Skip to content

Al lo sa dezyenm lalis

Al lo konteni

Temwen Zeova

Kreol Seselwa

Labib—Ki son mesaz?

 SEKSYON 9

Bann Izraelit i demann en lerwa

Bann Izraelit i demann en lerwa

Sail, premye lerwa Izrael i dezobeir Zeova. David, sa enn avek ki Bondye i fer en lalyans konsernan en rwayonm eternel i siksed li

APRE lanmor Sanmson, Samyel ti servi konman profet ek ziz Izrael. Bann Izraelit ti pe kontinyen dir li ki zot ti a voudre annan en lerwa imen ki ti pou gouvern zot parey lezot nasyon. Menm si sa demann ti bles Zeova, i ti dir Samyel fer sa ki lepep ti pe demande. Bondye ti swazir Sail, en zonm ki ti annan limilite pour vin lerwa. Me avek letan, Lerwa Sail ti vin orgeye e dezobeisan. Zeova ti rezet li konman lerwa e demann Samyel pour apwent David, en zenn onm dan son plas. Me i ti pran plizyer lannen avan ki David ti kapab vin lerwa.

Kan i ti ankor en adolesan, David ti vizit son bann frer ki ti bann solda dan larme Sail. Sa latroup larme antye ti per Golyat, en zean dan larme lennmi ki ti kontinyen provok zot ek zot Bondye. David pa ti kontan sa, i ti aksepte pour konbat avek sa zean. Konman zarm, sa zenn onm ti annan zis en fles ek detrwa ros pour li al lager avek son oponan ki ti preski 3 met oter. Ler Golyat ti sikann li, David ti reponn ki i pli byen ekipe ki sa zean, akoz David ti pe lager o non Zeova! David ti touy Golyat avek zis en ros e apre sa i ti koup latet sa zean avek son prop sab. Larme Filisten ti telman per ki zot ti taye avek lafreyer.

Premye kou, Sail ti enpresyonnen avek kouraz David e i ti fer sa zennonm ansarz son larme. Me sikse David ti fer Sail zalou en kantite. David ti bezwen sove pour sov son lavi e i ti viv konman en refizye pour plizyer lannen. Kantmenm sa, David ti reste fidel anver sa lerwa ki ti pe esey touy li. I ti mazinen ki Lerwa Sail ti’n ganny apwente par Zeova. Finalman, Sail ti mor dan en batay. Pa tro bokou letan apre sa, David ti vin lerwa zis parey Zeova ti’n promet.

“Mon pou solidman etablir tronn son rwayonm pour en letan endefini.”—2 Samyel 7:13

Konman lerwa, David ti annan sa gran dezir pour konstrir en tanp pour Zeova. Parkont, Zeova ti dir David ki enn son desandans ki ti pou fer sa. Salomon, garson David ki ti konstrir sa tanp. Kantmenm sa, Bondye ti rekonpans David, i ti fer en lalyans ekstraordiner avek li. I ti dir li ki i ti pou annan bann lerwa dan son desandans ki ti pou vreman remarkab. Finalman, sa Sover ouswa Desandans ki ti ganny promet dan zarden Edenn ti pou sorti dan son desandans. Sa enn ti pou vin sa Mesi ki vedir “sa Enn ki’n ganny swazir” e ganny apwente par Bondye. Zeova ti promet ki sa Mesi ti pou vin Dirizan dan en gouvernman ouswa Rwayonm ki pou dire pour touzour.

David ti vreman rekonesan, i ti rasanble en kantite materyo konstriksyon ek bann metal presye pour konstriksyon tanp. I ti osi konpoz plizyer psonm enspire. Ver lafen son lavi, David ti rekonnet: “Lespri Zeova ki’n koz atraver mwan e son parol ti lo mon lalang.”—2 Samyel 23:2.

Baze lo 1 ek 2 Samyel; 1 Kronik; Izai 9:7; Matye 21:9; Lik 1:32; Zan 7:42.