Skip to content

Al lo sa dezyenm lalis

Al lo konteni

Temwen Zeova

Kreol Seselwa

Labib—Ki son mesaz?

 SEKSYON 11

Bann kantik enspire ki donn rekonfor ek lansennyman

Bann kantik enspire ki donn rekonfor ek lansennyman

David, ansanm avek lezot dimoun i konpoz bann kantik pour servi dan ladorasyon. Dan liv Psonm i annan lakopi 150 sa bann kantik

PLI gran liv dan Labib i bann kantik sakre. Liv Psonm antye ti ganny ekrir pandan en peryod 1,000 an. Dan liv Psonm i annan bann pli zoli fason eksprim en lafwa for e profon ki’n deza ganny ekrir. Liv Psonm i dekrir plizyer lemosyon ki bann imen i eksprimen parey lazwa, louanz, remersiman e osi sagrinasyon, latristes ek repantans. I kler ki sa bann psalmis ti annan konfyans dan Bondye ek en relasyon tre pros avek li. Egzamin serten bann tenm ki ganny elabore dan sa bann kantik.

Zeova i annan drwa konman Souvren, i merit ganny adore e loue. Dan Psonm 83:18, nou lir: “Ou, ki ou non i Zeova, ou tousel ki Tre O lo later antye.” Plizyer psonm i loue Zeova pour son bann travay kreasyon parey, en lesyel ranpli avek zetwal, zoli zoli keksoz lo later e sa fason merveye ki lekor imen in ganny fer. (Psonm 8, 19, 139, 148) Lezot i glorifye Zeova konman sa Bondye ki azir pour delivre e protez bann dimoun ki fidel avek li. (Psonm 18, 97, 138) Lezot ankor i glorifye li konman sa Bondye lazistis, ki soulaz bann ki pe ganny abize e sa Enn ki anmenn pinisyon lo bann ki move.—Psonm 11, 68, 146.

Zeova i ede e rekonfort sa bann ki kontan li. Petet sa psonm pli renonmen i sa enn venntrwazyenm, kot David i dekrir Zeova konman en Berze ki annan lanmour, ki gid, protez e pran swen avek son mouton. Psonm 65:2 i rapel bann adorater Bondye ki Zeova i “ekout lapriyer.” Bokou dimoun ki’n tonm dan pese grav in ganny rekonforte en kantite atraver Psonm 39 ek 51 kot David ti ekrir lo son repantans pour son fot grav atraver bann parol tousan e eksprim son lafwa ki Zeova pou pardonn li. Psonm 55:22 i ankouraz nou pour annan konfyans dan Zeova e met tou nou bann fardo lo Li.

Zeova pou sanz lemonn atraver Rwayonm Mesi. Plizyer pasaz dan liv Psonm i aplik direkteman avek Mesi, sa Lerwa ki ti ganny predir. Psonm 2 i profetize ki sa Dirizan pou detrir bann move nasyon ki opoz li. Psonm 72 i montre ki sa Lerwa pou elimin lafen, lenzistis ek labi. Dapre Psonm 46:9, atraver Rwayonm kot Kris pou dirize, Bondye pou elimin lager e menm detrir tou bann zarm lager. Dan Psonm 37, nou lir ki bann mesan pou nepli egziste, tandis ki bann ki drwat zot pou reste lo later pour touzour, rezwir lape ek larmoni dan lemonn antye.

—Baze lo liv Psonm.