Skip to content

Al lo sa dezyenm lalis

Al lo konteni

Temwen Zeova

Kreol Seselwa

Retourn kot Zeova

 PARTI TRWA

Ofanse—Ler nou annan rezon ‘ofanse’

Ofanse—Ler nou annan rezon ‘ofanse’

“En ser dan mon kongregasyon ti akiz mwan konmkwa mon ti’n vol son larzan. Lezot ti tande ki’n arive e zot ti konmans pran kote. Pli tar sa ser ti dir mwan ki i ti’n ganny lezot detay ki ti montre ki mon pa ti koupab. Menm si i ti demann mwan leskiz, dan fon mon leker mon ti santi ki mon pa ti pou zanmen kapab pardonn li pour sa ki i ti’n fer.”—Linda.

PAREY Linda, eski ou’n deza ganny ofanse akoz sa ki en frer ouswa en ser in fer ou? Malerezman, serten in sitan ankoler akoz sa ki lezot in fer ki sa in afekte zot spirityalite. Eski sanmenm ki’n arive avek ou?

Eski okenn dimoun i kapab “separ nou avek lanmour Bondye”?

Pour dir laverite, par ler i kapab vreman difisil pour pardonn en frer oubyen ser ki’n ofans nou. Apre tou, bann Kretyen i devret kontan kanmarad. (Zan 13:34, 35) Si en frer ouswa ser pa’n azir byen anver nou, telman nou ankoler e blese, sa i kapab tap nou en kantite.Psonm 55:12.

Byensir, Labib i montre ki par ler bann Kretyen i annan rezon ‘ofanse.’ (Kolosyen 3:13) Kantmenm sa, ler sa i ariv avek nou personnelman, nou kapab vwar li difisil pour fer fas avek sa sityasyon. Kwa ki kapab ed nou? Annou vwar trwa prensip sorti dan Labib:

Nou Papa dan lesyel i konn tou sa ki pase. Zeova i obzerv tou sa ki arive, sa i enkli tou lenzistis ki nou sibir e lafason ki sa i fer nou soufer. (Ebre 4:13) Deplis, Zeova osi i soufer ler nou soufer. (Izai 63:9) I pa zanmen permet ki “lasoufrans, lenkyetid” oubyen nenport lezot keksoz, ni menm enn son bann serviter, “separ nou avek lanmour Bondye.” (Romen 8:35, 38, 39) Eski pa sa i motiv nou pour imit Zeova e pa permet nanryen oubyen personn gat nou lanmitye avek li?

Pardonnen pa vedir tolere. Ler nou pardonn en dimoun ki’n bles nou, sa pa vedir ki nou minimiz, zistifye, fer leskiz oubyen toler son aksyon. Rapel ki Zeova pa zanmen toler pese, me i pardonnen ler i annan en rezon pour fer li. (Psonm 103:12, 13; Abakouk 1:13) Ler Zeova i ankouraz nou pour pardonn lezot, i pe demann nou pour imit li. Zeova pa “reste ankoler pour touzour.”Psonm 103:9; Matye 6:14.

Ler nou nepli gard rankin, nou menm ki benefisye. Dan ki sans? Annou pran en legzanp. Meton ou anmans en ros, petet enn ki ase leze e tenir li dan ou lanmen, ou lebra drwat devan ou. I tre probab i pa ti pou en problenm pour tenir sa ros pour en pti pe letan. Me ki ti pou arive si ou ti esey tenir li pour bokou plis letan? Ki kantite letan ou ti pou kapab tenir li? Detrwa minit? Enn erdtan oubyen plis? San dout, ou lebra ti pou konmans fermal! Me an realite pwa sa ros pa’n sanze. Me pli ou tenir li, pli ou santi konmsi i pli lour. I menm parey ler nou gard rankin. Pli nou reste ankoler, menm en pti lakoler, pli sa pou fer nou dimal. I fer sans alor ki Zeova i ankouraz nou pour pa gard rankin. Wi, ler nou les pase lofans, nou menm ki benefisye.Proverb 11:17.

Nou menm ki benefisye ler nou nepli gard rankin

 “Mon ti santi konmsi Zeova li menm ki ti pe koz avek mwan”

Kwa ki ti ed Linda pour pa gard rankin anver sa ser pour lafason ki i ti’n tret li? Plizyer keksoz ti ed li. Enn parmi se ki i ti medit lo bann rezon ki Labib i donnen pour pardonn lezot. (Psonm 130:3, 4) Sa ki ti vreman motiv Linda se ki i ti konnen ki ler nou pardonn lezot, Zeova i pardonn nou. (Efezyen 4:32–5:2) Linda i dir sa konsernan lafason ki sa bann lansennyman ti tous li: “Mon ti santi konmsi Zeova li menm ki ti pe koz avek mwan.”

Avek letan, Linda ti nepli gard rankin. I ti pardonn sa ser e aprezan zot de bon zanmi. Linda i kontinyen servi Zeova. Ou kapab asire ki Zeova i anvi ed ou pour fer parey.