Skip to content

Al lo sa dezyenm lalis

Al lo konteni

Temwen Zeova

Kreol Seselwa

Labib—Ki son mesaz?

 SEKSYON 18

Zezi i fer mirak

Zezi i fer mirak

Atraver son bann mirak Zezi i montre ki mannyer i pou servi son pouvwar konman Lerwa

BONDYE ti donn Zezi pouvwar pour fer bann keksoz ki lezot imen pa ti pou kapab fer. Zezi ti fer plizyer mirak, souvan devan plizyer lafoul dimoun. Sa bann mirak ti prouve ki Zezi ti annan pouvwar lo bann lennmi ek lobstak ki imen pa’n reisi kapab konbat avek. Egzamin detrwa legzanp.

Lafanmin. Premye mirak ki Zezi ti fer, i ti fer delo vin diven. Dan de lezot moman, i ti nouri en gran lafoul ki ti lafen avek detrwa dipen ek pwason. Dan tou le de ka, i ti annan plis ki dekwa manze pour tou dimoun.

Maladi. Zezi ti geri bann dimoun ki ti annan “tou sort maladi.” (Matye 4:23) I ti geri bann dimoun aveg, sourd, bann lepre e sa ki ti tonm bebelouka. I ti geri bann ki ti bwete ek bann andikape. Napa en maladi ki i pa ti kapab geri.

Movetan. Ler Zezi ek son bann disip ti pe navige lo Lanmer Galile, en sel kou i ti annan en gro tanpet. Bann disip ti vreman per. Zezi ti senpleman get sa tanpet e dir: “Silans. Reste trankil.” Deswit, tou ti kalmi. (Mark 4:37-39) Dan en lot moman, i ti mars lo delo pandan en gro tanpet efreyan.—Matye 14:24-34.

Bann demon. Bann demon i bokou pli for ki bann imen. Bokou dimoun pa’n reisi liber zot lekor avek sa bann lennmi Bondye ki vreman visye. Pourtan, dan plizyer moman kan Zezi ti ordonn zot pour sorti dan bann dimoun, sa bann demon ti nepli kapab annan kontrol lo zot viktim. I pa ti per sa bann demon. O kontrer, zot ti konn son lotorite e zot ti per li.

Lanmor. Idantifye konman nou “dernyen lennmi,” lanmor i en fleo ki personn pa kapab evite. (1 Korentyen 15:26) Pourtan Zezi ti resisit bann dimoun mor. I ti resisit garson en vev e en zenn fiy ki son paran ti pe plere akoz i ti’n mor. Dan en moman vreman remarkab, Zezi ti resisit enn son zanmi pros ki ti apel Lazar devan en lafoul ki ti pe plere, menm si sa zonm ti’n mor pour pros kat zour! Menm son bann pli gran lennmi ti admet ki Zezi ti’n fer sa mirak.—Zan 11:38-48; 12:9-11.

Akoz Zezi ti fer tou sa mirak? Apre tou, pa tou sa bann ki i ti ede ti mor apre? Wi, me bann mirak Zezi ti annan byenfe dirab. Zot ti prouve ki tou profesi eksitan konsernan renny sa Mesi ki ti pou vin Lerwa pou vin vre. Napa okenn rezon pour doute ki sa Lerwa ki Bondye in apwente pou elimin lafamin, maladi, movetan, bann demon e menm lanmor. I’n deza fini prouve ki Bondye in met tou sa kalite pouvwar dan son lanmen.

Baze lo liv Matye, Mark, Lik ek Zan.