Skip to content

Al lo sa dezyenm lalis

Al lo konteni

Temwen Zeova

Kreol Seselwa

Labib—Ki son mesaz?

 SEKSYON 8

Pep Izrael i antre Kanaan

Pep Izrael i antre Kanaan

Zozye i gid bann Izraelit pour konkerir Kanaan. Zeova i swazir bann ziz pour delivre son pep kont labi pouvwar

PLIZYER syek avan ki bann Izraelit ti antre Kanaan, Zeova ti promet ki bann desandans Abraam ti pou ganny sa pei. Aprezan anba lotorite Zozye, bann Izraelit ti pare pour pran Later Promiz.

Bondye ti’n ziz bann Kananeen, zot ti merit destriksyon. Zot ti’n ranpli sa pei avek bann pratik seksyel degradan e osi avek versman disan san okenn pitye. Alor, bann lavil Kanaan ki bann Izraelit ti pou konkerir ti devret ganny detrir konpletman.

Parkont, avan antre dan sa pei, Zozye ti anvoy de espyon, zot ti reste dan lavil Zeriko avek en madanm ki ti apel Raab. I ti akey sa de espyon se li e protez zot, menm si i ti konnen ki zot ti bann Izraelit. Raab ti annan lafwa dan Bondye bann Izraelit akoz i ti’n tann konsernan lafason ki Zeova ti’n delivre son pep. I ti fer sa de espyon promet ki zot pa ti pou touy li ek son fanmir.

Pli tar, kan bann Izraelit ti antre Kanaan e vin lager avek Zeriko, dan en fason mirakile Zeova ti fer miray Zeriko tonbe. Latroup larme Zozye ti antre vitman dan sa lavil e detrir li, me zot pa ti fer Raab ek son fanmir nanryen. Apre, dan en seri lager militer ki ti dire pour si-z-an, Zozye ti konkerir bann gran bout dan Later Promiz. Apre sa, sa pei ti ganny partaze avek bann tribi Izrael.

Ver lafen son servis pour Zeova, Zozye ti rasanble lepep. I ti fer zot rapel lafason ki Zeova ti’n azir avek zot zanset e ankouraz zot pour servi Zeova. Apre lanmor Zozye ek bann ansyen ki ti servi ansanm avek li, bann Izraelit ti kit Zeova pour al ador lezot fo bondye. Sa nasyon pa ti toultan reisi obeir lalwa Zeova pandan sa 300-z-an. Pandan sa letan, Zeova ti les lennmi bann Izraelit, parey bann Filisten vin lager avek zot. Me kan bann Izraelit ti kriy Zeova pour ganny led, i ti swazir 12 ziz an tou pour sov zot.

Liv Ziz i dekrir lepok bann Ziz ki ti konmans avek Otnyel e fini avek Sanmson ki ti sa zonm pli for fizikman ki’n deza egziste. Dan sa resi eksitan dan liv Ziz i annan sa laverite fondamantal ki ganny repete: Lobeisans anver Zeova i anmenn benediksyon, dezobeisans i anmenn maler.

—Baze lo Zozye; Ziz; Levitik 18:24, 25.