Skip to content

Al lo sa dezyenm lalis

Al lo konteni

Temwen Zeova

Kreol Seselwa

Ki Labib i dir?

 SAPIT SEZ

Swazir pour ador Bondye

Swazir pour ador Bondye

1, 2. Ki kestyon ou bezwen demann ou lekor e akoz sa i enportan?

DAN ou letid Labib, ou’n aprann ki bokou dimoun ki dir ki zot ador Bondye i ansenny ouswa pratik bann keksoz ki Bondye pa kontan. (2 Korentyen 6:17) Se pour sa ki Zeova i donn nou lord pour sorti dan “Gran Babilonn,” setadir fo larelizyon. (Revelasyon 18:2, 4) Ki ou pou fer? Nou tou nou bezwen fer nou prop desizyon e nou bezwen demann nou lekor, ‘Eski mon anvi ador Bondye dan sa fason ki li i anvi ouswa dan sa fason ki mon’n toultan fer li?’

2 Si ou’n fini kit fo larelizyon ouswa ou’n demande ki ou non i ganny tire lo lalis, sa i byen. Me petet i ankor annan serten tradisyon ek koutim relizye ki ou ankor kontan. Aprezan nou pou diskit serten sa bann tradisyon ek koutim e vwar akoz i sitan enportan ki nou annan menm pwennvi ki Zeova lo sa bann koutim.

LADORASYON ZIDOL EK ZANSET

3. (a) Akoz serten i kapab vwar li difisil pour aret servi bann stati dan zot ladorasyon? (b) Ki Labib i dir konsernan servi zidol pour ador Bondye?

3 Pour bokou letan, serten dimoun in servi bann stati ouswa bann lagrot pour ador Bondye. Si ou osi ou parey, petet ou pou vwar li drol oubyen menm mal pour ador Bondye san servi zot. Me rapel ki Zeova i ansenny nou konman pour ador li. Labib i dir nou klerman ki Zeova pa anvi ki nou servi bann zidol dan  nou ladorasyon.​—Lir Egzod 20:4, 5; Psonm 115:4-8; Izai 42:8; 1 Zan 5:21.

4. (a) Akoz nou pa devret ador nou bann zanset? (b) Akoz Zeova ti demann son pep pour pa esey koz avek bann dimoun mor?

4 Serten dimoun i fer bokou zefor e zot pas en kantite letan pour esey fer plezir zot bann zanset ki’n mor. Serten i menm ador zot zanset. Me nou’n aprann ki bann dimoun ki’n mor pa kapab ed nou, fer nou ditor e ki zot pa vivan kekpar. Anfet, i danzere pour esey kominik avek zot parski okenn mesaz ki paret sorti kot en dimoun mor i an realite sorti kot bann demon. Sanmenm sa Zeova ti demann bann Izraelit pour pa esey koz avek bann dimoun mor ouswa fer okenn lezot keksoz ki annan pour fer avek bann pratik demonyak.​—Deterononm 18:10-12; vwar Lezot lenformasyon nimero 26 ek 31.

5. Kwa ki kapab ed ou aret servi zidol pour ador Bondye e pour aret ador ou bann zanset?

5 Kwa ki kapab ed ou pour aret servi zidol pour ador Bondye ouswa pour aret ador ou bann zanset? Ou bezwen lir Labib e reflesir seryezman lo konman Zeova i konsider sa bann keksoz. I konsider zot konman “degoutan” oubyen detestab. (Deterononm 27:15) Priy Zeova toulezour pour ki i ed ou annan menm pwennvi ki li e pour ki ou kapab ador Li dan sa fason ki i oule. (Izai 55:9) Ou kapab asire ki Zeova pou donn ou sa lafors ki ou bezwen pour aret fer oubyen servi okenn keksoz ki annan pour fer avek fo ladorasyon.

ESKI NOU DEVRET FET NWEL?

6. Akoz le 25 Desanm ti ganny swazir pour selebre nesans Zezi?

6 Dan bokou pei, Nwel i en lafet popiler. Laplipar  dimoun i krwar ki i en lafet kot dimoun i selebre nesans Zezi. Me an realite, Nwel i relye avek fo ladorasyon. En ansiklopedi i eksplike ki bann Romen ki pa ti Kretyen ti selebre nesans soley le 25 Desanm. Bann sef legliz ti anvi ki plis Romen i vin Kretyen, alor menm si Zezi pa ti’n ne le 25 Desanm, zot ti deside fet nesans Zezi sa menm dat ki zot ti selebre nesans soley. (Lik 2:8-12) Bann disip Zezi pa ti selebre Nwel. En liv i eksplike ki 200 an apre nesans Zezi, “i ti napa personn ki ti konnen egzakteman kan i ti ne e i ti napa bokou dimoun osi ki ti enterese pour konnen.” (Sacred Origins of Profound Things) Bann selebrasyon pour lafet Nwel ti konmans plizyer santenn lannen apre ki Zezi ti’n vin lo later.

