanz son latitid.

Enn parmi bann pli gran byenfe ki David ti gannyen se ki i ti reganny son lazwa. I ti ekri: “Ere sa enn ki son lofans in ganny pardonnen e ki son pese in ganny pardonnen.” (Psonm 32:1, not.) I ti osi priye: “O Zeova, ouver mon labous pour ki mon kapab loue ou.” (Psonm 51:15) David ti apresye pardon Bondye e i ti nepli annan en konsyans sarze, sa ti motiv li pour anvi koz avek lezot konsernan Zeova.

Zeova i anvi ki ou ganny soulaze e annan en konsyans kler. I pa anvi ki ou koz lo li ek son plan avek en konsyans sarze, me avek senserite ek vre lazwa. (Psonm 65:1-4) Rapel ki Zeova in envit ou pour ganny ‘pardon ou pese’ pour ki ou lafors spirityel i ganny ‘renouvle.’Akt 3:19, 20.

Sanmenm ki ti arive avek Martha. I dir: “Mon garson ti kontinyen anvoy mwan bann magazin Latour Veyer ek Awake! Dousman dousman mon ti reaprann lo Zeova. Sa ki ti fer li pli difisil pour mwan retournen se sa nide ki mon ti bezwen demann pardon pour tou sa bann pese ki mon ti’n fer. Me finalman, mon ti priye e demann Bondye pour pardonn mwan. Mon pa oule krwar ki mon ti esper 40 an avan ki mon retourn kot Zeova. Mon leksperyans i montre ki menm apre en kantite lannen, en dimoun i kapab ganny en lot sans pour servi Bondye e retourn kot Zeova sa Bondye lanmour.”