Skip to content

Al lo sa dezyenm lalis

Al lo konteni

Temwen Zeova

Kreol Seselwa

Labib—Ki son mesaz?

 SEKSYON 15

En profet ki an egzil i ganny vizyon lo lavenir

En profet ki an egzil i ganny vizyon lo lavenir

Danyel i profetiz lo Rwayonm Bondye ek larive Mesi. Babilonn i tonbe

DANYEL, en zenn ki ti annan en lentegrite vreman remarkab, ti ganny anmennen an egzil Babilonn avan ki Zerizalenm ti ganny detrir. Ansanm avek lezot Zwif ki ti ganny anmennen an egzil apre defet rwayonm Zida, zot ti ganny serten liberte avek sa bann dimoun ki ti’n kaptir zot. Diran sa plizyer lannen son lavi ki i ti reste Babilonn, Danyel ti ganny bokou benediksyon avek Bondye. I ti menm sap lanmor dan en trou lyon e ganny bann vizyon ki ti permet li vwar sa ki ti pou arive alavenir. Bann profesi pli enportan Danyel ti konsantre lo Mesi ek Son renny.

Danyel i aprann kan Mesi pou arive. Danyel ti ganny dir kan ki pep Bondye ti pou kapab ekspekte “Mesi sa Lider”: 69 semenn lannen, apre ki lord pour rebatir e rekonstrir miray Zerizalenm i ganny donnen. Dan en semenn normal i annan set zour; en semenn lannen i fer set lannen. Sa lord ti ganny donnen en bon pe letan apre lanmor Danyel, sa ti an 455 A.N.L. Si ou konmans avek sa lannen, 69 “semenn” ki ti al pour 483 lannen ti termin lannen 29 N.L. Dan lot parti sa pti liv nou pou vwar ki ti arive sa lannen. Danyel ti osi vwar davans ki Mesi ti pou ganny met a mor konman en ranson pour pardonn pese.—Danyel 9:24-26.

Mesi pou vin Lerwa dan lesyel. Dan en vizyon ekstraordiner lo lesyel li menm, Danyel ti vwar Mesi ki ganny refer avek konman “en dimoun ki parey garson zonm,” pe aprose kot tronn Zeova. Zeova ti donn li “dominasyon, dinite ek rwayonm.” Sa rwayonm ti pou dire pour touzour. Danyel ti osi aprann konsernan en detay eksitan lo Rwayonm Bondye dan lanmen Mesi, sa Lerwa ti pou partaz son renny avek lezot, en group ki ganny apele “bann sen sa Enn Tre O.”—Danyel 7:13, 14, 27.

Sa Rwayonm pou detrir bann gouvernman sa lemonn. Bondye ti donn Danyel sa abilite pour enterpret en rev ki ti pe trouble Neboukadnetsar, lerwa Babilonn. Sa lerwa ti’n vwar en gran stati ki son latet ti ganny fer avek lor, pwatrin ek lebra avek larzan, vant ek kwis avek kwiv, lazanm an feray e lipye ti ganny fer avek feray melanze avek larzil. En ros ti detase avek en montanny, tap kot sa lipye frazil e kraz sa stati anpoud. Danyel ti eksplike ki bann parti sa stati ti reprezant bann pouvwar mondyal, enn apre lot, ki ti konmans avek Babilonn konman sa latet annor. Danyel ti osi vwar davans ki ver lafen dominasyon bann pouvwar dan sa move lemonn, Rwayonm Bondye ti pou azir. I ti pou detrir tou bann gouvernman sa lemonn. Apre sa i pou dirize pour touzour.—Danyel sapit 2.

Danyel ti viv pour vwar Babilonn tonbe menm si i ti’n vye. Lerwa Siris ti detrir sa lavil zis parey bann profet ti’n predir. Pa tro lontan apre, bann Zwif ki ti an egzil ti finalman ganny libere e retourn dan zot pei natal ki ti’n reste abandonnen apre ki sa 70 an ki ti’n ganny predir ti’n konplete. Anba gidans bann gouverner, pret ek profet fidel, bann Zwif ti finalman rebatir Zerizalenm ek tanp Zeova. Me ki ti pou arive apre lafen sa 483-z-an?

Baze lo liv Danyel.