7. Akoz bann vre Kretyen pa fet Nwel?

7 Bokou dimoun i konnen ki Nwel ek son bann tradisyon, tel parey fer parti e donn kado, i sorti dan bann tradisyon ki bann dimoun ki pa ti ador Bondye ti fer. Par egzanp, i ti annan en letan kot dimoun Langleter e dan serten landrwa Lanmerik pa ti ganny drwa fet Nwel akoz i pa ti ganny konsidere konman en lafet Kretyen. Okenn dimoun ki ti fet Nwel ti ganny pini. Me ptitapti dimoun ti rekonmans fet Nwel. Me akoz bann vre Kretyen pa fet Nwel? Parski zot anvi fer Bondye plezir dan tou sa ki zot fer.

ESKI NOU DEVRET SELEBRE NOU LANNIVERSER NESANS?

8, 9. Akoz bann Kretyen dan premye syek pa ti selebre lanniverser nesans?

8 En lot selebrasyon popiler pour bokou dimoun i zot lanniverser nesans. Eski bann Kretyen i devret selebre zot lanniverser nesans? Sel selebrasyon lanniverser  nesans ki nou vwar dan Labib se bann dimoun ki pa ti ador Zeova. (Zenez 40:20; Mark 6:21) Bann selebrasyon lanniverser nesans ti ganny fer pour onor bann fo bondye. Sanmenm sa ki bann Kretyen dan premye syek “ti vwar fet lanniverser nesans en dimoun konman en koutim payen.”​—The World Book Encyclopedia.

9 Sa liv The Lore of Birthdays i dir ki bann Romen ek bann Grek ti krwar ki nesans sak dimoun ti tonm menm zour ki lanniverser nesans en bondye. En lespri ki ti pros avek sa bondye ti asiste nesans sa dimoun. Bann payen ti krwar ki sa dimoun ti bezwen selebre son lanniverser pour ki sa lespri i kapab protez li tou dilon son lavi.

10. Akoz bann Kretyen ozordi pa selebre lanniverser nesans?

10 Eski ou krwar ki Zeova i dakor avek sa bann selebrasyon ki relye avek fo larelizyon? (Izai 65:11, 12) Non. Sanmenm sa nou pa selebre lanniverser nesans ouswa okenn lezot lafet ki relye avek fo larelizyon.

ESKI SA I VREMAN ENPORTAN?

11. Akoz dimoun i selebre serten lafet? Kwa ki devret pli enportan pour ou?

11 Serten dimoun i konnen ki Nwel ek serten lezot lafet i sorti dan bann koutim ki bann dimoun ki pa ti Kretyen ti selebre. Me kantmenm sa zot kontinyen fet zot. Zot santi ki sa bann lafet i zis en bon loportinite pour pas letan avek zot fanmir. Eski sanmenm sa ki ou mazinen ou osi? Napa nanryen mal pour ou anvi pas letan avek ou fanmir. Zeova ki’n fer laranzman pour ki i annan bann fanmir e i anvi ki nou annan en bon relasyon avek nou fanmir. (Efezyen 3:14, 15) Par kont, fer plezir Zeova i pli enportan ki fer plezir nou fanmir. Alor, nou pa devret selebre bann lafet relizye ki Zeova pa kontan.  Sanmenm sa zapot Pol ti dir: “Kontinyen fer sir ki sa ki zot fer i akseptab pour Senyer.”​—Efezyen 5:10.

12. Kwa ki fer en lafet pa akseptab pour Zeova?

12 Bokou dimoun i krwar ki i pa enportan kote en lafet i sorti, me Zeova pa santi koumsa. I pa aksepte bann lafet ki sorti dan fo larelizyon ouswa bann lafet ki glorifye en dimoun ouswa en pei. Par egzanp, bann Ezipsyen ti selebre bann lafet pour zot bann fo bondye. Apre ki bann Izraelit ti’n sorti dan lesklavaz Lezip, zot ti imit enn sa bann lafet ki ti sorti dan fo ladorasyon e apel li en lafet pour Zeova. Me Zeova ti pini zot akoz sa. (Egzod 32:2-10) Parey profet Izai ti dir, nou pa devret “tous nanryen ki enpir.”​—Lir Izai 52:11.

TRET LEZOT ZANTIMAN

13. Ki kestyon ou kapab demann ou lekor si ou deside aret selebre bann lafet?

13 Ler ou deside pour aret selebre sa bann lafet, petet ou pou annan bokou kestyon. Par egzanp: Ki mon devret fer si mon koleg travay i demann mwan akoz mon pa pe fet Nwel avek zot? Ki mon devret fer si en dimoun i donn mwan en kado Nwel? Ki mon devret fer si mon konzwen i oule mon selebre enn sa bann lafet? Ki mannyer mon kapab ed mon zanfan pour pa santi zot tris akoz zot pa pe selebre en lafet ouswa zot lanniverser nesans?

14, 15. Ki ou kapab fer si en dimoun i swet ou en bonn fet ouswa si i donn ou en kado?

14 I enportan ki ou byen reflesir avan ki ou koze oubyen azir. Par egzanp, si en dimoun i swet ou en bonn fet, ou pa bezwen inyor li. Ou kapab senpleman dir, “Mersi.” Me dan bann ka kot sa dimoun ti a kontan  konn plis, ou kapab eksplik li akoz ki ou pa selebre sa lafet. Par kont, ou devret touzour zantiy, koz avek respe ek bon zizman. Labib i dir: “Zot parol i devret touzour agreab, konmsi i asezonnen avek disel, pour ki zot konnen konman zot devret reponn sak dimoun.” (Kolosyen 4:6) Petet ou kapab eksplik zot ki ou kontan pour donn kado e pas letan avek lezot me ou swazir pour pa fer li an menm tan ki sa bann lafet.

15 Ki ou devret fer si en dimoun i donn ou en kado? Labib pa donn nou en lalis lareg, par kont i dir ki nou devret gard en konsyans kler. (1 Timote 1:18, 19) Petet sa dimoun ki pe ofer ou sa kado pa konnen ki ou pa selebre sa lafet. Oubyen petet i dir, “Mon konnen ki ou pa selebre sa lafet, me kantmenm sa mon ti a kontan donn ou sa kado.” Dan tou le de ka, ou ki bezwen deside si ou pou aksepte sa kado ouswa non. Me nenport ki desizyon ki ou fer, fer sir ki ou gard en konsyans kler. Nou pa ti pou anvi fer okenn keksoz ki ti pou gat nou relasyon avek Zeova.

OU EK OU FANMIR

Bann dimoun ki servi Zeova i ere

16. Ki ou devret fer si ou fanmir i anvi ou selebre en lafet avek zot?

16 Ki ou devret fer si ou fanmir i anvi selebre en lafet? Ou pa bezwen tro argimante avek zot. Mazinen ki zot osi zot annan drwa deside ki zot pou fer. Se pour sa ki ou devret zantiy e respekte zot pwennvi zis parey ou anvi zot respekte pour ou. (Lir Matye 7:12.) Me ki ou pou fer si ou fanmir i anvi ki ou pas letan avek zot pandan en lafet? Avan ki ou deside, priy Zeova e demann li pour ed ou fer sa bon desizyon. Reflesir lo sa sityasyon e fer en pe resers lo la. Mazinen ki ou toultan anvi fer Zeova plezir.

17. Ki ou kapab fer pour ed ou zanfan pa santi ki zot mank en keksoz ler zot vwar lezot pe selebre bann lafet?

 17 Ki ou kapab fer pour ed ou zanfan ler zot vwar lezot pe selebre bann lafet? Be tanzantan ou kapab fer en pti keksoz spesyal pour zot. Ou kapab donn zot bann pti kado san ki zot ekspekte. Deplis, enn parmi bann pli bon kado ki ou kapab donn ou zanfan se ou letan ek lanmour.

PRATIK VRE LADORASYON

18. Akoz nou devret asiste renyon Temwen Zeova?

18 Pour fer plezir Zeova, nou bezwen rezet fo larelizyon ek tou son bann koutim ek lafet. Me nou osi bezwen pratik vre ladorasyon. Ki mannyer nou kapab fer sa? En fason se par asiste bann renyon Temwen Zeova regilyerman. (Lir Ebre 10:24, 25.) Sa bann renyon i zwe en rol vreman enportan dan vre ladorasyon. (Psonm 22:22; 122:1) Ler nou zwenn ansanm nou kapab ankouraz kanmarad.​—Romen 1:12.

19. Akoz i enportan pour koz avek lezot lo laverite ki ou’n aprann dan Labib?

19 En lot keksoz ki montre ki nou’n swazir pour pratik vre ladorasyon se pour koz avek lezot lo sa ki nou’n aprann dan Labib. En kantite dimoun i santi zot boulverse ler zot vwar sa bann move keksoz ki pe arive lo later. Petet ou konn serten ki santi zot koumsa. Koz avek zot lo ou zoli lespwar pour lavenir. Anmezir ki ou al ou bann renyon e koz avek lezot lo laverite, ou pou vwar ki ou nepli anvi form parti fo larelizyon ek son bann koutim. Ou kapab asire ki ou pou ere e ki Zeova pou beni ou zefor en kantite anmezir ki ou ador li dan sa bon fason.​—Malaki 3:10.